U Breście zatrymali za sprobu chabaru pamieram bolš za 1 miljon rubloŭ
Zatrymanamu pahražaje da 15 hadoŭ kałonii.
Ilustracyjnaje fota: «Naša Niva»
Supracoŭniki HUBAZiKa zatrymali na miescy złačynstva pry atrymańni chabaru słužbovuju asobu adnaho z hradaŭtvaralnych pradpryjemstvaŭ Bresckaj vobłaści (jakoha, nie ŭdakładniajecca), paviedamlaje pres-słužba MUS.
U minułym hodzie zavod vystavili na tarhi, paśla čaho adzin z patencyjnych inviestaraŭ zachacieŭ jaho kupić. Antykryzisny kiraŭnik prapanavaŭ źnizić košt łota na 50% za ŭznaharodžańnie ŭ 1,25 miljona rubloŭ. Atrymaŭšy zhodu, jon pačaŭ aktyŭnyja dziejańni: adrazu paśla zakančeńnia čarhovych tarhoŭ pryznačalisia i pravodzilisia novyja. Heta dazvoliła za paŭhoda źnizić aficyjnuju canu praktyčna da patrebnaha ŭzroŭniu.
U kancy maja ŭ staličnym hateli adbyłasia sustreča mužčyny z pradstaŭnikom inviestara. Pry atrymańni častki chabaru pamieram 50 tysiač rubloŭ 62-hadovaha mužčynu zatrymali.
Bieraściejec pracavaŭ antykryzisnym kiraŭnikom z 2016 hoda. Jamu naležyć darahaja nieruchomaja majomaść u Minsku i Breście, a taksama aŭto premijalnaha ŭzroŭniu. Pry pieratrusie znojdziena bolš za 150 tysiač dalaraŭ hatoŭkaj.
Śledčymi zaviedziena kryminalnaja sprava, mužčyna aryštavany. Jamu pahražaje da 15 hadoŭ pazbaŭleńnia voli.
