Žychar Baranavičaŭ musić vypłacić 3000 rubloŭ kampiensacyi maralnaj škody za dva kamientary
16 studzienia ŭ sudzie Lachavičaŭ i Lachavickaha rajona vyniesieny prysud žycharu Baranavičaŭ, dyzajnieru Dzianisu Kovalu. Jaho pryznali vinavatym pavodle art. 369 Kryminalnaha kodeksa, piša «Viasna».
Vyrak ahučyła sudździa Taćciana Žarko. Pa chadajnictvie advakata jana zrabiła pasiadžeńnie zakrytym. Bok dziaržabvinavačańnia padtrymaŭ Paviedajčus.
Mužčynu pryznali vinavatym u tym, što 21 listapada 2020 hoda i 3 lutaha 2021 hoda jon abraziŭ u telehram-kanale (mabyć, «Lachoviči-97») Maksima Varanko i Vitala Dabračynskaha.
Paciarpieły Varanko raniej byŭ staršym učastkovym u Lachavickim rajonie, ale 16 vieraśnia 2020 hoda syšoŭ u adstaŭku. Jon daviedaŭsia pra abrazy ad svaich kaleh uvosień 2020 hoda i ŭspryniaŭ ich u dačynieńni da svajoj prafiesijnaj dziejnaści. Dabračynski z 2017 hoda pracavaŭ u Lachavičach, da hetaha — u Baranavickim HAUS. Abodva paciarpiełyja zajavili pazovy ab kampiensacyi maralnaj škody — kožny pa dźvie tysiačy rubloŭ. Jany nie nastojvali na kryminalnaj adkaznaści. Śviedkam pa spravie vystupiŭ Alaksandr Reŭt.
Dzianis Koval całkam pryznaŭ vinu i paprasiŭ prabačeńnia ŭ paciarpiełych.
Prakuror zaprasiŭ Dzianisu Kovalu 1,5 hoda abmiežavańnia voli biez nakiravańnia ŭ PUAT — «chatniuju chimiju», adnak sudździa Žarko prysudziła jamu na try miesiacy mieniej: hod i try miesiacy «chatniaj chimii». Paciarpieły Dabračynski adznačyŭ, što možna było b naznačyć i «chimiju» z nakiravańniem u PUAT. Telefon mužčyny kanfiskavali. Taksama Koval musić vypłacić kožnamu paciarpiełamu pa 1500 tysiačy rubloŭ u jakaści kampiensacyi maralnaj škody.
Adznačym, što pa adnym z epizodaŭ 2 lutaha zakončyŭsia termin pryciahnieńnia da adkaznaści (dva hady).
