Minimalnaja vypłata pa balničnym vyraście ŭtraja
Balničnyja vypłaty pakul raźličvajucca ŭ pamiery 50% ad siaredniaha biudžetu pražytačnaha minimumu. Heta biudžet ciapier roŭny 176 rublam.
Fota: «Naša Niva»
Vypłaty pa balničnym z 1 studzienia 2024 hoda buduć pryviazanyja da minimalnaha zarobku, pra heta paviedamiła žurnalistam kiraŭnica Fondu sacyjalnaj abarony nasielnictva (FSAN) Minpracy i sacabarony Julija Bierdnikava, piša «Sputnik».
Na hety momant minimalny zarobak roŭny 554 rublam. Balničnyja vypłaty pakul raźličvajucca ŭ pamiery 50% ad siaredniaha biudžetu pražytačnaha minimumu. Heta biudžet roŭny 176 rublam.
«Takim čynam, minimalnaja vypłata vyraście ŭ try razy», — patłumačyła Bierdnikava.
Normy ab hetym pryniali jašče ŭ kancy 2022 hoda, ale zapracujuć tolki z 1 studzienia 2024-ha, bo nieabchodny čas dla ŭkaranieńnia źmienienaj sistemy.
Novaja sistema taksama pa-inšamu ŭličvaje staž. Tyja, chto prapracavaŭ nie mienš za 10 hadoŭ (i ŭvieś hety čas vypłačvalisia ŭnioski ŭ FSAN), buduć atrymlivać 100% stračanaha zarobku ź pieršaha dnia balničnaha. U kaho staž mienšy za 10 hadoŭ, atrymajuć 80%.
Ciapier usie «biuleteni» za pieršyja 12 dzion atrymlivajuć 80%. Zatym užo raźlik robiać na 100%.
Inšaja navina ŭ tym, što buduć uličvacca ŭsie miescy pracy čałavieka, kali jon pracuje nie ŭ adnym miescy. Z adnaho boku, heta pavieličeńnie vypłat pa balničnym, a z druhoha, kampiensacyi nie budzie, kali čałaviek chvareŭ, ale praciahvaŭ pracavać na adnym ź miescaŭ.
Akramia taho, u 2024 hodzie raźlik siaredniadzionnaha zarobku dla kampiensacyi pa balničnym budzie składacca na asnovie nie apošnich 6 miesiacaŭ, a 18-ci.
