Polšča prosić Vialikabrytaniju dapamahčy abaranić svaju pavietranuju prastoru ad šaroŭ-špijonaŭ ź Biełarusi — Bloomberg
Pa infarmacyi krynic ahienctva, polskija ŭłady chočuć atrymać novyja brytanskija sistemy SPA dla abarony ad dronaŭ, aerastataŭ i rakiet z boku Biełarusi i Rasii.
Fota ilustracyjnaje
Polšča źviarnułasia pa dapamohu da Vialikabrytanii dla abarony svajoj pavietranaj prastory ad roznych pavietranych abjektaŭ ź Biełarusi i Rasii. Pra heta 5 červienia paviedamiła ahienctva Bloomberg sa spasyłkaj na svaje krynicy, znajomyja ź situacyjaj.
Pavodle krynic, taki zapyt polskaha boku niepasredna źviazany ź niadaŭnimi faktami ŭvarvańnia aerastataŭ-naziralnikaŭ z terytoryi Biełarusi, reštki adnaho ź jakich byli znojdzieny kala Biełastoka jašče 3 červienia.
Akramia taho, Polšča choča całkam zaścierahčy siabie ad rasijskich dronaŭ i rakiet, kab nie dapuścić paŭtareńnia letašniaha incydentu, jaki zabraŭ žyćci dvuch palakaŭ na terytoryi krainy.
«Aścierahajučysia mahčymych incydentaŭ u svajoj pavietranaj prastory z-za Biełarusi ci Rasii va ŭmovach vajny va Ukrainie, polski ŭrad paprasiŭ u Vialikabrytanii dadatkovaha razhortvańnia SPA na ŭschodzie krainy. Hety zapyt usio jašče razhladajecca», — raspaviała adna z krynic ahienctva Bloomberg.
Ni Polšča, ni Vialikabrytanija fakt najaŭnaści hetaha zapytu aficyjna nie paćviardžali.
Čytajcie taksama:
