Biełharodskaja vobłaść paviedamiła pra samuju vialikuju z pačatku vajny kolkaść zahinułych žycharoŭ
U piatnicu ad abstrełaŭ Biełharodskaj vobłaści zahinuli piać žycharoŭ rehijona, paviedamiŭ hubiernatar Viačasłaŭ Hładkoŭ. U subotu ŭ Biełharodskaj vobłaści zahinuli jašče dva čałavieki, udakładniŭ jon. Heta samyja vialikija sutačnyja straty siarod mirnaha nasielnictva ad abstrełaŭ, ź jakimi sutykajucca rasijskija rehijony z pačatku vajny, piša «Ahientstvo. Novosti».
U Novaj Tavałžancy harać chaty paśla abstrełu. Skryn videa
Try čałavieki, pavodle źviestak hubiernatara, zahinuli ŭ vioscy Vałujskaj haradskoj akruhi, jakuju, ź jahonych słoŭ, abstrelvali RSZA «Hrad».
Jašče dvoje zahinuli ŭ Šabiekinskaj haradskoj akruzie: žančyny znachodzilisia ŭ mašynie, jakaja trapiła pad abstreł na darozie. Kolkaść paranienych u vobłaści za 2 červienia dasiahnuła 16.
Ranicaj u subotu, jak paviedamiŭ Hładkoŭ, ad abstrełaŭ zahinuli dźvie žančyny — u Novaj Tavałžancy i ŭ Biaźludaŭcy. Jašče dva čałavieki byli paranienyja.
Da hetaha kolkaść achviar siarod mirnaha nasielnictva ŭ Biełharodskaj vobłaści, pra jakija paviedamlali ŭłady, nie pieravyšała čatyroch za dzień: stolki zahinułych było pry abstrele Šabiekina 15 listapada 2022 hoda.
Paśla surjoznych abstrełaŭ z horada Šabiekina ŭ čaćvier pačali vyvozić ludziej. U piatnicu ŭłady zabaranili pieramiaščeńnie pa darohach akruhi. Horad, jak piša «Kommiersant», apuścieŭ.
Uładzimir Pucin, jaki, pa słovach jaho pres-sakratara Dźmitryja Piaskova, viedaje pra situacyju ŭ horadzie i padtrymlivaje kantakt ź miascovymi ŭładami, publična nie kamientavaŭ abstreły Biełharodskaj vobłaści, a tolki padpisaŭ zahad ab uznaharodžańni Ordenam mužnaści kiraŭnika administracyi Šabiekinskaj haradskoj akruhi Uładzimira Ždanava.
Vajna prychodzić i ŭ inšyja rasijskija rehijony, u tym liku i tyja, što znachodziacca na vialikaj adlehłaści ad Ukrainy. 30 maja nie mienš za vosiem dronaŭ upali abo byli pierachoplenyja sistemami SPA ŭ Maskvie i Padmaskoŭi, a 26 maja drony paškodzili ofisny i pryvatny budynak niedaloka ad centra Krasnadara.
