U Turcyi try apazicyjnyja partyi zapatrabavali źniać z prezidenckich vybaraŭ Redžepa Erdahana
Zvarot u Vyšejšuju vybarčuju kamisiju krainy nakiravali Dobraja partyja, Partyja demakratyi i praryvu, a taksama Partyja Ajčyny. Apazicyja padtrymlivaje hałoŭnaha apanienta Erdahana Kiemala Kyłyčdarohłu.
Redžep Taip Erdahan. Fota: Firdia Lisnawati / AP
Na dumku aŭtaraŭ zvarotu ŭ vybarkam, vyłučeńnie dziejučaha prezidenta supiarečyć Kanstytucyi Turcyi, bo jaho biahučy termin — druhi pa liku. Ankara śćviardžaje, što paśla kanstytucyjnaha refierendumu 2017 hoda prezidenckija terminy Erdahana abnulilisia. Vybary prezidenta Turcyi projduć 14 maja, paviedamlaje «Radyjo Svaboda».
Ich nie stali pieranosić, niahledziačy na niadaŭni ziemlatrus, achviarami jakoha stali bolš za 50 tysiač čałaviek.
Erdahan i Kyłyčdarohłu — favaryty pieradvybarnaj honki. U ich kampanijach pieravažaje tema ziemlatrusu.
Hałoŭnaja pretenzija apazicyi da prezidenta Erdahana — drennaja padrychtoŭka ŭładaŭ da pieraadoleńnia nastupstvaŭ razburalnych padziemnych šturškoŭ i niedachopy ŭ akazańni dapamohi paciarpiełym.
Niadaŭnija apytańni pakazvajuć, što kandydat ad apazicyi moža nabrać bolš hałasoŭ, čym dziejučy prezident.
Pry hetym niekatoryja sacyjołahi dapuskajuć, što ŭ kančatkovym rachunku pracent hałasoŭ moža być roŭny.
