Machlary nažyvalisia na žadańni dziaŭčat udzielničać u konkursach pryhažości
Śledčy kamitet rasśleduje kryminalnuju spravu ab machlarstvie, ździejśnienym u asabliva bujnym pamiery: ašukancy padmanvali dziaŭčat, jakija chacieli stać udzielnicami konkursaŭ pryhažości.
Fota ilustracyjnaje
«Zhodna z materyjałami kryminalnaj spravy, biełaruski znachodzili abjavy ŭ sacyjalnaj sietcy ab praviadzieńni konkursaŭ pryhažości i pisali ich aŭtaram. Paśla niekalkich hutarak pa telefonie patencyjnym udzielnicam prychodziŭ zapavietny sms ab paśpiachovym prachodžańni adboru», — paviedamlaje Śledčy kamitet.
Paśla dziaŭčatam prapanoŭvałasia padrychtavać videavizitoŭku, zaklučyć damovu i apłacić arhanizacyjny ŭniosak.
«Paźniej praviadzieńnie mierapryjemstvaŭ pastajanna adkładałasia, psieŭdazasnavalniki spasyłalisia na roznyja pryčyny, u tym liku na pandemiju i čakańnie rehistracyi samich konkursaŭ, a paśla pierastavali vychodzić na suviaź. Zrazumieŭšy, što stali achviarami ašukancaŭ, dziaŭčaty źviarnulisia ŭ milicyju», — adznačyli ŭ viedamstvie.
Na praciahu hoda na vudu «arhanizataraŭ» takim čynam trapiła 21 dziaŭčyna. Ahulnaja suma naniesienaj im škody skłała bolš za 46 tysiač rubloŭ. Ale ŭvohule paciarpiełych moža być bolej.