Stała viadoma, za što zvolnili mera Bresta Rahačuka i kudy jaho pryznačać
Alaksandr Łukašenka siońnia ŭzhadniŭ naznačeńnie novaha staršyni Bresckaha harvykankama. Im stanie Siarhiej Łabadzinski. Papiaredniaha kiraŭnika horada Alaksandra Rahačuka pieravodziać na prafsajuznuju rabotu. Pryčyny adstaŭki publična abmierkavali ŭ Łukašenki pa jaho inicyjatyvie.
Narada ŭ Łukašenki, 27 sakavika. Skryn videa
Pres-słužba Łukašenki apublikavała razmovu pamiž Łukašenkam, kiraŭnikom jahonaj Administracyi Iharam Sierhiejenkam i Łabadzinskim, jakoha pryznačyli meram Bresta.
Łukašenka zapytaŭ, u suviazi z čym Rahačuk sychodzić u adstaŭku.
— Sychodzić u suviazi ź pierachodam na pracu na pasadzie staršyni abłasnoj fiederacyi prafsajuzaŭ. Prapanova zychodziła ad kiraŭnictva Bresckaha abłvykankama, z ulikam praciahłaha vopytu raboty pryniata rašeńnie nadać bolšy impuls raźvićciu, — pasprabavaŭ zhładzić Sierhiejenka.
Tady Łukašenka spytaŭ u Łabadzinskaha:
— Siarhiej Mikałajevič, u čym prablema? Ty tam unutry, prytym pracavaŭ u abłvykankamie. Jość niejkija šurpataści, pryčyny?
— Nu, praca z pradpryjemstvami … najpierš tamu, što ekanomika horada moža davać bolš vynikaŭ, tamu heta, musić, asnoŭnaja pryčyna, — adkazaŭ Łabadzinski.
— Heta značyć, niekatoraja niezadavolenaść z boku abłvykankama pracaj Rahačuka. Nu, dyk ja i kažu. Ja ž pavinien viedać chacia b tvaju pazicyju. A vy hetaha nie bačycie? — zastaŭsia zadavoleny adkazam Łabadzinskaha i niezadavoleny adkazam Sierhiejenki Łukašenka.
— Nie, … my taksama heta bačym, — adkazaŭ Sierhiejenka.
«Nu, dyk u čym sapraŭdnaja pryčyna? Vy ž usie jaho ledź nie prezidentam prapanoŭvali vyłučyć na čarhovych vybarach i raptam…» — niespadziavana Łukašenka skazaŭ, što niechta kahości ŭ kalidorach prapanoŭvaŭ na post prezidenta.
— Nie, jon dastatkova aktyŭny ŭ hramadska-palityčnym płanie, čałaviek maje svaju pazicyju, sustrakajecca z nasielnictvam. Ale na niejkim etapie pa mnohich napramkach raźvićcia niepasredna horada pačała situacyja prabuksoŭvać, i ŭ bolšaj stupieni na siabie zadaču pa kiravańni horadam biare abłvykankam, — skazaŭ Sierhiejenka.
— Zrazumieła. Ja tak razumieju, Siarhiej Mikałajevič, vy čałaviek pierśpiektyŭny i viedajecie ŭsie vuzkija miescy, niedachopy. I ŭ Breście heta budzie vypraŭlena. U Breście ja pavinien pabyvać letam. U krajnim vypadku, uvosień niedzie: vierasień, kastryčnik, va ŭboračnuju kampaniju.
Nutrom čuju, niešta tam jość. Tak, vidać, niahledziačy na ŭsie stanoŭčyja jakaści Rahačuka ŭ płanie pracy z nasielnictvam, vidać, usio ž duša jaho nie lažała da materyjalnaj vytvorčaści i pradpryjemstvaŭ. Całkam mahčyma. Ale nie chaciełasia b, kab u vas tam była niejkaja kruhavaja paruka, kab vy pryncypova adzin da adnaho stavilisia.
Pakul da Bresckaj vobłaści ŭvohule pretenzij vialikich niama. Vy, moža być, navat nie horš pracujecie, čym inšyja vobłaści, ale tym nie mienš, — skazaŭ Łukašenka.
Alaksandr Rahačuk uznačalvaŭ Brescki harvykankam z 2014 hoda. Viadzie svoj telehram-kanał.
Čytajcie taksama:
