ZŠA paprasili Polšču rastłumačyć zajavu ab spynieńni padtrymki Ukrainy
Tyja słovy prahučali na fonie roznahałośsia Kijeva i Varšavy nakont ekspartu ŭkrainskaha zbožža.
Andžej Duda. Fota: Paul Ellis-Pool / Getty Images
Bloomberg sa spasyłkaj na vysokapastaŭlenuju krynicu ŭ Pientahonie paviedamlaje, što ZŠA paprasili Polšču rastłumačyć zajavu ab spynieńni padtrymki Ukrainy.
Polšča pa-raniejšamu hatovaja padtrymać Ukrainu, ale kankretnaja pazicyja aficyjnaj Varšavy niezrazumiełaja, kaža krynica ahienctva. Da raskołu ŭ adzinstvie kaalicyi roznahałośsi Polščy i Ukrainy pakul nie pryviali.
Polskija dypłamaty ŭ pryvatnym paradku zapeŭnili zamiežnych kalehaŭ, što vajskovaja padtrymka Ukrainy, chaj i ŭ mienšych maštabach, praciahniecca.
Krynica Bloomberg miarkuje, što admova Polščy ad padtrymki moža pahibielna paŭpłyvać na vajennyja dziejańni va Ukrainie, bo moža padarvać adzinstva NATO.
Nahadajem, što niadaŭna premjer-ministr Polščy Matevuš Maraviecki skazaŭ, što ciapier jaho kraina nie pieradaje zbroi Ukrainie, bo zaniataja ŭzbrajeńniem ułasnaj armii.
Zajava Maravieckaha pryciahnuła šyrokuju ŭvahu ŚMI na fonie roznahałośsia Kijeva i Varšavy nakont ekspartu ŭkrainskaha zbožža.
Paźniej prezident Polščy Andžej Duda zajaviŭ, što niadaŭnija słovy premjer-ministra Matevuša Maravieckaha byli «interpretavanyja najhoršym čynam».
Polšča z pačatku poŭnamaštabnaha ŭvarvańnia Rasii va Ukrainu akazała Kijevu vajskovuju dapamohu na sumu bolšuju za try miljardy jeŭra.
