Internet śmiajecca z «rekanstrukcyi» Kurskaj bitvy ŭ spartzale. Na jaje patracili kala $30000
U Samarskaj vobłaści nabiraje abaroty skandał, źviazany z vyłučeńniem hramadskaj arhanizacyi z rasijskaha Prezidenckaha fondu kulturnych inicyjatyŭ 2 młn 175 tysiač rubloŭ na praviadzieńnie historyka-patryjatyčnaha fiestyvalu dla dziaciej i padletkaŭ. Jaje ŭzrovień nie vytryvali navat «patryjatyčnyja» siły Rasii.
Fota: Prajekt «Historyka-patryjatyčny fiestyval dla dziaciej i padletkaŭ «Pomniu i hanarusia!»
Kadry, na jakich adny padletki vydajuć siabie za niamieckich sałdat, a inšyja — za vajskoŭcaŭ SSSR, byli źniatyja ŭ listapadzie — śniežni 2022 hoda ŭ budynku Syzranskaha filijała Samarskaha dziaržaŭnaha techničnaha ŭniviersiteta, piša «Błoknot». Pałova studentaŭ na videa ŭ formie sałdat Viermachta, astatnija vyhladajuć jak čyrvonaarmiejcy.
Raźbiŭšysia na dźvie hrupy, jany chodziać pa spartyŭnaj zale, šturchajučy butaforskija tanki. Kali hladzieć rolik z hukam, to čuvać, jak hledačy, nazirajučy za hetaj karcinaj, śmiajucca.
Fota: Prajekt «Historyka-patryjatyčny fiestyval dla dziaciej i padletkaŭ «Pomniu i hanarusia!»
Arhanizatar akcyi Siarhiej Ivanoŭ — deputat, u Syzranskaj Dumie ŭvachodzić u frakcyju «Adzinaja Rasija». Jon upeŭnieny, što napadki na jaho źviazanyja z budučymi vybarami ŭ haradski parłamient.
«Topiać nie tolki mianie, ale i inšych maich kaleh z «Adzinaj Rasii», — skazaŭ Ivanoŭ «Błoknotu». — Našy apanienty stvaryli ŭ sacsietcy «VKontaktie» staronku, dzie palivajuć nas brudam».
Ivanoŭ raspavioŭ, kudy byli zraschodavany srodki prezidenckaha hranta: pieranosnaja vystava hierojaŭ VAV — uradžencaŭ Syzrani, mulažy aŭtamataŭ, apłata pasłuh videaapieratara, zarpłata buchhałtara, formu «pryjšłosia šyć na zamovu, tamu što ŭ kramie jaje nie kupiš».