Rasijskich i ŭkrainskich elektronnych biblijatek — proćma, biełaruskich — adna-dźvie. Ź inicyjataram i kiraŭnikom najbolšaj ź biełaruskich elektronnych biblijatek Jarasłavam Ivaniukom hutaryć Natałka Babina.

Jarasłaŭ Ivaniuk.

Jarasłaŭ Ivaniuk.

Kamunikat.org siońnia — heta bolš za 12 tys. publikacyj, jakija majuć dačynieńnie da Biełarusi. Charakterna, što robicca sajt siłami polskich biełarusaŭ i pry padtrymcy sponsaraŭ, a biełaruskaja dziaržava nijak nie spryjaje jaje pracy.

Natałka Babina: Kolki hadoŭ užo isnuje Kamunikat.org?

Jarasłaŭ Ivaniuk: Hetaja inicyjatyva ŭźnikła ŭ 2000 hodzie, kab pieravodzić u internet materyjały biełaruskaj redakcyi radyjo «Pałonija». Spačatku ja rabiŭ heta sam, samastojna avałodaŭšy patrebnymi navykami. Vialikaj papularnaściu karystalisia histaryčnyja materyjały. Pakolki tady ŭ Biełastoku ŭžo niekalki hadoŭ isnavała Biełaruskaje histaryčnaje tavarystva, ja źviarnuŭsia da jaho kiraŭnikoŭ Aleha Łatyšonka i Jaŭhiena Miranoviča z pytańniem, ci dazvolać jany vystavić u internet «Biełaruski histaryčny zbornik» i knihi, jakija vydavała tavarystva. Jany pahadzilisia, i źjaviłasia dumka zrabić śpiecyjalny sajt dla biełaruskich knižak.

Spačatku heta byli knižki, jakija vydavalisia biełarusami Biełastoččyny, i pamału staŭ stvaracca biblijatečny sajt.
My źviarnulisia z prapanovaj da Instytuta navuki i mastactva ŭ Ńju-Jorku, da Zhurtavańnia biełarusaŭ śvietu «Baćkaŭščyna», a potym pačali niepasredna źviartacca da aŭtaraŭ z prapanovaj vystaŭlać ich knižki na našym sajcie.
Spačatku heta była paprostu pryvatnaja inicyjatyva — maja. Pracavali pry hetym try čałavieki: Alaksandr Maksimiuk, Natalla Hierasimiuk i ja. Siem hadoŭ my rabili heta ŭ svoj volny čas.
I tolki ŭ 2007 hodzie my atrymali padtrymku ad polskaha Ministerstva zamiežnych spravaŭ. I z taho času sajt Kamunikat.org zrabiŭsia prafiesijnym sajtam z roznymi instrumientami, patrebnymi, kab sajt ličyŭsia sučasnym i dobra ŭładkavanym.
Za čas «partyzanščyny» my sabrali 800 publikacyj.

Na hety momant na sajcie bolš za 12 tys. biełaruskich publikacyj: knižki, časopisy, haziety, videa- i aŭdyjomateryjały… Ciapier u našym kalektyvie ź dziasiatak čałaviek.

NB: Ci supracoŭničajecie vy z arhanizacyjami ź Biełarusi?

JAI: Tolki z hramadskimi abjadnańniami, naprykład, sa Zhurtavańniem biełarusaŭ śvietu «Baćkaŭščyna», ź niezaležnym Sajuzam piśmieńnikaŭ. My sprabavali naładzić supracoŭnictva z aficyjnymi vydaviectvami, ale ničoha nie vyjšła.

Što sumna, da nas ź Minska dachodziać čutki, nibyta adzin z pravajdaraŭ błakuje naš sajt.

NB: Kolki čałaviek zachodzić štodzionna na vaš sajt?

JAI:

Sajt adkryvajecca 1500–2000 razoŭ na dzień. Piki naviedvalnaści nazirajucca padčas navučalnaha hoda.
Trochi padaje jana na kanikułach.

NB: Chto z aŭtaraŭ najbolš papularny?

JAI: Ciažka nazvać piersanalii. Raździeł sajta «Biełaruskija aŭtary» maje amal 300 piersanalnych staronak. Jość jak sučasnyja biełaruskija piśmieńniki, tak i kłasiki. My publikujem aŭtarskija knihi, šanujučy aŭtarskaje prava.

My zaŭsiody zaklučajem damovy z aŭtarami ci ich spadkajemcami. Tak, my zaklučyli damovy sa spadkajemcami Siarhieja Hrachoŭskaha, Ivana Šamiakina, Uładzimira Kaleśnika, Uładzimira Karatkieviča, Janki Bryla, Alesia Adamoviča, Ivana Mieleža
i inšych.

Papaŭniajučy našy resursy,

my kirujemsia dvuma kryterami: knižki pavinnyja być pa-biełarusku abo pra Biełaruś.

Źviartajucca da nas taksama ludzi, jakija havorać, što niama mahčymaści vydać knihi ŭ Biełarusi, i prosiać raźmiaścić ich na našym sajcie.

NB: Što ŭ płanach?

JAI: Zajmajemsia elektronnymi knihami, jakija robiacca ŭsio bolš papularnymi. Ciapier bolšaść našych knih — heta pdf-y.

Da kanca hoda płanujem padrychtavać kala 150 elektronnych knih, a ŭ nastupnym jašče kala 300 knih trapić da našych karystalnikaŭ.

Zajmajemsia taksama abličbavańniem biełaruskaj presy.

Užo majem abličbavanuju «Našu Nivu», «Chryścijanskuju dumku», «Svabodu», «Baćkaŭščynu», hazietu «Biełarus» i niekalki emihracyjnych vydańniaŭ. Ciapier abličboŭvajem «Naša słova» i «Pahoniu».
Praca vielmi karpatlivaja, bo archiŭnyja numary časta zachoŭvajucca ŭ vielmi drennym stanie, i kab heta abličbavać, treba prykłaści šmat namahańniaŭ. Časam na adnu staronku idzie niekalki hadzinaŭ. Jość jašče płany abličbavać časopis «Krynica».

NB: A sami čytajecie knihi z Kamunikat.org?

JAI: Tak! Ale kali mnie niešta padabajecca, to chočacca atrymać knihu ŭ papiarovym varyjancie, a najlepš — z aŭtohrafam aŭtara. Ale ja razumieju, što moładź budzie addavać usio bolšuju pieravahu elektronnym tekstam. I ja liču, što heta

niapraŭda, nibyta biełaruskaja litaratura nie karystajecca popytam, što jana nikomu niecikavaja. Kali 2000 razoŭ na dzień adkryvajecca sajt — značyć, cikavaja!

NB: A što ŭ budučyni? Kali raptam finansavańnie spynicca, budziecie praciahvać?

JAI: Pa sutnaści, nie hrošy važnyja, a sama ideja i radaść ad taho, što robiš dobruju i patrebnuju spravu. A hrošy… kali buduć — nie zaškodziać, a kali nie budzie, to i tak abydziemsia. Budziem, u lubym vypadku budziem.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?