Ci źjaŭlajecca tatuiroŭka piersanalnymi danymi? Na dumku ŭładaŭ — tak
Pytańnie, ci možna ličyć tatuiroŭku piersanalnymi danymi, zadaŭ u svaim telehram-kanale Nacyjanalny centr abarony piersanalnych danych (CPD). I sam na jaho adkazaŭ.
Fota ilustracyjnaje
Pavodle CPD:
«Piersanalnyja danyja — lubaja infarmacyja, jakaja adnosicca da identyfikavanaj fizičnaj asoby ci fizičnaj asoby, jakaja moža być identyfikavanaja. Identyfikavanaja fizičnaja asoba — kankretnaja asoba, jakuju možna vyłučyć siarod inšych, paznačyć jaje ci niepasredna źviarnucca da jaje».
Čałaviek moža być prama ci ŭskosna identyfikavany praz proźvišča, imia, datu naradžeńnia, identyfikacyjny numar albo «praz adnu abo niekalki prykmiet». I voś jakraz tatuiroŭki «čaściakom źjaŭlajucca ŭnikalnymi i admietnymi prykmietami źniešnaści čałavieka i charaktaryzujuć fizičnuju identyčnaść čałavieka», śćviardžaje CPD.
U asobnych vypadkach tatuiroŭki «mohuć charaktaryzavać i kulturnuju identyčnaść čałavieka, bo, naprykład, mohuć mieć peŭnaje značeńnie, jakoje dazvalaje adnieści čałavieka da jakoj-niebudź subkultury abo sacyjalnaj hrupy».
Takim čynam, robić CPD vysnovu,
«tatuiroŭki ŭ sukupnaści ź inšaj infarmacyjaj pra čałavieka buduć jaho piersanalnymi danymi».
Z hetaha pa łohicy mieła b vynikać, što źviestki pra tatuiroŭki musili b achoŭvacca dziaržavaj razam ź inšymi piersanalnymi danymi čałavieka. Ale na praktycy siłavyja orhany akurat na ich časta robiać akcent u svaich paviedamleńniach i zapisanych rolikach.
