Pavarotny momant: Izrail dazvoliŭ prodaž antydronavych sistem Ukrainie
«Nam treba pahladzieć, jak hetyja sistemy spracujuć suprać iranskich dronaŭ».
Fota: pixabay
Izrail niadaŭna zaćvierdziŭ novyja ekspartnyja zbrojevyja licenzii, jakija praduhledžvajuć adpraŭku izrailskich antydronavych sistem Ukrainie. Pra heta 15 sakavika paviedamiła vydańnie Axios sa spasyłkaj na vysokapastaŭlenych čynoŭnikaŭ Izraila i Ukrainy.
Pavodle infarmacyi vydańnia, adpaviednyja licenzii byli ŭchvaleny jašče ŭ siaredzinie lutaha pa daručeńni premjer-ministra Izraila Bińjamina Nietańjachu ŭ ramkach pierahladu palityki krainy ŭ dačynieńni da vajny va Ukrainie. Da raspracoŭki i adpraŭki novych sistem abarony buduć dapuščanyja izrailskija kampanii Elbit i Rafael.
Heta budzie pieršaja adkrytaja vajskovaja padtrymka takoha rodu ź izrailskaha boku z momantu pačatku vajennaha ŭvarvańnia Rasii.
Izrail prapanavaŭ Ukrainie kupić srodki radyjoelektronnaj baraćby dla padaŭleńnia i źniščeńnia bieśpiłotnikaŭ. Sistemy majuć radyus dziejańnia kala 40 kiłamietraŭ i mohuć być raźmieščany pobač z elektrastancyjami abo inšymi važnymi abjektami. Adnak pytańnie ź sistemami abarony ad rasijskich balistyčnych rakiet usio jašče zastajecca adkrytym, — paviedamiŭ vydańniu adzin z ukrainskich čynoŭnikaŭ.
Pavodle jaho słoŭ, delehacyja Minabarony Ukrainy ŭžo naviedała Izrail dla aznajamleńnia z novymi antydronavymi sistemami, a sama ździełka jašče kančatkova nie padpisana.
Taksama stała viadoma, što padčas niadaŭniaha vizitu kiraŭnika MZS Izraila Eli Koena va Ukrainu jon pieradaŭ prezidentu Ukrainy Uładzimiru Zialenskamu infarmacyju ab uchvaleńni vajskovych pastavak.
Izrailski bok pry hetym adznačyŭ, što novyja sistemy nosiać abarončy charaktar i nie śviedčać ab žadańni Izraila nanieści škodu rasijskim sałdatam.
«Izrail dapamahaje Ukrainie ŭ abaronnaj i hramadzianskaj śfierach. Kožny zapyt razhladajecca ŭ adpaviednaści z palitykaj ekspartu ŭzbrajeńniaŭ va Ukrainu. My nie spyniajemsia na hetym ź mierkavańniaŭ nacyjanalnaj biaśpieki i źniešniaj palityki», — raskazaŭ Axios adzin z vysokapastaŭlenych čynoŭnikaŭ Minabarony Izraila.
Jon dadaŭ, što adnoj z hałoŭnych pryčyn adpraŭki novych sistem abarony Ukrainie źjaŭlajecca žadańnie pravieryć ich u baraćbie suprać iranskich bieśpiłotnikaŭ.
Nahadajem, što jašče ŭ minułym hodzie Izrail admaŭlaŭsia aficyjna pastaŭlać lubyja vidy abaronnaha abo nastupalnaha ŭzbrajeńnia Ukrainie, aścierahajučysia tym samym spravakavać Rasiju.
Ale ŭžo ŭ pačatku lutaha izrailskaje kiraŭnictva ŭpieršyniu dapuściła mahčymaść adpraŭki zbroi ŭkraincam.
Čytajcie taksama:
ISW: Za luty vojski Rasii zachapili mienš za 0,04% terytoryi Ukrainy
