Znajści
Ałharytmičny łacinski varyjant
05.12.2023 / 12:36RusŁacBieł

Ad 1000 dalaraŭ za «kvadrat». Kolki kaštujuć kvatery ŭ novych ŽK Minska

Pahladzieli, pa jakich cenach pradajuć žyllo zabudoŭščyki ŭ novych staličnych žyllovych kompleksach. U mnohich damy jašče nie zdadzieny. Jość i luksavyja varyjanty.

Levada

U ŽK «Levada» pradajucca kvatery jak u niezavieršanych, tak i va ŭžo pabudavanych damach. U pieršym vypadku košt «kvadrata» vahajecca ŭ miežach 1380-1700 dalaraŭ. Ale jość i bolš darahija varyjanty.

ŽK «Levada». Fota: skrynšot z sajta levada-b-h.by

Tak, naprykład, u domie, jaki staić u pieršaj linii ŭzdoŭž Śvisłačy, u prodažy zastalisia tolki trochpakajoŭki płoščaj 80-88 m² pa $2600 za «kvadrat», a taksama čatyrochpakajovyja płoščaj ad 99 da 141 m² (tam cana składaje ad 2600 da 2800 dalaraŭ za mietr).

Maestra

Žyllovy kompleks mieścicca pa adrasie vuł. Niamiha, 46. U krokavaj dasiažnaści znachodzicca stancyja mietro Płošča Bahuševiča. Zdača abjekta zapłanavana na pieršy kvartał 2024 hoda. 

Vizualizacyja ŽK «Maestro». Fota: realt.by

Hety ŽK zaniaŭ pieršaje miesca na fiestyvali Biełaruskaha sajuza architektaraŭ u naminacyi «Žyłyja šmatpaviarchovyja damy».

U 20-paviarchovikach pradajuć kvatery ahulnaj płoščaj ad 50 da 250 m². 

Samaja tannaja z kvater — adnapakajoŭka płoščaj 50 «kvadrataŭ». Kaštuje jana 116 tysiač dalaraŭ, što kala $2300 za mietr. A voś za čatyrochpakajovuju kvateru na 18-m paviersie z ahulnaj płoščaj 250 m² daviadziecca vykłaści $877 310 (ci pa $3500 za «kvadrat»).

Park Čaluskincaŭ

Amal try sotni kvater zastajucca ŭ prodažy ŭ ŽK «Park Čaluskincaŭ». U zaležnaści ad płoščy, košt «kvadrata» vahajecca ad 1425 da 1600 jeŭra (na sajcie pradaŭca ceny paznačany ŭ hetaj valucie). 

Vid na ŽK «Park Čaluskincaŭ». Fota: skrynšot z sajta bir.by

Samaja maleńkaja kvatera — adnapakajoŭka na 38 m² za 60 tysiač jeŭra. Trochpakajoŭki płoščaj 78 m² pradajucca za 111 tysiač jeŭra.

Kvartał na Hrušaŭcy

Žyły kompleks składajecca z šaści šmatpaviarchovych damoŭ i dvuch nadziemnych parkinhaŭ na 600 mašyna-miescaŭ. Mieścicca jon u 100 mietrach ad stancyi mietro «Hrušaŭka». Adzin z šaści damoŭ užo ŭviedzieny ŭ ekspłuatacyju.

Vizualizacyja ŽK «Kvartał na Hrušaŭcy». Fota: prometr.by

Košt «mietraŭ» vahajecca ŭ miežach 1200-1480 dalaraŭ. Ceny na dvuchpakajoŭki pačynajucca z $59 500 za 49 m². Tańniej tolki adnapakajovyja kvatery płoščaj 46 «kvadrataŭ», jany pradajucca pa $55 600 ci pa $1200 za mietr. 

Utulny

U ŽK «Utulny» pradajecca 84 kvatery. Kvartał mieścicca ŭ miežach vulic Padlesnaj — Parnikovaj — Dačnaha prajezdu.

Bolš za pałova kvater u prodažy (44 štuki) — heta dvuchpakajoŭki. Samaja tannaja ź ich — ahulnaj płoščaj 69 m², jana kaštuje 243 355 rubloŭ (kala $78 000), heta pa 3500 rubloŭ (kala $1120) za «kvadrat». 

Vizualizacyja ŽK «Utulny». Fota: uyutnyi.by

Samaja darahaja kvatera va «Utulnym» — čatyrochpakajoŭka płoščaj 135 m². Jana kaštuje 607 tysiač rubloŭ (kala $194 000), ci pa 4500 rubloŭ (kala $1440) za «kvadrat».

Viaršynia

U mikrarajonie Sucharava ŭzvodziać ŽK «Viaršynia». Prodažy startavali naprykancy minułaha miesiaca, cana «kvadrata» pačynałasia z 1100 dalaraŭ.

