Znajści
Ałharytmičny łacinski varyjant
10.04.2024 / 15:20ŁacBieł

«Praz błytaninu niemahčyma było vyvieźci navat fieny dla vałasoŭ». Jak novyja praviły ŭ ES zakranuli impart u Biełaruś i što prydumała Rasija

Apošnimi miesiacami Jeŭropa pastrožyła kantrol za ekspartam u Rasiju padsankcyjnych tavaraŭ. Novyja abmiežavańni choć i ŭskosna, ale zakranajuć Biełaruś. «Naša Niva» pahutaryła ź niekalkimi supracoŭnikami kampanij, što ŭvoziać tavary ŭ našu krainu, kab daviedacca, jak im davodzicca pracavać u novych umovach.

Ilustracyjny zdymak. Fota: «Naša Niva»

Ciapier usie pa-sapraŭdnamu?

Apošni, 13-ty pakiet sankcyj pačaŭ dziejničać u druhuju hadavinu pačatku poŭnamaštabnaha ŭvarvańnia Rasii va Ukrainu. Jaho nazyvajuć kali nie samym, to adnym z samych šyrokich.

U dadatak da novych abmiežavańniaŭ, praź miesiac paśla ich źjaŭleńnia Polšča pačała bolš pilna sačyć za vykanańniem sankcyj. Praz heta ŭźnikli składanaści z uvozam nie tolki aŭtamabilaŭ z abjomam ruchavika bolš za 1,9 litra i koštam bolš za 50 tysiač jeŭra, ale i šerahu inšych tavaraŭ. 

«U pastanovie, jakuju polski Minfin razasłaŭ u mytnyja orhany, pieraličvalisia dźvie pieršyja ličby adrazu troch mytnych kodaŭ, tamu pieralik tavaraŭ, jakija polskaja mytnia admoviłasia vypuskać z kanca sakavika, byŭ davoli šyroki», — tłumačyć polski eksparcior.

Ź jaho słoŭ, u pieršy tydzień paśla źjaŭleńnia hetaj pastanovy ekspart šerahu tavaraŭ u Biełaruś byŭ faktyčna spynieny.

«U mytni nie było nijakich tłumačeńniaŭ ad Minfinu, tamu jany admaŭlalisia afarmlać ekspartnyja dakumienty i vypuskać pa ŭžo aformlenych tyja hruzy, mytnyja kody jakich pačynalisia na 84, 85, 87. Pieralik takich tavaraŭ byŭ davoli šyroki — niemahčyma było vyvieźci navat fieny dla vałasoŭ abo pyłasosy», — tłumačyć surazmoŭca.

Ciapier, pa słovach biznesmiena, polskaja mytnia pry afarmleńni tavaraŭ analizuje poŭny kod tavara. Kali jon nie pad sankcyjami ŭ Rasii, to afarmleńnie adbyvajecca biez dadatkovych pytańniaŭ.

Ilustracyjny zdymak. Fota: «Naša Niva»

«Kali tavar zabaronieny dla pastavak u Rasiju, a ŭ Biełaruś — nie, to dla jaho vyvazu treba padrychtavać dadatkovyja dakumienty. U dačynieńni da takich tavaraŭ patrabujuć pakazać harantyjnyja listy ad vytvorcy, ad siabie (ad eksparciora. — NN), i ad pakupnika. Kožny musić paznačyć, što pradukcyja pryznačana dla biełaruskaha rynku», — tłumačyć biznesmien.

Pa jahonych słovach, kali kančatkovy pakupnik sapraŭdy biełaruskaja, a nie rasijskaja kampanija, to vykanać takija patrabavańni mahčyma, choć i davoli składana.

Mnohija brendy aficyjna syšli, a faktyčna — nie

Inšy surazmoŭca, jaki pracuje ŭ kampanii, jakaja siarod inšaha impartuje ŭ Biełaruś aŭtamabilnyja zapčastki, kaža, što da vychadu apošniaha pakietu sankcyj abychodzić usie abmiežavańni było vielmi prosta.

«Brendy, jakija aficyjna syšli ź Biełarusi, praciahvali pastaŭlacca tolki praź firmy-prakładki. U niekatorych vypadkach, kab paźbiehnuć traplańnia pad sankcyi, pastaŭščyki prosta padmianiali mytnyja kody na tyja, jakija nie zakranajuć abmiežavańni.

