Vajskoŭcaŭ u Žłobinie asudzili da haŭptvachty za ŭdzieł u akcyjach pratestu ŭ 2020 hodzie
Sudździa Žłobinskaha rajonnaha suda Śviatłana Andrejeva za dva dni, 5 i 6 vieraśnia, vyniesła prysudy dvum vajskoŭcam, abvinavaciŭšy ich u arhanizacyi i padrychtoŭcy dziejańniaŭ, jakija hruba parušajuć hramadski paradak, albo aktyŭnym udziele ŭ ich (č. 1 art. 342 Kryminalnaha kodeksa), piša «Viasna».
Artur Pančanka słužyŭ pa kantrakcie na pasadzie staršaha pažarnaha vyratavalnika vajskovaj kamandy supraćpažarnaj abarony i avaryjna-vyratavalnych rabot u Žłobinie.
Pavodle materyjałaŭ abvinavačańnia, Artur Pančanka, «dziejničajučy sumiesna i ŭzhodniena ŭ hrupie asob prykładna z 21 hadziny 9 žniŭnia da 1 hadziny 30 chvilin 10 žniŭnia 2020 hoda, «stajaŭ na prajeznaj častcy aŭtamabilnaj darohi, pieraškadžajučy ruchu hramadskaha i inšaha transpartu, plaskaŭ u dałoni, vykrykvaŭ roznyja łozunhi, pry hetym admaŭlaŭsia ad vykanańnia zakonnych patrabavańniaŭ pradstaŭnikoŭ ułady».
U Žłobinie, jak śćviardžaje śledstva, u dzień vybaraŭ 9 žniŭnia 2020 hoda kala 22 hadzin u rajonie haradskoj płoščy sabrałasia bolš za 1000 čałaviek.
Sud pastanaviŭ pryznačyć Pančanku pakarańnie ŭ vyhladzie aryštu na try miesiacy. Termin adbyćcia pakarańnia ličyć z dnia nakiravańnia dla adbyćcia aryštu na haŭptvachtu vajskovaj kamiendatury.
Na druhi dzień, 6 vieraśnia, sudździa Andrejeva razhledzieła kryminalnuju spravu jašče adnaho vajskoŭca— 20-hadovaha Maksima Aŭsiańnikava.
Maksim prachodzić terminovuju słužbu ŭ vajskovaj čaści ŭ Barysavie. Sutnaść abvinavačańnia — anałahičnaja pieršamu sudu, i prysud napisany jak pad kapirku, paviedamlajuć pravaabaroncy.
Prysud — aryšt na termin try miesiacy na haŭptvachcie.
