Jak vyhladajuć biełaruskija adnahodki samaha seksualnaha mužčyny 2023 hoda Patryka Dempsi
Samym seksualnym mužčynam 2023 hoda, pa viersii amierykanskaha časopisa People, staŭ hieroj papularnaha sieryjała «Anatomija žarści» 57-hadovy akcior Patryk Dempsi. «Naša Niva» vyrašyła pahladzieć, jak vyhladajuć jahonyja viadomyja adnahodki ŭ našaj krainie. Što nosiać i čym zajmajucca biełaruskija mužčyny, jakim u hetym hodzie spoŭniłasia 57.
Patryk Dempsi, Uładzimir Kałtovič, Alaksandr Cencier, Ivan Cierciel. Kałaž «Našaj Nivy»
Amal jak Styŭ Džobs
Ekanamist i kandydat u prezidenty Biełarusi na vybarach 2010 hoda Jarasłaŭ Ramančuk sočyć za fihuraj i vyhladaje padciahnutym. U styli palityk addaje pieravahu raźniavolenym vobrazam z prostymi śvitšotami.
Fota: sacyjalnyja sietki palityka
Časam Ramančuka možna ŭbačyć u čornaj kašuli, da jakoj jon padbiraje pramyja ciomna-sinija džynsy i krasoŭki. Vobraz atrymlivajecca padkreślena prostym — amal jak u Styva Džobsa.
Były amapaviec
Try hady tamu, z nahody novaha pryznačeńnia, były ministr unutranych spraŭ Juryj Karajeŭ źmianiŭ styl: jon admoviŭsia ad milicejskaj formy na karyść cyvilnaha adzieńnia. U roli inśpiektara pa Hrodzienskaj vobłaści Karajeŭ pačaŭ nasić čornyja i ciomna-šeryja kaściumy. Razbaŭlajuć strohija łuki čyrvonyja halštuki, jakija stali nieadjemnaj častkaj jaho imidžu.
Fota: BiełTA
U adroźnieńnie ad mnohich svaich kaleh, čynoŭnik nosić aksiesuary ajčynnaj vytvorčaści. Na jaho ruce my zaŭvažyli hadzińnik ad Minskaha zavoda «Pramień».
Pieršaj spravaj — samaloty
U 2021-m Alaksandr Cencier pakinuŭ pasadu staršyni nahladalnaj rady hrupy kampanij «A-100» i skancentravaŭsia na inviestycyjach za miažoj. Ciapier biznesmien raźvivaje sietku stancyj padzaradki dla elektrakaraŭ u Jeŭropie.
Fota: «Kamsamolskaja praŭda»
Cencier zajmajecca avijasportam: jon šmat piłatuje sam i navat uznačalvaŭ profilnuju fiederacyju. Taksama biznesmien zachaplajecca rovarnym sportam. U adnym ź intervju jon pryznaŭsia, što addaje pieravahu dvuchkołavamu transpartu i pry luboj mahčymaści jeździć na rovary na pracu.
Fota: instahram biznesmiena
Styl Alaksandra adpaviadaje jaho chobi — adzin z samych zamožnych biełarusaŭ časta vybiraje spartovyja łuki: džynsy i cišotki.
Modny baradač
Namieśnik kiraŭnika aparata Saŭmina Uładzimir Kałtovič pa pravie zajmaje miesca siarod samych dobra apranutych palitykaŭ Biełarusi. Funkcyjanier z hustam padbiraje kaściumy, nadaje ŭvahu halštukam, a ŭ minułym niaredka nasiŭ vyšyvanki.
Fota: BiełTA
Niadaŭna imidž Kałtoviča źmianiŭsia — palityk adhadavaŭ modnuju baradu.
Fota: sacsietki palityka
Nie čałaviek kaściuma
Ivan Cierciel — staršynia KDB, udzielnik naziralnaj rady «Naftana» — pa abaviazku słužby vymušany nasić kaściumy. Darečy, padabrany jany niadrenna: u adzieńnia aktualny kroj, halštuki harmanirujuć z koleram kaściuma, manžety kašuli vyhladajuć z-pad rukava pinžaka na naležnyja dva santymietry.
Fota: BiełTA
Ale navat samy modny harnitur nie pasuje Ivanu — zvykłaja vajennaja forma hladzicca na im kudy bolš arhanična. Čamu niekatorym mužčynam nie pasujuć kaściumy, my rastłumačyli na prykładzie Ryhora Azaronka.
Fota: BiełTA
Dramatyčny chłopiec
Sienatar Anatol Isačanka lubić dramatyčnyja fota. To jon z rašučaściu trymaje ŭ kułaku žmieniu sabranaha ŭradžaju, to schilajecca nad žytam, to, niby hieroj savieckaj kinastužki, paziruje ŭ zaraśnikach kustoŭja.
Fota: sacsietki palityka
Fota: sacsietki palityka
Fota: sacsietki palityka
Ale, akramia pastanovačnych kadraŭ, u sacyjalnych sietkach palityka jość i inšyja cikavyja fota. Na ich jon čaściej za ŭsio adziety ŭ harnitury.
Fota: sacsietki palityka
Darečy, kłasičnyja dvojki dobra hladziacca na vysokim i strojnym čynoŭniku. Cikava, što Isačanka addaje pieravahu nie zvykłamu šeramu i čornamu adzieńniu, a vybiraje bolš cikavyja kolery — naprykład, ciomna-bardovy.
