Dla byłoha inkasatara Jana Papkoviča zaprasili čatyry hady kałonii
U Minskim haradskim sudzie dziaržabvinavačańnie zaprasiła 4 hady kałonii byłomu inkasataru Biełhazprambanka i eks-śpiecnazaŭcu Janu Papkoviču, paviedamlaje «Miedyjazona» na padstavie infarmacyi, atrymanaj ad jaho starejšaha brata Stanisłava.
Papkoviča abvinavačvajuć u hrubym parušeńni paradku (artykuł 342 KK) i padrychtoŭcy da ŭdziełu va ŭzbrojenym kanflikcie na terytoryi zamiežnaj dziaržavy (artykuły 13 i 363-1 KK). Sudzić jaho pačali 10 maja.
Pa słovach Stanisłava Papkoviča, jahony brat viny ŭ sudzie nie pryznaŭ. Adzin sa śviedak na sudzie zajaviŭ, što «na jaho akazvali cisk i jon padpisvaŭ usio, što skažuć».
Siarod piśmovych dokazaŭ u sudzie demanstravali pierapisku Papkoviča ź siabrami, jakija, jak śćviardžałasia, słužać u pałku Kalinoŭskaha.
Jan Papkovič zvolniŭsia z banka ŭ žniŭni 2022 hoda i źbiraŭsia źjazdžać ź siamjoj u Polšču, adnak 2 vieraśnia siłaviki pryjšli da jaho dadomu ź pieratrusam. Byłoha śpiecnazaŭca zatrymali razam z žonkaj Nastaj, jakuju paźniej adpuścili.
Pry zatrymańni Jan byŭ mocna źbity. Akramia taho, siłaviki paranili sabaku siamji.
U kastryčniku minułaha hoda pa dziaržkanale BT pakazali siužet pra Jana Papkoviča. Tam jaho nazvali «najmitam, jaki rychtavaŭsia jechać vajavać va Ukrainu ŭ składzie bandfarmavańnia».
Adnačasova ź Janam Papkovičam zatrymali i jahonaha brata Alesia, jaho ŭžo asudzili da dvuch hadoŭ kałonii.
Čytajcie taksama:
U Hrodnie zatrymali jak minimum šeść čałaviek
