Zialenski zajaviŭ, što pytańniem Prydniastroŭja Ukraina moža zaniacca paśla vajny: «Treba havaryć z pazicyi dziaržavy-pieramožcy»
Na pres-kanfierencyi z nahody samitu Jeŭrapiejskaj palityčnaj supolnaści prezident Ukrainy Uładzimir Zialenski adznačyŭ, što los hetaha padkantrolnaha Maskvie rehijona budzie vyrašać Małdova razam z sajuźnikami.
Uładzimir Zialenski ličyć, što rašeńnie pra dalejšy los Prydniastroŭja pavinna prymacca z udziełam Ukrainy, bo jana susied Małdovy.
Zialenski daŭ zrazumieć, što Ukraina moža ŭmiašacca ŭ pytańnie Prydniastroŭja, ale tolki paśla zakančeńnia vajny va Ukrainie.
«Treba havaryć z pazicyi mocnaj dziaržavy, dziaržavy-pieramožcy, jakaja advajavała svaju ziamlu. U hety momant i budziem razmaŭlać», — skazaŭ jon.
Adnosna rasijskaha vajskovaha kantynhientu, jaki znachodzicca na terytoryi Prydniastroŭja, jon zajaviŭ, što «kali jany chočuć žyć, jany syduć».
Zialenski dadaŭ, što nie budzie «zamaŭlać taksi» rasijskim vajskoŭcam, raźmieščanym u Prydniastroŭi.
Raniej pa telehram-kanałach prajšła nibyta zajava Mai Sandu ab tym, što Małdova hatovaja dać mahčymaść USU vyrašyć pytańnie z Prydniastroŭjem, ale na samaj spravie prezident Małdovy takoha nie kazała, heta fejk.
Samit krain Jeŭrasajuza i ich susiedziaŭ adbyŭsia na pravym bierazie Dniastra, u małdaŭskaj vioscy Bulbaaka.
Čytajcie taksama:
Polšča pieradaje Małdovie zbroju i bojeprypasy dla ŭmacavańnia biaśpiek
Pucina aryštujuć, kali pryjedzie ŭ Małdovu — Sandu
Rekordnaja dla Małdovy kolkaść demanstrantaŭ sabrałasia na schod u padtrymku jeŭraintehracyi
«Simvał ahresii». U Małdovie buduć štrafavać za hieorhijeŭskija stužki