Čynoŭnik-aptymist
Ministra ekanomiki Alaksandra Čarviakova nazyvajuć «adnym z hałoŭnych aptymistaŭ va ŭradzie». Čynoŭnik daje aściarožnyja prahnozy pa inflacyi i nie raz chvaliŭsia ŚMI hetak zvanym «ekspartnym manieŭram».
Fota: BiełTA
Jak u mnohich kaleh pa cechu, kaściak jaho harderoba składajuć kłasičnyja sinija kaściumy, jakija Alaksandr dapaŭniaje akcentnymi halštukami.
Fota: Ministerstva ekanomiki
Pinžaki ŭ kletku
Na svaich staronkach u sacyjalnych sietkach staršynia Fiederacyi prafsajuzaŭ Biełarusi Michaił Orda časta łaje sankcyi i chvalić Łukašenku. A niadaŭna jon źviartaŭsia da Fiederalnaha kanclera Hiermanii Ołafa Šolca z prośbaj nie pravakavać treciuju suśvietnuju vajnu.
Fota: sacsietki palityka
Z masy biełaruskich palitykaŭ Ordu adroźnivaje nie tolki aktyŭnaje karystańnie sacyjalnymi sietkami, ale i styl adzieńnia. Funkcyjanier lubić halštuki ź jarkim pryntam i kalarovyja pinžaki: u jaho kalekcyi jość fijaletyvyja i klatčastyja.
Fota: sacsietki palityka
Aliharch na bajku
Fatahrafij biełaruskaha aliharcha Alaksieja Aleksina ŭ adkrytym dostupie nie šmat. Na tych, što jość, biznesmien, jaki z 2019 hoda pa rasparadžeńni Łukašenka atrymaŭ vyklučnaje prava na impart tytuniovaj syraviny, adziety ŭ ciomna-sinija harnitury.
Fota: Tut.by
Cikavaja detal: Aleksin dazvalaje sabie adyści ad ahulnapryniatych normaŭ dres-kodu. Na naradach jon źjaŭlaŭsia biez halštuka i rasšpilvaŭ huziki kašuli. Takija pavodziny havorać, što čałaviek ujaŭlaje siabie haspadarom situacyi i adčuvaje siabie volna.
Alaksin zachaplajecca motasportam. Biznesmien źjaŭlajecca členam elitnaha bajk-kłuba Iron Birds, jaki naviedvaje i starejšy syn Łukašenki — Viktar.
Aŭtar-piesieńnik
Paet Aleś Badak na pačatku 1990-ch napisaŭ šmat piesień. Na jaho vieršy składali pieśni Anatol Jarmolenka, Alesia, Alaksandr Saładucha.
Fota: SB
Taksama viadomy jak aŭtar prozy i tvoraŭ dla dziaciej. Jon źjaŭlajecca adnym z arhanizataraŭ kłuba dziciačych piśmieńnikaŭ. Byŭ redaktaram u časopisach «Biarozka», «Nioman», «Maładość», «Połymia».
U 2022 hodzie Aleś Badak atrymaŭ Nacyjanalnuju litaraturnuju premiju ŭ katehoryi «Najlepšy tvor paezii».
Čorny totałłuk
Alaksandr Zinhman — biznesmien i hanarovy konsuł Zimbabve ŭ Biełarusi. Bolš za 20 hadoŭ pradprymalnik pracuje na afrykanskim kantyniencie. Aficyjna Zihnhman, jakoha ličać blizkim da Viktara Šejmana, zajmajecca prajektami ŭ śfierach sielskaj haspadarki, łahistyki, hornazdabyŭnoj pramysłovaści, infrastrukturnym budaŭnictvam. Adnak jon rehularna traplaje ŭ skandały, źviazanyja ź nieprazrystymi ŭhodami z uradami afrykanskich krain.
Fota: Bielinterekspa, Zinhman krajni sprava
Admietnaja rysa stylu Zinhmana — luboŭ da čornaha koleru. Čaściej za ŭsio jaho možna ŭbačyć u dvojcy «čorny pinžak i čornaja majka». Na aficyjnych sustrečach majka zamianiajecca na kašulu — taksama čornuju.
Fota: Vikipiedyja
Fota: president.gov.by
Futbolny trenier
Svaju karjeru trenier Aleh Konanaŭ pačaŭ u minskim futbolnym kłubie «Tarpieda». Siońnia na rachunku spartoŭca praca i ŭ inšych znakamitych kamandach. Naprykład, z 2018 pa 2019 hod jon treniravaŭ maskoŭski «Spartak».
Fota: championat.com
Praŭda, zaŭziatary kłuba časta paciašalisia sa śpiecyjalista i navat dali jamu niekalki mianušak, samaja łaskavaja ź jakich — «Pinžak». I, sapraŭdy, mužčyna lubić hety pradmiet harderoba i časta źjaŭlajecca ŭ im pierad kamierami.
Mastak ź biznesam
Mastak Juryj Barysievič viadomy nie tolki svaimi karcinami. U partfolia metra jość i inšyja, nie mienš cikavyja prajekty. Barysievič źjaŭlajecca ŭładalnikam siamiejnaj majsterni, jakaja zajmajecca raspracoŭkaj prajektaŭ vystavačnych paviljonaŭ i ich estetyčnym ukaranieńniem u prastoru.
Skryn telekanała «Biełaruś 1»
Akramia hetaha, u 2021 hodzie mastak stvaraŭ dekaracyi dla dziciačaha śviata «Hałoŭnaja jołka krainy».
«Naša Niva» — bastyjon biełaruščyny
PADTRYMAĆ
