Šmatdzietny baćka, biespracoŭny, prychilnik telehram-prapaviednikaŭ i niaspraŭdžany barbier. Što viadoma pra abvinavačanych u stralaninie ŭ «Krokusie»
Basmanny sud Maskvy aryštavaŭ na dva miesiacy padazravanych u ździajśnieńni teraktu ŭ zabaŭlalnym centry «Krokus Sici Choł» čatyroch hramadzian Tadžykistana. Padčas sudovaha pasiadžeńnia ŭsie jany byli sa śladami źbićcia i katavańniaŭ, adzin u kreśle-katałcy. Resurs «Vot tak» sabraŭ usiu infarmacyju, viadomuju pra kožnaha z padazravanych da hetaha momantu.
Dalardžon Mirzojeŭ u Basmannym sudzie ŭ Maskvie. Rasija, 24 sakavika 2024 hoda. Fota: AP Photo/Alexander Zemlianichenko
Mirzojeŭ — najstarejšy siarod ich i, jak śćviardžajuć rasijskija ŚMI, lidar terarystyčnaj jačejki, jakaja napała na «Krokus Sici Choł». Prapahandystka Marharyta Simańjan nazvała jaho «vierchavodam vuparaŭ».
Mirzojeŭ naradziŭsia 23 listapada 1991 hoda, jamu 32 hady. U mužčyny vialikaja siamja — žonka i čaćviora dziaciej (starejšaje dzicia 2017 hoda naradžeńnia, małodšym dvajniatkam — tolki paŭtara hoda).
Miarkujučy pa paviedamleńniach RT, jaki śćviardžaje, što Mirzojeŭ — parušalnik mihracyjnaha zakanadaŭstva RF ź vialikim stažam, na terytoryi Rasii ź nievialikimi pierapynkami toj znachodziŭsia jak minimum z 2011 hoda. Trynaccać hadoŭ tamu hramadzianin Tadžykistana byŭ upieršyniu zatrymany za znachodžańnie na terytoryi Rasii biez naležnych dakumientaŭ, adnak paźbieh departacyi, źbiehšy z centra časovaha ŭtrymańnia. U nastupnyja hady jon jašče niekalki razoŭ pryciahvaŭ da siabie ŭvahu milicyi — usio pa tych ža pryčynach.
Pry hetym, niahledziačy na takoje doŭhaje znachodžańnie na terytoryi Rasii, Mirzojeŭ, miarkujučy pa ŭsim, vałodaje rasiejskaj movaj vielmi słaba, a padčas sudovaha pasiadžeńnia mieŭ znosiny vyklučna praź pierakładčyka.
U momant ździajśnieńnia teraktu apošniaja časovaja rehistracyja Mirzojeva na terytoryi Rasii, vydadzienaja ŭ Novasibirsku terminam na try miesiacy, minuła. Faktyčna jon u čarhovy raz znachodziŭsia na terytoryi krainy nielehalna.
Padčas dopytu sam Mirzojeŭ paviedamiŭ, što ŭ Rasii padpracoŭvaŭ taksistam, a prykładna za 10-12 dzion da napadu paznajomiŭsia ŭ telehramie z čałaviekam pa imieni Abduła. Žurnalisty «Važnych historyj» ličać, što apošni całkam moh być arhanizataram teraktu, a jahonaje sapraŭdnaje imia — Abduła Buryjeŭ, jon maje hramadzianstva Tadžykistana i, mahčyma, Rasii.
Buryjeŭ, jak miarkujecca, byŭ suarhanizataram teraktu 28 studzienia 2024 hoda ŭ Stambule, jaki pryvioŭ da hibieli adnaho čałavieka, adkaznaść za jaki ŭziała «Isłamskaja dziaržava» (ID) «Viłajat Charasan», jaki bazujecca ŭ Afhanistanie. Etničnyja tadžyki ličacca adnymi z najbolš ahresiŭnych i daśviedčanych jaho bajevikoŭ.
