Znajści
Ałharytmičny łacinski varyjant
10.05.2022 / 16:08RusŁacBieł

Kaho słuchać na «Jeŭrabačańni»: subjektyŭny top-10 ad «Našaj Nivy» 

10 maja ŭ Turynie projdzie pieršy paŭfinał «Jeŭrabačańnia-2022». I chacia Biełaruś u hety raz pa-za miežami konkursu, padzieja pa-raniejšamu vyklikaje cikavaść. Skłali dla vas top-10 kankursantaŭ, na jakich abaviazkova treba źviarnuć uvahu na sioletnim «Jeŭra».

Kalush Orchestra. Fota: eurovisionfun.com

Italija: pryhožy chit ad finalista «Jeŭrabačańnia-2019»

Italjanski śpiavak jehipieckaha pachodžańnia Mahmood (Alasandra Mamud) užo ŭdzielničaŭ u «Jeŭrabačańni» ŭ 2019 hodzie. Tady jon pradstaviŭ pieśniu Soldi, ź jakoj zaniaŭ druhoje miesca i sastupiŭ niderłandcu Dunkanu Łoŭrensu. 

U hety raz kampaniju Mamudu składzie 18-hadovy śpiavak BLANCO. Nazva ich mieładyčnaj pieśni Brividi pierakładajecca jak «dryžyki», i heta mienavita toje, što vy adčujecie, kali pačujecie hety tvor. Sam ža tvor pryśviečany svabodzie kachać i kazać pra hetaje kachańnie, nie bajacca ŭłasnych pamyłak i niedachopaŭ.

Małdova: viasiołaja pieśnia ź jaŭnym palityčnym padtekstam

Toj, chto pastajanna hladzić «Jeŭrabačańnie», viedaje — niekatoryja artysty nie mohuć abmiežavacca adnoj pajezdkaj na hety konkurs i viartajucca tudy znoŭ i znoŭ. Hetak zdaryłasia, naprykład, z małdaŭskim hurtom Zdob si Zdub, jaki vystupaŭ na Jeŭrabačańni ŭ 2005 i 2010 hadach. U hety raz «Zduby» stvaryli sumiesny chit Trenuletul razam z kalektyvam Advahov Brothers, i heta miełodyja, jakuju vy nie zmožacie zabyć.

Sensavy bok pieśni nie mienš važny. Małdavanie praśpiavajuć sa sceny ŭ Turynie pra ciahnik pamiž Kišyniovam i Bucharestam, pra dźvie krainy, Małdovu i Rumyniju, i pra nieparazumieńnie — ci to heta adna kraina, ci to dźvie. Hetyja słovy robiacca zrazumiełymi, kali zhadać, što ŭ Małdovie ŭžo daloka nie pieršy hod kažuć pra mahčymaść abjadnańnia z Rumynijaj. Tamu i ciahnik, pra jaki śpiavajuć «Zduby», idzie «z Uschodu na Zachad» — to-bok da prazachodniaj Rumynii.

Ukraina: adnaznačny favaryt konkursu sa składanaj historyjaj

Kalush Orchestra i ich pieśnia «Stefania» — mała kamu jašče tak praročać pieramohu na sioletnim «Jeŭrabačańni». Hetamu spryjaje jak toje, što Ukraina praz vajnu ciapier va ŭsich na słychu, tak i toje, što «Stefania» — niesumnienna jeŭravizijny farmat: jarki prypieŭ, jaki lohka zapaminajecca, etničnyja notki i trochi frykavatyja kaściumy śpievakoŭ.

Ale ž jość i svaja łyžka dziohciu: Kalush Orchestra — nie tyja, chto pieršapačatkova byŭ vybrany ad Ukrainy na «Jeŭrabačańnie». Nacadbor vyjhrała Alina Paš z mahičnym tvoram «Cieni zabytych prodkaŭ» (abaviazkova jaho pasłuchajcie!). Ale ž paźniej śpiavačku zapadozryli ŭ padrobcy daviedki pra toje, što jana zakonna naviedvała akupavany Krym. Ukrainskija ŚMI padniali skandał, i Paš była vymušanaja admovicca ad udziełu ŭ konkursie na karyść Kalush Orchestra, jakija zaniali ŭ nacadbory druhoje miesca.

Vialikabrytanija: kaśmična-frykavaty anhličanin z Tyktoka

Vykanaŭcu ad Brytanii zavuć Sem Rajder, i hety dziŭny doŭhavałosy anhličanin ź pieśniaj pra kasmanaŭta nasamreč adzin z favarytaŭ «Jeŭrabačańnia». Pa jaho słovach, heta «miłaja piesieńka pra toje, jak heta — być astranaŭtam».

Rajdera dobra viedajuć u Tyktoku, dzie jon sabraŭ ažno 12 miljonaŭ padpisčykaŭ i nie mienš kaśmičnyja, čym jon sam, sto miljonaŭ łajkaŭ. Siarod zorak, jakim padabajucca muzyčnyja kaviery Rajdera (ich jon i publikuje ŭ Tyktoku), nazyvajuć Džaścina Bibiera, Siju i Ališu Kis. «Jeŭrabačańnie» — reč nie zaŭsiody pradkazalnaja, tamu ciažka skazać, što čakaje na im Rajdera, ale jaho tvor — sapraŭdy jakasnaja pop-pieśnia.

Ispanija: niachaj budzie viečaryna!

