Znajści
Ałharytmičny łacinski varyjant
04.01.2023 / 22:097RusŁacBieł

Ź ciažkaściu ruchajecca, nie moža doŭha trymać navat telefon. Byłaja futbolnaja «zorka» Siarhiej Hocmanaŭ ciažka zachvareŭ

U 2022-m futbolnaje minskaje «Dynama» adznačała 40-hodździe pieramohi ŭ čempijanacie SSSR. Mnohija hulcy toj lehiendarnaj kamandy razdavali intervju, u jakich uspaminali tryumf. A voś Siarhiej Hocmanaŭ, jaki hulaŭ u «Dynama»-1982 u paŭabaronie, kamientaryjaŭ nie davaŭ, choć u «załatym» siezonie jon pravioŭ 31 matč i zabiŭ dva miačy. Pryčyna hetaha — u ciažkaj chvarobie byłoj «zorki», piša «Trybuna».

Apošnija niekalki hadoŭ pra Hocmanava havorać tolki jaho byłyja adnakłubniki — i pryčyna tamu niaradasnaja. Michaił Vierhiajenka ŭ lipieni zhadaŭ, što 63-hadovy eks-futbalist ciažka chvareje. U śniežni Siarhiej Alejnikaŭ adznačyŭ, što padtrymlivaje suviaź z Hocmanavym, ale pra padrabiaznasci stanu siabra nie raskazaŭ.

«Trybuna» nieadnarazova sprabavała źviazacca z Hocmanavym, ale biespaśpiachova. Tym nie mienš žurnalistam udałosia daviedacca, jak žyvie ciapier były čempijon SSSR.

U siaredzinie 1990-ch Hocmanaŭ, paśpieŭšy krychu pahulać u čempijanacie Biełarusi i navat stać aŭtaram pieršaha hoła ŭ historyi tolki što stvoranaj nacyjanalnaj zbornaj našaj krainy, źjechaŭ ź Biełarusi ŭ ZŠA — bo jahonaj žoncy Volzie Koval, prafiesijnaj himnastcy, prapanavali papracavać trenieram u Minieapalisie.

Sam Siarhiej biez futboła za akijanam nie zastaŭsia: prajšoŭ prahlad u «minornaj» «Miniesocie Tander» i vystupaŭ za kalektyŭ da 1998 hoda, atrymlivaŭ pa dźvie tysiačy dalaraŭ u miesiac i pieršy čas paśla pierajezdu adzin zabiaśpiečvaŭ siamju (kłub, dzie pracavała žonka, zbankrutavaŭ).

U 1998-m Hocmanaŭ zaviaršyŭ karjeru hulca, ale z futboła nie pajšoŭ: pracavaŭ trenieram u adnoj ź dziciačych akademij, zajmaŭsia z hrupaj dziaŭčynak 15-16 hadoŭ. Praŭda, zarobak byŭ niedastatkova vialiki, tamu paralelna z treniroŭkami Hocmanaŭ pracavaŭ kiroŭcam školnaha aŭtobusa, a potym jašče i dapamahaŭ žoncy ŭ inšaj zale ŭ jakaści mieniedžara.

Syny Siarhieja — Alaksandr i Andrej — taksama niekalki hadoŭ pryśviacili prafiesijnamu futbołu. Pieršy ŭ siaredzinie 2000-ch hulaŭ za «Kałarada Repidz» i «Miniesota Tander», ale z-za traŭmy kalena byŭ vymušany zaviaršyć karjeru, a małodšy Andrej da 2016-ha vystupaŭ za niekalki kłubaŭ u Miniesocie.

Užo daŭno nie byŭ u Biełarusi, mocna chvareje

Pa pryznańni samoha Siarhieja Hocmanava, jon da pary staraŭsia prylatać u Minsk, kali byŭ volny čas. Eks-futbalist byŭ u Biełarusi ŭ 2012 hodzie, kali «Dynama» śviatkavała 30-hodździe pieramohi ŭ čempijanacie SSSR, pabyvaŭ u vioscy, dzie pravioŭ častku dziacinstva, sustreŭsia ź siabrami i eks-adnakłubnikami. A voś u 2017-m, kali ŭ Minsku «Dynama» adznačała jubilej, a vieterany «załatoj» kamandy hulali na «Traktary» ź lehiendami maskoŭskaha «Spartaka», Hocmanava navat nie paklikali.

«Pa pracy byŭ zaniaty. Dy mnie i nie telefanavali z zaprašeńniem, razumieli, što sarvacca ź Miniesoty kudy składaniej, čym z Maskvy, naprykład. Plus dzieci i ŭnuki patrabujuć uvahi», — tłumačyŭ tady eks-hulec «bieła-błakitnych».