Jak miarkujecca, Mirzojeŭ nie tolki stralaŭ pa naviedvalnikach zabaŭlalnaha centra ŭ Krasnahorsku, ale i raspraŭlaŭsia z paranienymi. Na videa z «Krokusa», apublikavanym blizkim da «Isłamskaj dziaržavy» ahienctvam, čałaviek, apranuty hetak sama, jak Mirzojeŭ, pierarezaŭ horła mužčynu, jaki ź ciažkimi ranieńniami lažaŭ na padłozie na pieršym paviersie «Krokus Sici Choł». Heta adbyłosia ŭ toj momant, kali terarysty ŭžo pakidali zabaŭlalny kompleks.
Rasijskija siłaviki nie publikavali videa momantu zatrymańnia Mirzojeva, a taksama nie pakazvali, jakija miery fizičnaha ŭździejańnia ŭžyvalisia ŭ dačynieńni da jaho. Adnak u sudzie na tvary mužčyny byli bačnyja ślady źbićcia, a na šyi — ślady płastykavaha pakieta. Vierahodna, paśla zatrymańnia jaho dušyli.
Saidakrami Muradali Račabalizoda u Basmannym sudzie ŭ Maskvie. 24 sakavika 2024 hoda. Fota: AP Photo/Alexander Zemlianichenko
Račabalizoda naradziŭsia 4 lutaha 1994 hoda ŭ Tadžykistanie. Jak i Mirzojeŭ, pa śćviardžeńni prapahandysckaha resursu RT, jon mieŭ prablemy ź mihracyjnym zakanadaŭstvam. Śćviardžajecca, što jak minimum adzin raz, u 2018 hodzie, padazravany va ŭčynieńni teraktu byŭ aštrafavany za pieravyšeńnie dapuščalnaha terminu znachodžańnia ŭ Rasii.
U momant napadu na «Krokus Sici Choł» Račabalizoda byŭ zarehistravany ŭ Padolsku, nidzie nie pracavaŭ. Na ŭtrymańni mužčyny — žonka i adno dzicia. Abvinavačany ŭ terarystyčnym akcie taksama śćviardžaje, što viedaje rasiejskuju movu vielmi słaba.
Pavodle viersii śledstva, padčas napadu na zabaŭlalny kompleks u Krasnahorsku Račabalizoda stralaŭ pa naviedvalnikach z aŭtamata. Na apublikavanych u sacsietkach videazapisach padobny da jaho čałaviek dabivaŭ ź blizkaj adlehłaści tych, chto ŭžo ŭpaŭ na padłohu — vidavočna, paranienych ludziej.
Zatrymańnie Račabalizody było samym žorstkim. Na videa, jakoje raspaŭsiudziłasia ŭ sacsietkach, jak miarkujecca, siłaviki pavalili jaho na ziamlu, a zatym, abiezruchomiŭšy, adrezali častku vucha, jakuju zatym zasunuli zatrymanamu ŭ rot, prymušajučy jeści.
Bajavik dyviersijna-raźviedvalnaj šturmavoj hrupy (DŠRH) «Rusič», jakaja ciapier vajuje va Ukrainie, što maje pazyŭny «Tapaz», zajaviŭ pra namier pradać nož-«vucharez» z aŭkcyjonu. Užo na nastupny dzień jahony košt pieravysiŭ 10 młn rasijskich rubloŭ (100 tys. dalaraŭ ZŠA).
U sudzie Račabalizoda źjaviŭsia z masiŭnaj paviazkaj na pravym vuchu, častka jakoha była adrezanaja. Na jaho tvary taksama prykmietnyja ślady źbićcia.
Šamsidzin Faryduni ŭ Basmannym sudzie ŭ Maskvie. 24 sakavika 2024 hoda. Fota: AP Photo/Alexander Zemlianichenko
Hramadzianin Tadžykistana Faryduni, jaki naradziŭsia 17 vieraśnia 1998 hoda, u adroźnieńnie ad dvuch svaich starejšych tavaryšaŭ, prablem z rehistracyjaj u Rasii nie mieŭ. Jon byŭ prapisany ŭ Krasnahorsku i mieŭ aficyjnuju pracu — na fabrycy ŭ Padolsku. Faryduni žanaty, maje na ŭtrymańni žonku i vaśmimiesiačnaje dzicia.
Faryduni akazaŭsia samym havarkim z čatyroch zatrymanych hramadzian Tadžykistana. Padčas pieršaha ž dopytu praź imhnieńni paśla aryštu ŭ Branskaj vobłaści jon, uvieś dryžučy, raskazaŭ pra niuansy padrychtoŭki da teraktu: na jaho vyjšaŭ praz telehram niejki «pamočnik prapaviednika», jaki prapanavaŭ ździejśnić masavaje zabojstva, zabiaśpiečyŭ zbrojaj i zapłaciŭ paŭmiljona rasijskich rubloŭ. Padrychtoŭka da napadu praciahvałasia kala miesiaca.
Rychtujučysia da teraktu, Faryduni i samy małodšy člen hrupoŭki Muchamadsabir Fajzaŭ jak minimum piać razoŭ naviedvali «Krokus Sici Choł» na praciahu dvuch tydniaŭ, jakija papiaredničali rasstrełam. Telehram-kanał Shot ličyć, što terarystami kiravaŭ mienavita Faryduni. Jak śćviardžajecca, jon kantaktavaŭ z zakazčykami teraktu niepasredna ŭ Turcyi, kudy vyjazdžaŭ u lutym 2024 hoda.
Faryduni davoli aktyŭna vioŭ akaŭnt u instahramie, jaki i paćvierdziŭ jahony vizit u Turcyju niezadoŭha da teraktu ŭ Padmaskoŭi. 23 lutaha jon vykłaŭ u instahram adrazu vosiem fotazdymkaŭ, zroblenych pobač sa stambulskaj miačećciu Facich.
Na raźmieščanych u sacsietkach videa masavaha rasstrełu naviedvalnikaŭ zabaŭlalnaha centra padobny da Faryduni teraryst viadzie ahoń z aŭtamata.
U sacsietkach 24 sakavika źjaviłasia fatahrafija Faryduni, jaki lažaŭ na padłozie sa spuščanymi štanami. Da jaho hienitalij padviedzienyja draty ad telefonnaha aparata TA-57, jaki vykarystoŭvajecca vajskoŭcami. Razrady elektryčnaści, jakija prachodziać pa pravadach, mohuć dasiahać napružańnia 80 volt, a pakuty možna ŭzmacniać, palivajučy čałavieka vadoj.
Na apošnich fota z suda ŭ Faryduni mocna raspuchłaja levaja ščaka i siniaki na tvary, jakich nie było na pieršych videa jaho zatrymańnia i fota z katavańniami elektryčnym tokam. Vierahodna, u jaho złamanaja skivica.
Muchamadsabir Fajzaŭ u Basmannym sudzie ŭ Maskvie. 24 sakavika 2024 hoda. Fota: AP Photo/Alexander Zemlianichenko
Fajzaŭ — samy małady ź mierkavanych udzielnikaŭ masavaha rasstrełu naviedvalnikaŭ «Krokus Sici Choł». Jon naradziŭsia 20 maja 2004 hoda. Takim čynam, u momant ździajśnieńnia teraktu jamu nie spoŭniłasia jašče i 20 hadoŭ. Abzavieścisia siamjoj i dziećmi małady čałaviek jašče nie paśpieŭ.
