Biełaruski fond spartovaj salidarnaści nakiravaŭ u MAK zajavu suprać dopusku praŭładnych spartoŭcaŭ na Alimpijadu
Biełaruski fond spartyŭnaj salidarnaści i bolš za 50 tytułavanych spartoŭcaŭ i pradstaŭnikoŭ sportu padpisali zvarot u Mižnarodny alimpijski kamitet z nahody mahčymaha ŭdziełu spartoŭcaŭ ź Biełarusi i Rasii ŭ Alimpijskich hulniach—2024.
U 2024 hodzie Letnija Alimpijskija hulni projduć u Paryžy. Fota AP
Aŭtary zvarotu nahadvajuć pra 200 spartoŭcaŭ, jakija zahinuli padčas vajny va Ukrainie, razbureńnie bolš jak 320 abjektaŭ spartovaj infrastruktury i adsutnaść efiektyŭnych mahčymaściaŭ dla padrychtoŭki ŭkrainskich spartoŭcaŭ.
«Bolš za 20 biełaruskich pradstaŭnikoŭ sportu ciapier znachodziacca za kratami, sotni — zaznali represii i byli vymušanyja źjechać z krainy za toje, što zajavili pra svajo niepryniaćcie hvałtu i vykazali prychilnaść ahulnym alimpijskim kaštoŭnaściam. Hetyja spartoŭcy patrapili pad palityčny pieraśled, stracili svaje hramadzianskija pravy i nie mohuć paŭnavartasna praciahvać spartyŭnuju karjeru, u tym liku brać udzieł u Alimpijskich hulniach», — havorycca ŭ zvarocie.
Jaho aŭtary padtrymali ŭzmacnieńnie spartyŭnych sankcyj, jakija ŭžo dziejničajuć suprać Biełarusi i Rasii, i zaklikali MAK usiebakova abaraniać pravy ŭkrainskich i biełaruskich volnych spartoŭcaŭ i śpiecyjalistaŭ:
«Biełaruskim volnym spartoŭcam treba dać prava ŭdzielničać u spartovych spabornictvach i vyratavać ich ad pieraśledu z boku režymu Łukašenki za ich hramadzianskuju pazicyju», — havorycca ŭ zajavie.
Taksama zajaŭniki ličać niedastatkovym kryteryjalny miechanizm udziełu biełaruskich i rasijskich spartoŭcaŭ u mižnarodnych spabornictvach i prapanujuć MAK ukaranić efiektyŭnuju sistemu pravierki rasijskich i biełaruskich spartoŭcaŭ na pradmiet ich mahčymaha dopusku da spabornictvaŭ, jakaja «pavinna hruntavacca na aktyŭnaj antyvajennaj pazicyi spartoŭca, u tym liku na padpisańni Antyvajennaj dekłaracyi».
Imiony spartoŭcaŭ, jakija padpisali dekłaracyju, nie publikujucca «ŭ metach biaśpieki», adznačyli ŭ Biełaruskim fondzie spartyŭnaj salidarnaści.
Mižnarodny alimpijski kamitet raniej vystupiŭ z zajavaj, u jakoj prapanavaŭ dazvolić biełaruskim i rasijskim spartoŭcam vystupać na mižnarodnych spabornictvach pad niejtralnym ściaham, kali jany adkryta nie padtrymlivajuć vajnu Rasii suprać Ukrainy. Kančatkovaje rašeńnie pa hetym pytańni nie pryniataje.
