«Uradžaj» kupałaŭcaŭ, teatr Sinhapura i contemporary cyrk: novaja padborka anłajn-vidoviščaŭ na tydzień
Na čarhovym tydni navat u samaizalacyi vy možacie adkryć dla siabie jašče niekalki teatralnych placovak. Hetym razam dałučajemsia da Kupałaŭskaha teatra, słuchajem Vienskuju opieru, hladzim teatralnuju kamiedyju ź Sinhapura, paznajom izrailski «Hiešer» i «idziom» u šviedski contemporary cyrk.
Paniadziełak: «Uradžaj», Kupałaŭski teatr
Fota kupalauski.by
Teatr imia Janki Kupały, dla jakoha pandemija karanavirusa prypała na jubilejny soty siezon, hatovy pakazać anłajn adzin z najlepšych śpiektaklaŭ svajoj kamiernaj sceny. «Uradžaj» byŭ pastaŭleny pa pjesie viadomaha sučasnaha dramaturha Paŭła Pražko, što pachodzić ź Biełarusi, ale na biełaruskaj scenie hučyć nie časta. Pastanoŭka Dźmitryja Ciško — tut zadziejničana ŭsiaho čatyry akciory — z humaram raskazvaje pra sučasnaje pakaleńnie: hieroi «Uradžaju» musiać sabrać jabłyki, ale kožnaja drobnaja zadača, što ŭźnikaje pierad niaŭkludami, pieraŭtvarajecca ledź nie ŭ epapieju.
Dzie hladzieć: u mabilnaj pryładzie VOKA albo na sajcie voka.tv
Kali hladzieć: a 19-j 4 maja
Aŭtorak: «Jaŭhienij Aniehin», Vienskaja dziaržaŭnaja opiera
Adna z hałoŭnych opiernych placovak śvietu — mienavita tut prachodziać znakamityja Vienskija bali — choć i nie moža zaprasić hledačoŭ u svoj budynak, zatoje pradstaŭlaje raskošnuju prahramu anłajn-pakazaŭ pastanovak apošnich hadoŭ. Kožny dzień novaja opiera albo balet, a na 5 maja prypadaje tranślacyja adnoj z najnoŭšych rabot teatra — heta budzie dobra znajomy «Jaŭhienij Aniehin» Piatra Čajkoŭskaha, uvasobleny Falkam Rychteram u 2019 hodzie. U płanie na inšyja dni — opiery «Don Kichot» i «Vierter» Žula Masne, «Purytanie» Vinčenca Bielini, «Volny strałok» fon Vebiera, balet «Pier Hiunt» Edvarda Hryha dy inšyja.
Dzie hladzieć: na sajcie Vienskaj opiery pa rehistracyi
Kali hladzieć: kožny dzień a 20-j pa biełaruskim časie
Sierada: Chinchilla Arschloch, waswas, teatralny fiestyval Theatertreffen (Niamieččyna)
Fota berlinerfestspiele.de
Heta pavinien byŭ być paŭnavartasny dvuchtydniovy piaćdziasiat siomy teatralny fiestyval sa śpiektaklami, abmierkavańniami i dyskusijami. Ale kamanda Theatertreffen nie razhubiłasia z nahody pandemii i arhanizavała fiestyval anłajn — z 1 da 9 maja jon pakazvaje sučasnyja niamieckija pastanoŭki, a taksama arhanizuje anłajn-razmovy i debaty. Śpiektakl «Chinchilla Arschloch, waswas» — kapradukcyja niekalkich teatralnych kalektyvaŭ Hiermanii — budzie pakazvacca z anhlijskimi subcitrami. Paśla adbudziecca abmierkavańnie pastanoŭki z udziełam tvorčaj hrupy (ale ŭžo bieź pierakładu). U prahramie fiestyvalu jašče piać niamieckich teatralnych rabot — raskład možna znajści na placoŭcy Theatertreffen.
Dzie hladzieć: pa spasyłcy
Kali hladzieć: śpiektakl budzie pakazany a 21-j 6 maja i zastaniecca ŭ dostupie na 24 hadziny, abmierkavańnie pastanoŭki — u 22.50.
