Pucin pieradaŭ RPC abraz Rublova nazaŭždy, choć prasili tolki na dva tydni
Jak raskazaŭ kiraŭnik RPC patryjarch Kirył, jon prasiŭ Pucina pieradać abraz carkvie tolki na dva tydni, kab vystavić jaho dla pakłanieńnia ŭ chramie Chrysta Zbaviciela ŭ Maskvie ŭ honar śviata Trojcy. Ale Pucin zamiest taho zrabiŭ ščodry padarunak.
«U adkaz na heta, jak vy viedajecie, prezidentam Rasijskaj Fiederacyi było pryniataje histaryčnaje rašeńnie ab viartańni ikony Śviatoj Trojcy Ruskaj Pravasłaŭnaj Carkvie. My mahli tolki maryć pra toje, kab hetaja śviatynia była viernutaja Carkvie, kab narod naš moh malicca pierad hetaj śviatyniaj, prosiačy błasłavieńnia Božaha i na krainu, i na carkvu», — zajaviŭ patryjarch Kirył.
Jon adznačyŭ, što Ministerstva kultury nie piarečyła pieradačy «Trojcy» z muzieja ŭ chram.
Taksama, pavodle Kiryła, Pucin asabista pryniaŭ rašeńnie ab pieradačy Carkvie hrabnicy Alaksandra Nieŭskaha. Adpaviednuju damovu pradstaŭniki pieciarburhskaha Ermitaža padpisali z RPC 10 maja.
Abraz Andreja Rublova «Trojca» — adna z samych viadomych jaho prac, napisanaja ŭ XV stahodździ. Da revalucyi 1917 hoda abraz zachoŭvaŭsia ŭ Troica-Sierhijevaj łaŭry, a potym saviecki ŭrad pieradaŭ jaho ŭ Traćciakoŭskuju halereju.
U minułym hodzie, niahledziačy na piarečańni restaŭrataraŭ, abraz užo pieradavali Carkvie na dva dni dla pakłanieńnia viernikaŭ. Paśla hetaha śpiecyjalisty naličyli na im 61 novaje paškodžańnie.
Viartańnie RPC mienavita ciapier kulturnych kaštoŭnaściaŭ ź dziaržaŭnych muziejaŭ Rasii možna źviazvać siarod inšaha i z uzmacnieńniem ideałahičnaj roli hetaj Carkvy na fonie niaŭdač rasijskaj armii ŭ raźviazanaj Kramlom vajnie va Ukrainie. Tak, niadaŭna paviedamlałasia, što ŭ vajskovych padraździaleńniach rasijskaj vajskovaj hrupoŭki «Dniepr» u Chiersonskaj vobłaści pačali pravozić raniej padorany Pucinym abraz z vyjavaj «Spasa Nierukatvornaha».
Čytajcie taksama:
Patryjarch Kirył pazbaviŭ sanu protadyjakana Andreja Kurajeva
