«Treba sapsavać viečarynku». Prakopjeŭ nazvaŭ čatyry akny mahčymaściaŭ dla źmien u Biełarusi
Hramadski dziejač Vadzim Prakopjeŭ u vypusku jutub-kanała «Tok» vykazaŭsia pra mahčymyja varyjanty pieramien u Biełarusi.
Vadzim Prakopjeŭ ličyć, što paśpiachovaja realizacyja luboha scenaryja zaležyć ad najaŭnaści mocnaha palityčnaha centra i pazicyi Vašynhtona. Skrynšot videa TOK_talk / YouTube
Pa mierkavańni Vadzima Prakopjeva, pieršaje akno mahčymaściaŭ — heta pieramovy pamiž Ukrainaj i Rasijaj. Miescam ich praviadzieńnia moža być Stambuł ci Viena. A voś adnosna Minska ŭ jaho vialikija sumnieńni. Prakopjeŭ dapuskaje, što ŭ pieramovach moža brać udzieł Kitaj.
«Na hetych pieramovach niepaźbiežna budzie abmiarkoŭvacca bałans biaśpieki ŭ rehijonie. Biełaruskaja tema budzie padymacca, chutčej za ŭsio, nie ŭ pieršy i nie ŭ druhi dzień. Ale heta niepaźbiežna adbudziecca. Na hetych pieramovach nam nieabchodna miesca. Heta istotna zaležyć ad mahutnaściaŭ našaha lidarstva i ad centra siły, jaki tak i niedabudavany», — ličyć Prakopjeŭ.
Druhoje akno mahčymaściaŭ — vybarčaja kampanija 2025 hoda. «Łukašenka jaje raspłanavaŭ bolš-mienš. Ja ŭpeŭnieny, što jon da hetaj pary nie pryniaŭ rašeńnia, jełbasy jon ci nie jełbasy. Ale vidavočna, što jon zadumaŭ jaje pravieści cicha i biez zadzirynki».
«Heta hod vyznačalny, jak i ŭsiaki vybarčy cykł. Heta momant najbolšaj uraźlivaści dyktatarskaj sistemy», — dadaje Prakopjeŭ.
Treciaje akno mahčymaściaŭ — heta varyjant «śmierć Stalina»: fizičnaje paharšeńnie zdaroŭja Łukašenki, što pryvodzić da jaho śmierci. U zaležnaści ad źniešnich abstavin, jak ličyć Prakopjeŭ, hetaje akno maje roznaje vymiareńnie.
Čaćviortaje, i samaje važnaje na pohlad Prakopjeva, heta prychod novaj elity ŭ Kreml.
«Usie hetyja vokny mahčymaściaŭ, na moj amatarski analiz, praduhledžvajuć najaŭnaść mahutnaha palityčnaha centra na našym baku. Centra, jaki staić na niejkim fundamiencie, naprykład, na masavym ruchu, na masavaj palityčnaj partyi. Adhavorki pra toje, što heta niemahčyma zrabić, nie prymajucca. My ŭ stanie stvaryć masavy ruch elektronnym čynam. A siła i mahutnaść biełaruskaj emihracyi da siońnia niedaacenienaja. U mianie jość adčuvańnie, što Kabiniet naŭmysna ihnaruje siłu dyjaspary, bo nie choča być padspravazdačnym», —
vykazvaje svoj pohlad Prakopjeŭ i akcentuje ŭvahu na tym, što va ŭsie hetyja vokny mahčymaściaŭ možna ŭpisacca tolki pry dźviuch istotnych umovach. Pieršaja — najaŭnaść sapraŭdnaha palityčnaha centra — alternatyvy, pa mahčymaści masavaj i vielmi ŭpłyvovaj. Druhaja — «nieabchodna, kab Vašynhton razumieŭ našu rolu ŭ vialikim hieapalityčnym raskładzie».
Na pohlad Prakopjeva, razvažać pra scenaryi, jakija možna było b ažyćciavić, trochi zaŭčasna, bo
«jany mocna zaležać ad hieapalityčnaha kantekstu, asabliva kali ŭ nas tut rehijanalnaja vajna. Treba rychtavać roznyja scenary i demanstravać ich tolki blizka da hetaj daty. Całkam vidavočna, što ŭsio, što b my ni prydumali, pavinna ŭkładvacca ŭ formułu «treba sapsavać viečarynku».
Hladzicie całkam:
