Chutka ŭ Trajeckim pradmieści adkryjecca chosteł Trinity — pieršaja mini-haścinica stalicy z vysakarodnym vidam z akna. Heta budzie ŭžo treci chosteł pad brendam Traveler, a dyrektaram usich punktaŭ sietki vystupaje 20-hadovaja Ksienija Kuruś.
Nyrajem u adnu z arak Trajeckaha pradmieścia i chutka znachodzim trochpaviarchovy budynak pa adrasie Staravilenskaja, 12. Ceły padjezd hetaha doma z 22 lutaha zrobicca chostełam Trinity. Na pieršym paviersie mini-haścinicy pakul panujuć maŭklivyja budaŭniki, a pobač ź leśvicaj štabialami lažać matracy. Tamu my, nie zatrymlivajučysia, padymajemsia na druhi pavierch. Tut u beta-viersii chosteła žyvuć pieršyja pastajalcy. Pakul dziaŭčaty-administratary zaparvajuć harbatu, dyrektarka chosteła Ksienija Kuruś abmaloŭvaje bližejšuju budučyniu.
Adkryćcio chosteła zapłanavali na kaniec lutaha. Da hetaha času darobiać pieršy pavierch — i ŭ chostele buduć miescy dla 55 turystaŭ. Tut jość šaści-, piaci-, čatyroch- i trochmiascovyja numary i «luks». Košty pačynajucca ad $ 15 za samy hustanasieleny pakoj i ruchajucca ŭvierch da $ 45 — za «luks».
Usie standartnyja nišciaki ŭ Trinity prysutničajuć — biaspłatny wi-fi, nastolnyja hulni i hidy pa horadzie. U pierśpiektyvie tut budzie biljard, nastolny futboł i hulniavyja aŭtamaty na trecim paviersie. Bonusam da hetaha naboru — kandycyjaniery ŭ niekatorych numarach dy darmovyja tosty z džemam i miuśli z małakom na śniadanak.
Ale hałoŭny plus — heta samo miesca, u jakim znachodzicca chosteł. U adroźnieńnie ad kankurentaŭ, z voknaŭ Trinity bačnyja reštki staroha Miensku, a ŭsie histaryčnyja kaštoŭnaści — u miežach piešaj dastupnaści.
«Takoje miesca ja šukała amal paŭhoda, – raspaviadaje Ksienija. – Byŭ jašče varyjant na Karła Marksa, ale pamiaškańnie addali pad kafe, bo jany “raniej pryjšli” abo niešta takoje. Jak znajšła hety rajski kut? Kali ty robiš dobruju spravu, Suśviet tabie dapamahaje».
Naohuł, Ksienija vielmi časta kaža pra dabro, luboŭ da svajoj spravy i suśvietnuju harmoniju. Spačatku navat nie vierycca, što takaja ramantyčnaja 20-hadovaja dziaŭčyna adkryvaje ŭžo treci chosteł za hod. Ale mienavita jana z prajektam chosteła pieramahła na konkursie StartupWeekend u studzieni 2012 hoda. A potym damoviłasia ź inviestaram, jaki vyłučyŭ $ 50 tys. na realizacyju prajekta. U traŭni Ksienija adkryła pieršy chosteł u Čyžoŭcy, u kastryčniku – druhi na vulicy Maksima Tanka. Trinity – treci pa liku.
Ciapier chosteł na Tanka začynili i abjadnali z Trinity. Hrošy na ŭsie hetyja prajekty davaŭ biźniesoviec Alaksandr Knyrovič, jaki zajmajecca budaŭnictvam. Pa chodzie razmovy razumieju, čamu jon davieryŭ kiravańnie chostełam Ksienii.
Praciah historyi hladzicie pa spasyłcy.