Tak vyhladaŭ praces budaŭnictva ŽK «Viaršynia» ŭ kancy listapada 2023 hoda. Fota: realt.by

Žyły kompleks budzie składacca z 8 damoŭ vyšynioj ad 12 da 22 pavierchaŭ. Pieršaja čarha naličvaje try damy. Zdača pieršych damoŭ zapłanavana na druhi kvartał 2024 hoda. 

Hrand Avieniu

Žyły kompleks «Hrand Avieniu» składajecca z čatyroch 20-paviarchovych damoŭ. Uvod u ekspłuatacyju pieršaj «śviečki» zapłanavany na pieršy kvartał 2024 hoda. 

Budaŭnictva ŽK «Hrand Avieniu». Fota: skrynšot z sajta grandavenue.by

Kvartał źjavicca na skryžavańni praśpiekta Dziaržynskaha i vulicy Ščorsa. U šmatpaviarchovikach buduć kvatery płoščaj ad 40 m² (adnapakajoŭki) da 140 m² (dvuchuzroŭnievyja). Płošča dvuchpakajovak vahajecca ad 55 da 70 m², trochpakajovak — ad 80 da 98 m².

Ceny na «mietr» u «Hrand Avieniu» pačynajucca z 3410 rubloŭ (kala $1090) i dachodziać da 4692 rubloŭ (kala $1500).

Harmonija

ŽK «Harmonija» — kvartał na rahu vulic Rozy Luksiemburh i praśpiekta Žukava. Žyły kompleks składajecca z 9-paviarchovaha 5-siekcyjnaha doma na 270 kvater i asobnaha parkinha na 300 mašynamiescaŭ. Košt «kvadrata» pačynajecca z 1050 dalaraŭ (takija rascenki ŭ troch– i čatyrochpakajoŭkach). Mietr u dvuchpakajoŭkach kaštuje 1300 dalaraŭ. Pa 1000 dalaraŭ za m² pradajuć trochpakajovyja kvatery na pieršym paviersie.

Budaŭnictva ŽK «Harmonija». Fota: telehram-kanał «Litovskaja o žilje»

Pieršyja dźvie siekcyi ŭžo ŭviedzieny ŭ ekspłuatacyju. Uvod apošniaj, piataj, siekcyi zapłanavany na čaćviorty kvartał 2024 hoda.

Minski kvartał

Kvatery ŭ ŽK «Minski kvartał», jaki jašče budujecca, pradajuć pa cenach ad 1220 dalaraŭ — heta kali trochpakajoŭka. «Kvadrat» u dvuchpakajoŭkach kaštuje $1350. Zabudoŭščyk prapanoŭvaje dvuchpakajovyja kvatery płoščaj 43 m² pa 1350 dalaraŭ za mietr.

Budaŭnictva doma ŭ ŽK «Minski kvartał», 4 śniežnia 2023 hoda. Fota: airon.by

Mietr u adnapakajoŭkach tradycyjna sama darahi — 1620 dalaraŭ. Tamu kvatera płoščaj 27 m² abydziecca ŭ 44 tysiačy dalaraŭ. Trochpakajoŭka na 72 m² u «Minskim kvartale» kaštuje kala 88 tysiač dalaraŭ.

Depo

Niepadalok ad płoščy Pieramohi praciahvajecca budaŭnictva elitnaha ŽK DEPO. Kvatery pradajucca jak u hatovych damach, tak i tych, što jašče budujucca.

«Kvadrat» u hatovych kvaterach kaštuje ad $3600 da $4160. U damach, jakija tolki ŭzvodziacca, kvateru možna nabyć pa cenach ad $2750 da $3350 za m².

Vid na ŽK «Depo». Fota: kvartaldepo.by

Samaja tannaja kvatera ŭ ŽK «Depo» — dvuchpakajoŭka na 50,5 m². Pradajuć jaje ŭ domie, jaki jašče dabudoŭvajuć. Košt — 164 tysiačy dalaraŭ. Samaja darahaja kvatera — hatovaja piacipakajoŭka płoščaj 222 m² za $1 222 700.

*Paznačanyja ceny ad zabudoŭščykaŭ aktualnyja pry apłacie 100% koštu žytła.

Čytajcie taksama: 

Kvatery na vulicy Karła Marksa ŭ Minsku. Ad savieckaści da ramontu ŭ sučasnym styli

«Tut niama ludskich kram». Jak žyviecca na paŭvostravie la Śvisłačy ŭ centry Minska

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
Панылы сорам
Ха-ха
Ого
Сумна
Абуральна
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera
PNSRČCPTSBND
123
45678910
11121314151617
18192021222324
25262728293031