Tady ž Hocmanaŭ raspavioŭ, što pa-raniejšamu kiruje školnym aŭtobusam, a ŭviečary śpiašajecca dadomu, «paviačerać i da televizara abo kampjutara, naviny pačytać-pahladzieć». Pry hetym svoj uzrovień anhlijskaj, niahledziačy na doŭhija hady ŭ ZŠA, Siarhiej aceńvaŭ jak niedastatkova dobry, tamu amierykanskaje TB nie hladzieŭ. Ale i za navinami z radzimy eks-futbalist taksama sačyŭ nie nadta pilna.

«Ci viedaju, što adbyvajecca ŭ Biełarusi? Nie asabliva. Viedaju, što hrošy pamianialisia, što ŭ krainie tak sabie z ekanomikaj. Kali pryjazdžaju, baču, što mienš stała ŭśmiešak. Žyćcio ciažeje. Chacia pa televizary hladžu: usio cudoŭna ŭ krainie, akazvajecca. Usio kvitnieje i raźvivajecca», — kazaŭ Hocmanaŭ u 2017-m.

Heta było apošniaje na dadzieny momant vialikaje intervju čempijona SSSR-1982. Z taho času proźvišča Hocmanava źjaŭlajecca ŭ ŚMI tolki ŭ nastalhičnych materyjałach i zhadkach ad byłych adnakłubnikaŭ, jakija biez padrabiaznaściaŭ kazali, što Siarhiej ciažka chvory.

Jak «Trybunie» ŭdałosia daviedacca, prablemy Hocmanava sa zdaroŭjem pačalisia mienavita ŭ 2017-m. Tady adna ruka eks-futbalista praktyčna straciła svaje funkcyjanalnyja zdolnaści — hruba kažučy, prosta visieła. Na praciahu nastupnaha hoda Hocmanaŭ zdaŭ jašče macniej, a lekary zapadozryli chvarobu Parkinsona. Heta dehienieracyjnaje zachvorvańnie hałaŭnoha mozhu, pry jakim surjozna parušajucca funkcyi ruchu, paharšajecca pamiać i razumovyja zdolnaści — uvohule, čałavieku stanovicca vielmi składana isnavać biez starońniaj dapamohi. Zrazumieła, na pracu pryjšłosia zabycca — dy i naohuł Siarhiej staŭ vielmi redka vychodzić z chaty.

Pa našych źviestkach, zaraz Hocmanaŭ ź ciažkaściu moža samastojna pierasoŭvacca — dla hetaha navat vykarystoŭvajecca invalidnaja kalaska. Siły pakinuli eks-futbalista nastolki, što jon navat nie moža doŭha trymać u rukach telefon. Plus, pavodle roznych źviestak, pačali admaŭlać niekatoryja ŭnutranyja orhany, u pryvatnaści nyrki.

Naturalna, u takim stanoviščy nie da taho, kab davać intervju, a tym bolš prylatać u Minsk. Na radzimie Hocmanaŭ nie byŭ užo kala čatyroch hadoŭ. Nu a žonka i syny, niahledziačy na zaniataść na svaich pracach, imknucca jak maha bolš času addavać mužu i baćku.

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
Панылы сорам
Ха-ха
Ого
Сумна
Абуральна
1
Uład/adkazać/
05.01.2023
daviedka,Pra baksioraŭ - zhodzien. Darečy, ŭdar pa padbarodku bolš niebiaśpiečny dla hałaŭnoha mozhu, čym ŭdar pa iłbie. A baksior takija ŭdary atrymoŭvaje sotni.
0
daviedka/adkazać/
05.01.2023
Ja dažie nieprofieśsionalnyje miahkije miači hołovoj priedpočitał nie prinimať, potomu čto eto dostatočno čuvstvitielno dla hołovy, a ot profieśsionalnoho žiostkoho miača, priletievšieho v hołovu ili priniatoho śvierchu hołovoj, i sotriasienije s nieprivyčki možno oŝutiť. Poetomu sam principialno hołovu dla etoho nie zadiejstvovał s samoho dietstva, no byli lubitieli i obratnoho, čto było zamietno po ich uśpievajemosti v školnyje hody... 
1
chto puściŭ žachčynu ŭ fuch-bolnuju temu?/adkazać/
05.01.2023
pavodle daviedka, kab być vumnym, dastatkova prosta nie bicca hałavoj ab ścienu?
Pakazać usie kamientary
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera