Za dva miesiacy da Makiejeŭki. Dziasiatki «mobikaŭ» z Vałhahrada zahinuli paśla ŭdaru pa Novaj Kachoŭcy, ich rodnym ničoha nie tłumačać
Rakietny ŭdar pa Makiejeŭcy ŭ navahodniuju noč, dzie zahinuła bolš za 100 rasijskich mabilizavanych, byŭ nie pieršym z takoj vialikaj kolkaściu zahinułych. Analizujučy daty hibieli rasijskich pryzyŭnikoŭ, The Insider vyjaviŭ, što 24 kastryčnika ŭ rajonie akupavanaj Novaj Kachoŭki ŭ Chiersonskaj vobłaści achviarami anałahičnaha ŭdaru stali jak minimum niekalki dziasiatkaŭ mabilizavanych.
Asabliva šmat zahinułych było z Vałhahradskaj vobłaści — mienavita ŭ vałhahradskich forumach i źviarnuli ŭvahu na dziŭnuju anamaliju: pačynajučy z kanca kastryčnika miascovyja haziety stali publikavać pa dva-try niekrałohi mabilizavanym sałdatam, i pad usimi fatahrafijami stajała adna i taja ž data śmierci — 24 kastryčnika 2022 hoda.
Pra abstaviny hibieli ŭ niekrałohach nie paviedamlałasia.
U ŚMI byli apublikavanyja imiony 20 mabilizavanych z Vałhahrada i vobłaści: usie zahinuli ŭ hety dzień u Chiersonskaj vobłaści ŭ rajonie Novaj Kachoŭki (jašče pa dvaich paćvierdžanaja tolki vobłaść — Chiersonskaja, ale biez udakładnieńnia miesca). Kolki ŭsiaho zahinuła ad hetaha ŭdaru niezrazumieła, ale kolkaść moža być našmat bolšaja, bo hetyja imiony — toje, što atrymałasia vyjavić tolki ŭ vałhahradskich niekrałohach.
Aficyjnych źviestak ab pryčynach hibieli hetych sałdat niama, ale 3 listapada ŭ niekalkich pablikach «UKantakcie» źjaviłasia infarmacyja ab tym, što 24 kastryčnika va Ukrainie była abstralanaja kałona vałhahradskich mabilizavanych, adpraŭlenych na front.
Da publikacyj byŭ prymacavany śpis z 20 imionaŭ, usie supadajuć z tymi, što byli paznačanyja ŭ niekrałohach ŚMI. U listapadzie śpis apublikavaŭ sakratar dyscyplinarnaj kamisii Vałhahradskaj jeparchii, namieśnik kiraŭnika turemnaha słužeńnia Jaŭhien Karavajeŭ. Jon ukazaŭ, što miesca hibieli mabilizavanych — Novaja Kachoŭka.
YouTube-prajekt ROMB zmoh źviazacca sa svajačkaj adnaho z zahinułych, jakaja paćvierdziła, što vałhahradcy trapili kałonaj pad abstreł u rajonie Kachoŭskaj HES.
«27 čysła my pajechali ŭ vajenkamat, nam raspaviali, što zahinuła ŭsia mašyna — 20 chłopcaŭ. Kudy jechali, nam nie mohuć skazać. Jany pačali vyjazdžać na Kachoŭskuju HES. Niekalki mašyn, 90 čałaviek, i samaja pieršaja mašyna trapiła pad abstreł. Što tam adbyvałasia kankretna — nichto nam ničoha nie skazaŭ. Askołki — miarkujecca, HIMARS».
Maci adnaho zahinułaha skazała, što ŭ vajenkamacie joj uvohule nie dali nijakaj infarmacyi, skazaŭšy tolki: «Prabačcie, tak atrymałasia».
Žurnalistam udałosia źviazacca z mabilizavanym, jaki, jak śćviardžajecca, jechaŭ u toj ža kałonie, ale zastaŭsia žyvy. Jon raspavioŭ, što ludziej bitkom zahruzili pa KamAZach, jany siadzieli na bartach, mašyny ruchalisia z chutkaściu 35—40 km/h i ŭvieś čas spynialisia, tamu adnaho ŭdaru chapiła dla hibieli adrazu 20 čałaviek.
Abstaviny hibieli mabilizavanych vałhahradcaŭ sprabavali vyśvietlić žurnalisty miascovaha partała V1.ru. Adnak padrabiaznaści im tak nichto i nie paviedamiŭ. Adnamomantavaja hibiel dvuch dziasiatkaŭ vałhahradcaŭ uładami była praihnaravanaja, pišuć ŚMI.
Jak paviedamili The Insider va USU, tolki 24 kastryčnika i tolki ŭ Chiersonskaj vobłaści ŭkrainskimi vojskami byŭ naniesieny ŭdar pa vialikaj kolkaści vajskoŭcaŭ u Zabarynie (pavodle acenak USU — kala 70 zahinułych), u Aleškach — dva nakryćci vialikaj kolkaści vajskoŭcaŭ, a taksama ŭdar pa kałonie zabieśpiačeńnia ź piaci hruzavikoŭ, jakija ruchalisia pa trasie R-57 (papiarednie siem zahinułych). Tady ž byŭ naniesieny ŭdar pa bazie rasijskich vajskoŭcaŭ u pasiołku Kairy Chiersonskaj vobłaści, jana raźmiaščałasia na terytoryi miascovaha liceja, kolkaść achviar nieviadomaja.
9 listapada Rasija zajaviła ab adstupleńni z pravaha bieraha Dniapra ŭ Chiersonskaj vobłaści. 11 listapada USU biez boju ŭvajšli ŭ Chierson i vyzvalili jaho.