Prablem z zakonam Fajzaŭ nie mieŭ, rasiejskaj movaj, pa słovach jaho klijentaŭ, karystaŭsia svabodna, adnak na kadrach dopytu pa-rasiejsku nie havaryŭ, mieŭ znosiny vyklučna praź pierakładčyka. Z kanca 2023 hoda Fajzaŭ pracavaŭ cyrulnikam — spačatku ŭ Ivanavie, zatym u horadzie Tejkava Ivanaŭskaj vobłaści. Adnak u studzieni 2024 hoda zvolniŭsia i z taho času, vidavočna, zastavaŭsia biez pracy.
Samy małady z čaćviorki mierkavanych terarystaŭ akazaŭsia samym aktyŭnym karystalnikam sacsietak. U jaho jak minimum dva akaŭnty va «VKontaktie». Samy stary ź ich jon vioŭ jak minimum z 2016 hoda. Bolšaja častka malunkaŭ u jahonaj halerei ŭžo niedastupnaja. Na zachavanych — vyviedzienyja arabskaj viaźziu kalihrafičnyja nadpisy i pryznańni ŭ lubovi da Ałacha. Na adnym sa zdymkaŭ jon pieramalavaŭ tekst sa ściaha ID. Nadpis abviaščaje: «Niama Boha, akramia Ałacha».
U novym akaŭncie Fajzaŭ — sučasny małady čałaviek z usimi atrybutami paśpiachovaha žyćcia. Jon fatahrafujecca ŭ modnaj vopratcy, pazirujučy z ajfonam. Na inšych zdymkach paziruje na pracoŭnym miescy, u spartzale, pobač z darahimi aŭtamabilami.
Muchamadsabir Fajzaŭ. Fota: Muchamad Fajzoda / Vkontaktie
Na apublikavanym «Isłamskaj dziaržavaj» videazapisie frahmienty adzieńnia apieratara, jaki zdymaŭ napad, supadajuć z adzieńniem, u jakim zatrymali Fajzava.
Padčas zatrymańnia Fajzaŭ paciarpieŭ bolš za ŭsich. Jon znachodziŭsia za rulom mašyny, u jakoj mierkavanyja terarysty ŭciakli ź miesca złačynstva. Padčas pierastrełki jon atrymaŭ ciažkaje ranieńnie, mocna paciarpieła jahonaje levaje voka.
Telehram-kanał SHOT 23 sakavika raźmiaściŭ videa dopytu Fajzava ŭ balnicy, kudy jon byŭ dastaŭleny paśla zatrymańnia. Małady čałaviek siadzieŭ na balničnym łožku sa źviazanymi za śpinaj rukami, razmaŭlaŭ praź pierakładčyka. Na nastupny dzień u sud jaho pryvieźli ŭ kreśle-katałcy ŭ balničnym adzieńni.
Telehram-kanał IvanovoNEWS 24 sakavika napisaŭ pra pahrozy, jakija pastupajuć na adras haspadyni barbieršopa ŭ horadzie Tejkava, apošniaha miesca pracy Fajzava. Pavodle jaje słoŭ, vakoł ustanovy chodziać «natoŭpy ahresiŭnych mužčyn», a nieviadomyja pahražajuć spalić barbieršop. U vyniku budynak vymušana ŭziała pad achovu palicyja.
Usim čaćviarym sud vystaviŭ abvinavačvańni pa artykule 205 «Terarystyčny akt» Kryminalnaha kodeksa Rasijskaj Fiederacyi (KK RF) i adpraviŭ pad vartu da 22 maja 2024 hoda. Pakarańnie, praduhledžanaje hetym artykułam, — ad 10 da 20 hadoŭ pazbaŭleńnia voli albo pažyćciovaje źniavoleńnie.
Čytajcie taksama:
Pa spravie ab terakcie ŭ «Krokusie» zatrymali jašče troch čałaviek — heta byŭ ich «Reno»
Adzin z zatrymanych za terakt byŭ u «Krokusie» jašče 7 sakavika
Čamu terarystam dali ŭciačy da branskich lasoŭ? Voś što prydumali ŭ apraŭdańnie siłavikoŭ
