Dziciačyja tavary ajčynnaj vytvorčaści nie karystajucca popytam, bo ŭstupajuć impartnym anałaham. Takuju vysnovu Kamitet dziaržkantrolu Homielskaj vobłaści robić pa vynikach pravierki za hod u śfiery vytvorčaści, impartu i realizacyi na terytoryi rehijonu sacyjalna značnych tavaraŭ dla dziaciej.
Jak paviedamili ŭ KDK Homielskaj vobłaści, u cełym situacyja z zabieśpiačeńniem spažyvieckaha rynku dziciačymi tavarami stabilnaja, pakupnicki popyt zadavalniajecca ŭ poŭnym abjomie jak za košt tavaraŭ ajčynnaj, tak i impartnaj vytvorčaści.
Vybaračny analiz realizacyi ŭ bujnych handlovych abjektach Homiela tavaraŭ dla dziaciej pakazaŭ, što dola prodažu ajčynnych tavaraŭ davoli vysokaja.
U toj ža čas biełaruskija vytvorcy nie vyrablajuć asobnyja tavary dla dziaciej: soski, pustyški, butelečki dla karmleńnia dziaciej, padhuzki i pampiersy, vilhotnyja survetki.U vielmi niedastatkovych abjomach, pavodle mierkavańnia KDK, vyrablajucca dziciačyja łožki i kalaski.
Štany dla chłopčykaŭ, spadnicy dla dziaŭčynak ustupajuć impartnym vyrabam pa kalarovaj hamie, nabivanych malunkach, zdolnaści tkaniny ŭtrymlivać formu i, narešcie, canie.Tak, štany dla chłopčykaŭ vytvorčaści Biełarusi kaštujuć 165–182 tysiačy rubloŭ, impartnyja — 132 tysiačy.
Taksama supracoŭniki KDK pa vynikach pravierki kanstatujuć, što dźvie madeli dziciačych kalasak vytvorčaści AAT «EKTB» (Minsk) ciažkija, drenna transfarmujucca ŭ prahułačnuju, a taksama majuć vysokuju adpusknuju canu i adpaviedna praktyčna nie karystajucca popytam. Naprykład, u adnym z mahazinaŭ za 2011 hod realizavana 40 dziciačych kalasak, ź jakich tolki 10 — miascovaj vytvorčaści. Pry hetym impartavanyja ŭ vobłaść kalaski polskaj vytvorčaści majuć vysokija spažyvieckija charaktarystyki i karystajucca stabilnym popytam.
Jašče adnoj prablemaj nazyvajecca adsutnaść ułasnych jakasnych materyjałaŭ i syraviny.Naprykład, AAT «Žłobinskaja šviejnaja fabryka» na 70% šyje vyraby dla dziaciej ź impartnaj syraviny i materyjałaŭ, bo ajčynnyja tkaniny i furnitura pa šerahu charaktarystyk nie mohuć być vykarystanyja dla pašyvu dziciačaha adzieńnia.
KDK prapanavaŭ Homielskamu abłvykankamu pryniać miery pa nasyčeńni spažyvieckaha rynku vobłaści sacyjalna značnymi tavarami dla dziaciej ajčynnaj vytvorčaści, pavieličeńni abjomaŭ prodažu hetych tavaraŭ.