Ryzykniom pradkazać, što ispanku Saru Šanel z tvoram SloMO naŭrad ci čakaje vysokaje miesca na «Jeŭrabačańni». Ale ž hety konkurs — heta jašče i vialiki kancert i cudoŭnaje śviata muzyki, i Ispanija dakładna zrobić jaho viesialejšym.

Šanel — pieršaja žančyna kubinskaha pachodžańnia na scenie «Jeŭrabačańnia», i z saboj jana pryviazie haračyja tancy, šmat blasku i pačućciovaści. Na žal, i tut nie abyšłosia biez skandału: nie ŭsie ŭ Ispanii pryniali paražeńnie bližejšaha sapiernika Šanel, trya Tanxugueiras ź ich pieśniaj na halicyjskaj movie. Siarod niezadavolenych byli navat prafsajuznyja aktyvisty i palityčnyja partyi Halicyi.

Hrecyja: piaščotnaja i hłybokaja dziavočaja bałada

Bałkanskija krainy (i Hrecyja ŭ tym liku) časta pryvoziać na «Jeŭrabačańnie» jarkija pieśni z etničnymi notkami, i za heta ich šmat chto lubić. U hety ž raz zamiest etniki my atrymoŭvajem šykoŭnuju baładu Die Together ad pryhažuni Amandy Tenfjord (napałovu narviežki), hołas jakoj trochi nahadvaje maładuju Adel.

Jaje tvor — emacyjny, pryhožy i vielmi ramantyčny. Heta minimalistyčnaja i spakojnaja pieśnia, jakich mała na «Jeŭrabačańni», ale tamu jany tak i vydzialajucca. Prykład — Dunkan Łoŭrens i jaho Arcade, jakaja pryniesła niderłandcu pieramohu ŭ 2019 hodzie.

Aŭstralija: asabistaja pieśnia ad samaj niezvyčajnaj krainy

Dla tych, chto redka hladzić konkurs i ciapier ździviŭsia pry słovie «Aŭstralija»: pradstaŭniki ad hetaha kantynienta ŭžo z 2015 hoda voziać na «Jeŭrabačańnie» jakasnuju pop-muzyku. U hety raz nam z vami pradstaviać Šełdana Rajli ź pieśniaj Not the Same («Nie taki ž»), i nazva tvora — absalutna abhruntavanaja.

Sprava ŭ tym, što Šełdan vyras u vielmi relihijnaj i zakrytaj siamji, taksama ŭ dziacinstvie ŭ jaho znajšli sindrom Aśpierhiera, jaki vyklikaje ciažkaści ŭ kamunikacyi. Adnojčy jaho siabar napisaŭ jamu paviedamleńnie padtrymki: «Ty nie taki ž, i heta narmalna!». Paźniej Šełdan znajšoŭ hetaje paviedamleńnie i vyrašyŭ pieratvaryć jaho ŭ pieśniu, i ciapier hetaja pieśnia pradstaŭlaje jaho krainu.

Narviehija: tyja samyja fryki, jakich vy šukali

Važnaja niapisanaja tradycyja «Jeŭrabačańnia»: kožny hod na hetym konkursie pavinny być fryki. U hety raz adkaznaść za heta na siabie ŭziaŭ narviežski hurt Subwoolfer ź pieśniaj Give that wolf a banana («Dajcie hetamu vaŭku banan»).

Padčas nacadboru narviežcy vystupali ŭ žoŭtych vaŭčynych maskach i raspaviadali ŭ intervju pra padarožžy ź Miesiaca i svajo paviedamleńnie dla ziamlan. I jak by vy da ich ni stavilisia, žvavyja i niezvyčajnyja Subwoolfer — kalektyŭ, bieź jakoha hetaje «Jeŭrabačańnie było b niapoŭnym».

Sierbija: vałasy Miehan Markł i myćcio ruk na scenie

«U čym ža sakret zdarovych vałasoŭ Miehan Markł?» — zapytvaje Kanstrakta ź Sierbii ŭ pieršym ža radku pieśni In Corpore Sano. Na scenie jana myje ruki, apładziruje niaviadoma kamu i adnačasova śpiavaje i razvažaje.

U vystupie Kanstrakty možna znajści adsyłki da palityki, miedycynskaj sistemy (kažuć, u Sierbii ź joj ciažka) i da nierealistyčnych standartaŭ pryhažości. Rytm pieśni lohka zapaminajecca, a pastanoŭka vielmi mastackaja — źviarnicie ŭvahu na hety vystup.

Niderłandy: apovied pra važnaje pa-hałandsku

Voś jon — jašče adzin favaryt «Jeŭrabačańnia». Śpiavačka S10 stvaryła dla konkursu pieśniu na hałandskaj movie, pryśviečanuju sacyjalna važnaj temie psichałahičnaha zdaroŭja. Dla maładoj hałandki, jakaja sama pieraniesła depresiju, scena «Jeŭrabačańnia» — nibyta vialikaja płatforma, jakaja dazvolić joj hučna raspavieści pra važnuju źjavu.

Śpiavačka kaža, što ŭ kožnaha byvajuć ciažkija pieryjady ŭ žyćci, i heta — niešta, što nas abjadnoŭvaje. Tamu, jak kaža S10, jana spadziavajecca, što jaje pieśnia dapamoža kožnamu adčuć siabie trochi mienš adzinokim.

«Našu Nivu» finansujuć jaje čytačy — padtrymać prosta

Čytajcie taksama:

«Oj u łuzi čiervona kalina». Hałoŭnyja pieśni ŭkrainskaha zmahańnia AŬDYJA

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
Панылы сорам
Ха-ха
Ого
Сумна
Абуральна
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera