Minskaja nastaŭnica — vučniam: Babaryka — pačvara, pahladzicie na jaho mordu! Jaje syn: Ułada pavinna pamianiacca
U siecivie raspaŭsiudžvajecca cikavaje aŭdyja: na im nastaŭnica ruskaj movy i litaratury minskaj škoły №143 Alena Urajeva dzielicca z vučniami svaimi žyćciovymi pohladami. Naprykład, cytuje Hiebielsa i pryznajecca, što joj ciapier soramna za syna-ajcišnika.
Alena Urajeva
«Naša Niva» źviazałasia z byłymi vučniami nastaŭnicy, jany paćvierdzili: na zapisu pramaŭlaje sapraŭdy Urajeva.
Voś samyja cikavyja cytaty z vystupu Urajevaj.
«Moładź schilnaja da ekstremizmu».
«Ja sama padpisanaja na ŭsie hetyja supołki. […] Ale ja čytaju ŭsio heta z pychaj, baču technałohii, praź jakija vami kirujuć, baču, jak z vami pracujuć. Nie ŭsie darosłyja mohuć bačyć heta. Ja z 2014 hoda hetym cikaŭlusia, kali toje ž samaje zdaryłasia va Ukrainie. Šeść hadoŭ ja vyvučaju hetyja pytańni, cikaŭlusia. I baču ŭsio jak pad kapirku. Toje ž samaje było ŭ Livii, u Juhasłavii, toje ž było ŭ postsavieckich krainach».
«Što śmiešnaha? Ja raskazvaju rečy, jakija nie pračytajecie ŭ internecie!»
«Ja zaklikaju być aściarožnymi, dziesiać razoŭ padumać, što ŭkładvajuć u tvaju hałavu. Vy nie vinavatyja, bo ŭ vašyja hałovy my nie ŭkładvali. Hetyja hadziny infarmavańnia, ad jakich mianie tresła… Zhadajcie, jak jany pravodzilisia i jakija temy byli. Ja zaŭsiody kazała: kali ŭ hetyja hałovy nie ŭkłaści toje, što treba, tudy buduć układvać inšyja.
Nu i nichto nie admianiaŭ słovy Hiebielsa, heta hałoŭny ideołah fašyscki. Jon skazaŭ: chočaš pieramahčy voraha, treba vychavać jaho dziaciej».
«U nas vyrasła dva pakaleńnia kastrulahałovych, jakija siońnia ŭ nas na vulicy. Chodziać, nie razumiejučy, za što chodziać».
«U mianie z maim ajcišnikam toje ž samaje (havorka idzie pra adnaho z synoŭ. Jon padpisaŭ zvarot ajci-supolnaści ab spynieńni hvałtu — Red.). Ja jamu kažu: «Ja taboj hanaryłasia, ty byŭ honar siamji. Ciapier mnie soramna za ciabie, ty nas hańbiš».
«U Litvie zhubili 2/3 nasielnictva. Moładzi pracy niama, jeduć u Jeŭropu, pracujuć aficyjantami, kucharami, prybiralščykami ŭ lepšym vypadku. A ŭ horšym — kakaški za chvorymi babulami i dziadulami niamohłymi prybirajuć. Bo doma zusim niama pracy. Zavody zakryli, sielskuju haspadarku razvalili — usio, nul!»
«Ja svajmu [synu] kazała, kali jon kryčaŭ, što jaho hołas skrali i konkurs na samuju siniuju dupu byŭ: mała! Ja b nie prosta dupy adbiła. Ja b adbiła ŭsio žadańnie viakać! Ja b jazyki paadrazała im usim, kab jany prosta myčali. Bačna, što niepałochanyja i nie bityja. Nievinavatych nie było, chaj nie raskazvajuć!».
«Vy biaspłatna jeździcie siońnia! Navat u saviecki čas školniki płacili za prajezd! Pačatkovaja škoła charčujecca biaspłatna! Chaj tyja, chto viakaje, viarnuć tady hrošy!»
«Mamki z kalaskami, ich uvohule treba pazbaŭlać baćkoŭskich pravoŭ… Švendajucca, prykryvajučysia dziećmi. Jakich vyradkaŭ, nieŭraścienikaŭ jany vyhadujuć! Bo ŭ 1-2 hady dzicia nie razumieje, a paśla idzie na padkorku!»
«Ja jašče tydzień tamu kazała, što buduć razdavać narkatu, harbatu, kavu, vadu, piačeńki. Usio, užo razdajuć!»
«ŁHBT nie było, Jeŭrasajuzaŭ nie było, ja kazała: buduć! Usio, na hetych vychodnych usie pavyłazili! Ściahi ukrainskija, ściahi amierykanskija, ŁHBT-supołki, usia hetaja piederastyja i žanočaja, i mužčynskaja! Da! Da! Da! Vy ž bačyli heta ŭsio!
Biełarusy, što vy, atupieli? Usie takija debiły ci što? Što sa studentami robiać? Idyjatyzm!
Z pravavoha pola namahajucca vyjści i raschistać!
«Ja 10 hadoŭ nie mahu biełaruskaje telebačańnie hladzieć, kali prezident vystupaŭ, ja namahałasia pieraklučyć. Ciapier, kali ja jaho baču, ja spyniajusia, słuchaju. Bo adziny razumny prezident, daj Boh jamu zdaroŭja, kab jon vytryvaŭ heta ŭsio i jamu dapamahli tyja siły, na jakija jon abapirajecca».
«Moj mały kryčaŭ pra Babaryku. Ja kažu: ty pahladzi na jaho mordu! Jon ža kankretnaja pačvara, prabačcie, i bryda!».
Syn Aleny Urajevaj, na jakoha jana šmat razoŭ spasyłałasia ŭ svaich pramovach, pahadziŭsia prakamientavać dla «Našaj Nivy» słovy maci.
«Moj kamientar z nahody zapisu: luby punkt hledžańnia maje prava być, tym bolš pluralizm mierkavańniaŭ — heta toje, što chaciełasia b bačyć u novaj Biełarusi.
Ale sapraŭdy niemahčyma apraŭdać niezakonny hvałt nivodnym arhumientam. Ja dumaju, što mienavita z-za pary fraz, jakija ŭskosna apraŭdali mietady zadušeńnia pratestaŭ, hety zapis trapiŭ u sietku.
I ja dumaju, što hetyja frazy byli skazany prosta na emocyjach, jak achoŭnaja reakcyja. Achoŭnaja reakcyja ad biaśsilla, što ŭsio ž taki biahučaja palityčnaja sistema burycca. Dla ludziej, chto hetaj sistemaj byŭ zadavoleny, baluča na heta hladzieć.
Tamu chaciełasia b zaklikać usprymać hetyja krychu emacyjnyja frazy nie jak apraŭdańnie hvałtu, a prosta jak častku emocyj. A pa ŭsim astatnim skazanym — prosta pryniać, što jość inšy punkt hledžańnia. Chutčej za ŭsio, niejkaja častka praŭdy tam taksama budzie. Takija šabłony pavodzin, z abrazaj apanientaŭ, tranślujucca nam z boku ciapierašnich uładaŭ. A mnohija ludzi na roznych pasadach u nas heta mižvolna kapirujuć. Tamu davajcie zadumajemsia ab korani prablemy.
Čamu mama skazała, što ja hańblu siamju — heta tolki z-za taho, što ja prytrymlivajusia inšaha punktu hledžańnia, nie bolš za toje. Ja prychilnik taho, što ŭ nas pavinna pamianiacca ŭłada.
Heta praŭda, što, pracujučy ŭ IT, ja adčuvaju siabie dobra pry ŭładzie Łukašenki. Ale mnie zdajecca, uličvajučy biahučyja pratesty, što ŭ nas užo niama vybaru adkacić usio nazad i žyć jak raniej.
Ja baču vybar pamiž paharšeńniem ekanamičnaj situacyi, kali pratesty buduć praciahvacca, i pamiž čymści niavyznačanym, kali biahučaja ŭłada źmienicca. Ja padtrymlivaŭ kandydata Babaryku, bo mnie blizkaja asnoŭnaja ideja jahonaha štaba, što ŭ kožnaj spravie pavinien pracavać prafiesijanał. I ja nie baču prafiesijanalizmu ŭ dziejańniach biahučaj ułady pa źnižeńni pratestaŭ. Tamu ja rablu vysnovy, što pry zachavańni ciapierašniaj ułady ekanomika našaj krainy budzie tolki paharšacca».
«Naša Niva» sprabavała źviazacca z samoj nastaŭnicaj. Alenie Urajevaj pieradali, što jaje šukaje karespandent, ale jana nie zachacieła vyjści na suviaź.
U škole №143 paviedamili, što ŭ kursie pałymianaj pramovy nastaŭnicy. Nastupstvy buduć, ale jakija, pakul niezrazumieła.
«Z zapisam my aznajomilisia. Heta nie pakinuć prosta tak. Ale pakul biez kamientaroŭ: my sami asensoŭvajem heta», — paviedamiła namieśnica dyrektara Aksana Pietrusievič.
