Jeŭrasajuz nie budzie ŭvodzić sankcyi suprać biełaruskaha ekspartu ŭhnajeńniaŭ i praduktaŭ charčavańnia
Jeŭrasajuz płanuje ŭvieści suprać Biełarusi novy pakiet sankcyj, padobnych da nakładzienych raniej na Rasiju. Adnak buduć dziejničać i tyja ž vyklučeńni z sankcyj, datyčnyja pytańniaŭ ekspartu ŭhnajeńniaŭ i charčoŭ, paviedamiŭ brusielski karespandent «Radyjo Svaboda» Rykard Juźviak.
«Novaja prapanova ES adnosna sankcyj suprać Biełarusi šmat u čym adlustroŭvaje niekatoryja zachady, užo ŭžytyja da Rasii: jak zabarona na nadańnie IT– i kansałtynhavych pasłuh, pradmietaŭ raskošy, a taksama zabarona na impart stali i zołata», — raskazaŭ Rykard Juźviak.
Ale, jak i ŭ vypadku z apošnim pakietam sankcyj ES suprać Rasii, uzhodnienym u kancy 2022 hoda, adnosna ŭhnajeńniaŭ i charčoŭ ź Biełarusi praduhledžanyja vyklučeńni.
Adznačajecca, što heta robicca «dla dalejšaha vyrašeńnia prablem charčovaj biaśpieki ŭ trecich krainach» i što adnosna asobaŭ, jakija adyhryvajuć «značnuju rolu ŭ mižnarodnym handli sielskahaspadarčaj i charčovaj pradukcyjaj, uklučajučy pšanicu i ŭhnajeńni», Brusiel moža razmarozić ichnyja aktyvy.
Pavodle žurnalista, heta moža aznačać, što aktyvy dyrektara «Biełaruśkalija» Ivana Hałavataha i rasijskaha miljardera Michaiła Huceryjeva, nabližanych da Alaksandra Łukašenki, mohuć razmarozić.