Vyhladaje, što da vychadu 13-ha pakieta sankcyj za ich vykanańniem u ES hladzieli skroź palcy. Tolki z kanca lutaha — pačatku sakavika kantrol za abychodam sankcyj pastrožyli. Abychodzić abmiežavańni stała składana, časam navat niemahčyma», — kaža pradstaŭnik kampanii-imparciora.

Surazmoŭca kaža, što fury z sankcyjonkaj jechali z dvuma pakietami dakumientaŭ. Adzin pryznačaŭsia dla jeŭrapiejskaj mytni, a druhi — dla biełaruskaj.

«Ciapier hetaja schiema amal nie pracuje, bo navat padčas pravierki na jeŭrapiejskim baku mytniki mohuć pilna abšukać kabinu hruzavika. Kali znojduć druhi kamplekt dakumientaŭ, to heta ŭžo kryminałka».

Jeŭropa vypuskała hruzy, navat kali maršrut dastaŭki vyhladaŭ niełahičnym

Jašče adzin surazmoŭca, jaki pracuje ŭ śfiery łahistyki, taksama paćviardžaje infarmacyju pra toje, što da niadaŭniaha času abychodzić abmiežavańni było davoli prosta.

«Jeŭropa vypuskała hruzy navat u tych vypadkach, kali maršrut dastaŭki vyhladaŭ maksimalna niełahičnym. Pa dakumientach hruz z Polščy moh nakiroŭvacca furaj, naprykład, u Hankonh, a aŭtavozy z novymi aŭto jechali praz Estoniju ŭ Kazachstan. Ciapier takija schiemy nie pracujuć», — kaža łahist.

Ilustracyjny zdymak. Fota: «Naša Niva»

Ci aznačaje heta, što Rasija zastaniecca biez sankcyjonki?

U Rasii zastajucca opcyi atrymlivać sankcyjonnyja tavary praz takija krainy, jak Turcyja i AAE. Taki šlach bolš składany i darahi, tamu ad častki pazicyj rasijski rynak budzie vymušany admovicca. Astatnija prosta vyrastuć u canie praz uskładnienyja schiemy i łahistyku.

Dla jašče bolš žorstkaha kantrolu za vykanańniem sankcyj patrebna nie tolki žadańnie dziaržaŭnych orhanaŭ, ale i biznesu.

Jak rastłumačyŭ «Našaj Nivie» supracoŭnik bujnoj jeŭrapiejskaj kampanii, jakaja syšła z Rasii, biznes časta vydatna razumieje, što ich pradukcyja traplaje na rasijski rynak. 

«Heta nie vielmi składana adsačyć, bo pa ličbach dobra bačna, jak značnaja častka tych abjomaŭ prodažu, jakija da vajny prychodzilisia na Rasiju, raźmierkavalisia na krainy Centralnaj Azii i Turcyju».

Surazmoŭca ŭpeŭnieny, što bujnyja karparacyi śviadoma nie zmahajucca z hetymi źjavami, bo nie chočuć hublać rasijski rynak. Pa jaho słovach, rost prodažaŭ u krainy, jakija dapamahajuć Rasii abychodzić sankcyi, i biez taho nie na 100 adsotkaŭ pierakryvaje straty ad aficyjnaha sychodu z Rasii.

«Pieraprodaž tavaraŭ praź firmy-prakładki, jak i składanaści z łahistykaj, adbivajucca na canie tavaru. Tamu niekatoryja pazicyi sapraŭdy zamianili kitajskimi abo inšymi anałahami, a popyt na inšyja praz bolš vysoki košt mienšaje», — tłumačyć surazmoŭca.

Śpiecyjalist ličyć, što novyja abmiežavańni ŭ niejkaj stupieni sapraŭdy ŭskładniać žyćcio Rasii, bo častka starych schiem bolš nie pracuje, a na naładžvańnie novych spatrebicca peŭny čas.

«Naša Niva» — bastyjon biełaruščyny

PADTRYMAĆ

Čytajcie taksama:

Polšča pierastała vypuskać u Biełaruś luksavyja aŭto pa prośbie Łatuški?

Pierahonščyki luksavych aŭto znajšli novy maršrut, kab dastaŭlać sankcyjonku ŭ Rasiju ŭ abychod Biełarusi

Daniła Łuckievič

Chočaš padzialicca važnaj infarmacyjaj
ananimna i kanfidencyjna?

Клас
18
Панылы сорам
3
Ха-ха
2
Ого
5
Сумна
6
Абуральна
15
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera
PNSRČCPTSBND
12345
6789101112
13141516171819
20212223242526
2728293031