YouTube płanuje źmianić praviły nienarmatyŭnaj leksiki
Heta ŭžo vyklikała burnuju reakcyju niekatorych stvaralnikaŭ videakantentu.
Fota: pixabay
Na hetym tydni anhłamoŭnaja hulniavaja supolnaść YouTube (karystalniki, kanały jakich pryśviečany ŭ asnoŭnym kampjutarnym hulniam) była ŭzrušanaja paśla taho, jak niekatoryja stvaralniki kantentu raptoŭna ŭbačyli demanietyzacyju svaich starych videa.
Pryčyna — novaja palityka kampanii, uviedzienaja jašče ŭ listapadzie z metaj zrabić niekatoryja vidy kantentu bolš zručnymi dla rekłamadaŭcaŭ. Hetaje novaŭviadzieńnie źmianiła padychod płatformy da nienarmatyŭnaj leksiki i hvałtu. Ale, chacia pakul usio jašče nie zusim zrazumieła, što kiraŭnictva YouTube budzie rabić dalej, u kampanii, vidać, usio ž prysłuchoŭvajucca da zakłapočanaści karystalnikaŭ.
«U apošnija tydni my čuli reakcyju mnohich stvaralnikaŭ nakont hetaha abnaŭleńnia, — cytuje pradstaŭnika YouTube vydańnie TechCrunch. — Hetaja zvarotnaja suviaź važnaja dla nas, i my znachodzimsia ŭ pracesie ŭniasieńnia niekatorych karekcirovak u hetuju palityku, kab vyrašyć ich prablemy. Nieŭzabavie my źviažamsia z našaj supolnaściu stvaralnikaŭ, jak tolki ŭ nas budzie čym padzialicca».
U listapadzie YouTube pašyryŭ svajo vyznačeńnie hvałtu za miežy realnaha śvietu: tak, hvałtoŭnaje źmieściva ŭ hulniach taksama pačało rasceńvacca jak demanstracyja hvałtu. Źmieny ŭ palitycy nienarmatyŭnaj leksiki byli bolš rezkija. YouTube abviaściŭ, što bolš nie budzie ličyć «piekła» (hell) i «čort» (damn) niecenzurnymi słovami, ale ŭsie inšyja niecenzurnyja słovy buduć abjadnoŭvacca, a nie adroźnivacca pa stupieni surjoznaści (naprykład, takija słovy, jak «łajno» (shi*) i «bł****» (fu**), ciapier buduć razhladacca adnolkava nieprymalna). Akramia taho, zhodna z novaj palitykaj, «nienarmatyŭnaja leksika, jakaja vykarystoŭvajecca ŭ naźvie, zastaŭcy abo ŭ pieršych 7 siekundach videa ci vykarystoŭvajecca paśladoŭna ciaham usiaho videa, nie moža prynosić rekłamny dachod».
Kali łajanka źjaŭlajecca paśla pieršych 8 siekund videa, jano pa-raniejšamu maje prava na manietyzacyju. Ale ž źmieny paŭpłyvali na vialikuju kolkaść videa, mnohija ź jakich byli zroblenyja zadoŭha da taho, jak jany byli abjaŭlenyja. Stvaralniki pačali zaŭvažać heta prykładna ŭ kancy śniežnia: novyja praviły abmiažoŭvali achop starych videa i prava na rekłamu.
Pakul YouTube nieachvotna adkazvaje na dadatkovyja pytańni pra svaju dalejšuju palityku, ale stvaralniki čakajuć, što novyja praviły ŭsio ž pierastanuć raspaŭsiudžvacca na staryja videa. Da taho ž pakul niajasna, jak adabjucca novyja praviły na videa na inšych movach, akramia anhlijskaj.
