«Čamu Kakabaj usio jašče isnuje?» Račyłoŭski napisaŭ publičny danos na papularnaha błohiera Kakabaja
Novaja zorka prapahandy Mikita Račyłoŭski, jaki paabiacaŭ pamierci za Łukašenku, zavioŭ telehram-kanał i napisaŭ publičny danos na hałoŭnaha fud-błohiera krainy Paŭła Kramara, viadomaha jak Kakabaj.
Mikita Račyłoŭski i Pavieł Kramar
Pavodle Račyłoŭskaha, Kakabaj u 2020 hodzie nibyta padtrymaŭ pratesty i navat, jak jon piša ŭ danosie, vystupaŭ «z krytykaj u adras našaha prezidenta».
«Paśla taho, jak pratesty spadajuć na ništo, jon chutka pieraabuvajecca, jak sapraŭdny pacuk, chavajecca pad plintus i robić vyhlad, jak i ŭsie astatnija zmahary, što ničoha nie było. Chodzić, jak biaskryŭdny Barsik, pa restaranach i kafe, nabivaje sabie žyvot, robić bieskarysnyja ahlady, razyhryvaje niejkija padarunki, uvachodzić u davier da zvyčajnych hramadzian, bolšaja častka jakich, na žal, navat i nie viedaje, chto taki Kakabaj», — davodzić Račyłoŭski.
Asablivaje abureńnie ŭ prapahandysta vyklikaje kałabaracyja adnaho z najpapularniejšych błohieraŭ krainy z «Kamunarkaj»: jany zrabili šakaład z nazvaj «Kokoład».
«Čamu Kakabaj usio jašče isnuje? Kamu heta vyhadna? Čamu jon nie pakarany za svaju antydziaržaŭnuju dziejnaść? Chto jamu daŭ kart-błanš? Niaŭžo nie vidavočna, što ŭ budučyni jon znoŭ zdradzić i paviadzie za saboj svaju aŭdytoryju?» — piša Račyłoŭski.
Mikita Račyłoŭski doryć kvietki Natalli Kačanavaj. Fota: jahony instahram
Pavieł Kramar — samy viadomy fud-błohier Biełarusi. Jon maje amal 513 tysiač padpisčykaŭ u instahramie, 113 tysiač — u telehram-kanale, a taksama inšyja sacsietki i papularny sajt.
Mikita Račyłoŭski — 26-hadovaja «zorka» biełaruskaj prapahandy. Jon časty hość na šmatlikich tok-šou na biełaruskim telebačańni, dzie plažyć «nacyjanał-zdradnikaŭ» i zaklikaje nie supracoŭničać z tymi, chto «pradaŭ radzimu ŭ 2020-m». U žniŭni 2023-ha nadyšoŭ jaho zorny čas. Heta zdaryłasia, kali jon zajaviŭ, što hatovy «pamierci za Łukašenku» i što «žyvymi ich (moładź z praŭładnych arhanizacyj. — «NN») nie voźmuć».
Čytajcie taksama:
Jak małady kamunist viadzie filijał «Žoŭtych źlivaŭ» dla moładzi i vykładaje ŭ BDUIR
