Ale novaje daśledavańnie amierykanskich navukoŭcaŭ Džon Joanidzis i Džonatan Šojenfield zaklikaje nie nadta daviarać šmatlikim pracam, što źviazvajuć peŭnyja pradukty z pavyšeńniem ci panižeńniem ryzyki ŭźniknieńnia raku, paviedamlaje Reuters.
Joanidzis i Šojenfield aburylisia abjomam biespadstaŭnaj infarmacyi ŭ ŚMI i, uzhadaŭšy iścinu pra toje, što «100% chvorych pjuć vadu», vyrašyli daśledavać hetyja daśledavańni.
Navukoŭcy ŭ vypadkovym paradku vybrali z kulinarnaj knihi 50 praduktaŭ i znajšli ŭsie daśledavańni za apošnija 35 hadoŭ, jakija pakazvajuć rolu hetych praduktaŭ u pavyšeńni ci panižeńni ryzyki ŭźniknieńnia raku. U śpis vybranych praduktaŭ uvajšli samyja roznyja i raspaŭsiudžanyja ŭ paŭsiadzionnym žyćci pradukty: miasa i morapradukty, sadavina i harodnina, małočnyja pradukty, pradukty ź ciesta, śpiecyi.
Akazałasia, što 40 z 50 praduktaŭ sa śpisa (ad višniaŭ da syru j harčycy) užo ŭzhadvalisia ŭ 264 daśledavańniach. Pry hetym 108 ź ich kazali, što ŭžyvańnie peŭnaha praduktu pavyšaje ryzyku zachvorvańnia, a 88 — što panižaje. Takim praduktam, jak cybula, morkva ci zialony čaj, amal usie navukovyja pracy prypisvajuć pazityŭnaje dziejańnie. U toj ža čas viandliny j cukar adnahałosna byli pryznany škodnymi.
Ale bolšaść praduktaŭ pa svajoj karysnaści ci škodnaści nie robiać nijakaha dakładna akreślenaha ŭździejańnia.
Zvyčajna, vyniki asobnych daśledvańniaŭ pakazvali, što niejki pradukt napałovu pavyšaje ci panižaje šans zachvareć na rak. Ale ŭ šyrejšaj pierśpiektyvie, kali paraŭnoŭvalisia niekalki daśledavańniaŭ, uzajemasuviaź pamiž praduktam dy ŭzieniknieńniem raku ci zastavałasia vielmi słaboj, ci zusim źnikała.
Pa słovach navukoŭcaŭ, asnoŭnaja prablema — u adarvanaści indyvidualnych daśledavańniaŭ ad ahulnaha kantekstu: sistemy charčavańnia, hienietyčnych asablivaściaŭ toj ci inšaj nacyi i ekałahičnaj situacyi.
I ŭsio ž, niahledziačy na novyja dadzienyja, nichto nie admaŭlaje važnaj roli charčavańnia ŭ pavyšeńni ci pamianšeńni ryzyki raźvićcia ankałahičnych zachvorvańniaŭ. Hałoŭnaje — azdaravić dyjetu całkam, nie pierajadać, nie złoŭžyvać ałkaholem, tytuniom, a voś kankretnyja pradukty — dakładna nie panaceja.
