Śledčyja ŭstanavili, što ŭ listapadzie 2022 hoda dvuch polskich fiermieraŭ zabiła ŭkrainskaja rakieta SPA — Rzeczpospolita
Rakieta, jakaja ŭpała ŭ polskim siale Pševodaŭ za siem kiłamietraŭ ad ukrainskaj miažy, była vypuščanaja ŭkrainskaj ustanoŭkaj SPA S-300. Ab hetym paviedamiła hazieta Rzeczpospolita sa spasyłkaj na śledčych prakuratury Polščy.
Śledčyja pracujuć na miescy trahiedyi. Fota: polskaja palicyja
Śledčyja ŭstanavili miesca, ź jakoha siły SPA Ukrainy zapuścili rakietu S-300 savieckaj vytvorčaści. Jany vyklučyli viersiju, što rakietu zapuściła Rasija, pakolki rasijskija vojski znachodzilisia daloka adtul. Akramia taho, śledčyja vyklučyli, što rakietu zapuścili ź Biełarusi.
Rakieta ŭpała na terytoryi Polščy 15 listapada 2022 h. padčas masiravanaha ŭdaru rasijskich vojskaŭ pa Ukrainie, u pryvatnaści, pa Lvoŭskaj vobłaści. Z-za padzieńnia rakiety zahinuli dva polskija fiermiery.
Krynicy Rzeczpospolita adznačyli, što siły SPA Ukrainy zapuskali zienitnyja rakiety parami dla pavyšeńnia efiektyŭnaści — adna rakieta patrapiła ŭ cel, a inšaja praciahnuła palot «uchałastuju». Surazmoŭca vydańnia zaznačyŭ, što na peŭnaj vyšyni ŭnutranyja miechanizmy rakiety mielisia jaje źniščyć, ale ź nieviadomaj pryčyny hetaha nie adbyłosia.
Pres-sakratar Hienieralnaj prakuratury Polščy Łukaš Łapčynski skazaŭ u kamientary Rzeczpospolita, što «na ciapierašnim etapie śledčyja dziejańni na polskaj terytoryi vyčarpanyja». «My nakiravali zapyt ab pravavoj dapamozie Ukrainie i čakajem adkaz», — skazaŭ pradstaŭnik viedamstva.
Pa infarmacyi vydańnia, Ukraina nie supracoŭničała z polskim śledstvam i nie padała nijakich materyjałaŭ.
Pieršapačatkova mierkavałasia, što rakietu, jakaja ŭpała ŭ Polščy, zapuściła Rasija. Ale nieŭzabavie krainy Zachadu dajšli da vysnovy, što, chutčej za ŭsio, heta była ŭkrainskaja rakieta supraćpavietranaj abarony. Prezident Ukrainy Uładzimir Zialenski spačatku kazaŭ, što pa Polščy ŭdaryła rasijskaja rakieta, a zatym pryznaŭ, što nie moža sa 100-pracentnaj upeŭnienaściu skazać, čyja heta rakieta.
Zachodnija lidary ličać, što kančatkovaja adkaznaść za incydent u Polščy ŭsio roŭna lažyć na Rasii, jakaja raźviazała vajnu va Ukrainie. U Kramli ŭ adkaz na heta kazali, što ZŠA i NATA — «pieršapryčyna ŭsiaho», što adbyłosia ŭ Polščy, nahadvaje «Mieduza».
