Siońnia ŭ Vilni vystupić etna-śpiavačka Nastaśsia Chmiel
20 vieraśnia ŭ Vilniu z solnaj prahramaj «Pieśni Biełaviežskaj viosački Zaleśsie» zavitaje Nastaśsia Chmiel — etna-śpiavačka, multyinstrumientalistka, vakalnaja trenierka, udzielnica hurta KRIWI.
Nastaśsia hraje ŭ kirunku ethno-fusion, dadajučy aryhinalnaj miełodyi narodnych piesień aktualnaje asensavańnie i akampaniemient roznych instrumientaŭ z dapamohaj łajv-łupinhu.
Pierad vymušanaj emihracyjaj u Polšču (Krakaŭ) śpiavačka 7 hod žyła ŭ maleńkaj viosačcy Zaleśsie, što schavanaja siarod huščaroŭ Biełaviežskaj puščy, z usich bakoŭ atočanaja bałotam.
Miascovyja žycharki baba Vala (Valancina Parfionaŭna Siplivaja 1929 h. n.) i baba Mania (Maryja Łukjanaŭna Siplivaja 1937 h. n.), ź jakimi Nastaśsia amal paradniłasia za hady sumiesnaha susiedskaha žyćcia, dzialilisia ź joj sapraŭdnymi skarbami — uspaminami pra minułaje i pieśniami, jakim navučylisia ad svaich baćkoŭ i babul.
Prychodźcie 20 vieraśnia a 19:00 u CreateCulture Space pasłuchać pieśni ź Biełaviežskich huščaroŭ, paśpiavać razam, zanurycca ŭ kaśmičnuju atmaśfieru biełaruskaha falkłoru.
