MAZ byŭ biez techahladu, maršrutka pierapoŭnienaja, školny aŭtobus złamaŭsia. Novyja akaličnaści strašnaj avaryi pad Smalavičami
Rasśledavańnie trahičnaha DTZ z udziełam maršrutki i MAZa ŭ Smalavickim rajonie 20 lutaha vyjaviła kompleks prablem u śfiery darožnaj biaśpieki. Pra heta raspavioŭ žurnalistam hienprakuror Andrej Švied.
Nastupstvy žachlivaj avaryi pad Smalavičami. Fota: MUS
Adnoj z tem narady stała darožnaja biaśpieka. U suviazi z hetym hienprakuror zhadaŭ pra avaryju z udziełam maršrutki i hružanaha MAZa, jakaja zdaryłasia 20 lutaha pablizu Smalavičaŭ. U vyniku łabavoha sutyknieńnia tady zahinuła 11 čałaviek, jašče 9 u vielmi ciažkim stanie byli špitalizavanyja ŭ balnicy. Paźniej dvoje ź ich pamierli. Siarod zahinułych byli i dzieci.
«Za ŭsimi hetymi trahičnymi abstavinami staić ceły kompleks prablem. Toj ža aŭtamabil MAZ dva hady nie prachodziŭ techahlad.
Vyjavilisia surjoznyja prablemy ŭ biaśpiecy pieravozak pasažyraŭ: u hetym maršrutnym taksi, dzie 15 pasadačnych miescaŭ, jechali 19 čałaviek, h.zn., u pahoni za nažyvaj hruzapieravozčyk prosta napichaŭ tudy ludziej.
Bačycie, sukupnaść faktaraŭ. Adno čaplajecca za inšaje. My ciapier pravieryli: u słužbie Minabłtransa bolš za 100 hruzavikoŭ jeździać biez techahladu. Kožny ź ich — heta niebiaśpieka na darozie. I heta tolki ŭ adnym pradpryjemstvie», — zaŭvažyŭ Švied.
Pavodle jaho słoŭ, pa ŭsioj krainie ciapier pravodzicca tatalnaja pravierka, pa daručeńni Łukašenki navodzicca paradak u hetaj śfiery.
«Dalej. U hetym złaščasnym maršrutnym taksi jechali školniki. Čamu jany ŭ im jechali: bo złamaŭsia školny aŭtobus, a orhany miascovaj ułady nie zabiaśpiečyli apieratyŭnuju zamienu. Dzieci byli vymušanyja jeździć u maršrutnym taksi.
U vyniku dvoje dziaciej zahinuła, dvoje — atrymali cialesnyja paškodžańni. Viadoma, heta vielmi sumna. Hety prykład pakazvaje, što krychu zabylisia, samazaspakoilisia, adyšli ad taho, što niama drobiaziaŭ. Kožny pavinien na svaim miescy zabiaśpiečvać realizacyju tych zadač, jakija na jaho ŭskładzienyja», — skazaŭ Švied.