Čaćvier: «Nahlad», teatr Wild Rice (Sinhapur)
Fota wildrice.com.sg
Sinhapurski teatr Wild Rice prapanavaŭ u dni «kavidu» zabaŭlać hledačoŭ u kamforcie haścioŭni, tamu pakazvaje svaje chity anłajn. U hetyja dni — kamiedyju «Nahlad» pavodle Tomasa Lima, što «zachoplivaje» i «razryvaje sercy». Pa siužecie dačka svarlivaha 71-hadovaha piensijaniera, jaki tolki pieražyŭ insult, najmaje dla baćki chłopca ź Indaniezii ŭ jakaści siadziełki, a z hetaha pačynajecca ŭvieś zamut. Pa čaćviarhach Wild Rice taksama arhanizuje abmierkavańni pakazanych śpiektaklaŭ — da razmovy možna dałučycca jakraz u čaćvier 7 maja.
Dzie hladzieć: spasyłka dastupnaja na sajcie teatra
Kali hladzieć: da 8 maja, abmierkavańnie — u 16.00 pa biełaruskim časie 7 maja
Piatnica: Luby z vykładzienych śpiektaklaŭ teatra «Hiešer» (Izrail)
Fota sa śpiektakla King David Report
U Tel-Avivie jość taki ŭšanavany fiestyvalnymi ŭznaharodami teatr «Hiešer», nazva jakoha pierakładajecca jak «most». Jon byŭ stvorany emihrantami z Savieckaha Sajuza i adpaviedna svajoj naźvie staŭ mostam pamiž ruskaj i izrailskaj kulturaj. U čas pandemii «Hiešer» napoŭniŭ svoj YouTube-kanał zapisami pastanovak roznych hadoŭ. Siarod ich, naprykład, śpiektakli pavodle łaŭreata Bukieraŭskaj premii Davida Hrosmana, pavodle viadomaha izrailskaha piśmieńnika Mieira Šaleva albo pavodle piśmieńnika i žurnalista Jorama Kaniuka. Častka vykładzienych u ahulny dostup zapisaŭ supravadžajecca subcitrami.
Dzie hladzieć: na YouTube-kanale teatra
Kali hladzieć: kali zaŭhodna
Subota: «Intertejnment. Mahčyma ŭsio», płatforma Okko (Rasija)
Fota Okko Teatr
Płatforma Okko i režysior Ivan Vyrypajeŭ, jakoha vy možacie viedać u tym liku pa kino, pradstavili rabotu ŭ asobnym žanry filma-śpiektakla. «Intertejnment. Mahčyma ŭsio», jaki abiacaje «śmiešna i lohka» raskazać «pra składanaje i duchoŭnaje», dastupny na Okko — praŭda, nie biaspłatna — z 17 krasavika. Dvuch i adzinych hierojaŭ ihrajuć sam Vyrypajeŭ i jaho žonka, polskaja aktrysa Karalina Hruška. Pa siužecie jany prychodziać hladzieć śpiektakl, ale ŭrešcie musiać raźbiracca, dzie tut realnaść, a dzie vydumka.
Dzie hladzieć: na płatformie Okko
Kali hladzieć: łavicie momant
Niadziela: Cyrkavoje šou Circus Cirkör (Šviecyja)
WILAC Into a Cirkus Mind from Cirkus Cirkor on Vimeo.
U jakaści višańki na torcie — šviedski kalektyŭ Circus Cirkör jak adzin z hulcoŭ «novaha cyrka», što sumiaščaje cyrkavyja numary ź inšymi vidami mastactva kštałtu muzyki, tanca albo dramteatra. Para pastanovak Circus Cirkör, jakija to zachaplajuć, to prymušajuć śmiajacca, to vyklikajuć zamiłavańnie, z nahody pandemii zaraz dastupnyja na sajcie kalektyvu.
Dzie hladzieć: na sajcie cyrka
Kali hladzieć: pakul jość u dostupie
