Знайсці
25.11.2022 / 17:251РусŁacБел

Дзе выгадней купляць прадукты — на рынку, у гіпермаркеце ці ў краме каля дома?

Раз на сезон журналісты «Камсамольскай праўды» разам са сваімі чытачамі разлічваюць «індэкс баршчу»: глядзяць, колькі каштуе базавы набор прадуктаў для гэтага супу ў краме фармату «ля дома», у найбліжэйшым гіпермаркеце і на мінскім Камароўскім рынку. Чарговы замер правялі ў канцы лістапада. Арыентацыя — цэны прадуктаў за кілаграм, прынцыпова бяруцца самыя танныя тавары.

Крама «ля дома»: «Залатая» пятрушка

Аснова баршчу — буракі: яны тут каштуюць 71 капейку, цалкам прыстойна выглядаюць, пругкія. Само сабой, беларускай вытворчасці. Кілаграм рэпчатай цыбулі таксама нараканняў не выклікае, ён абыдзецца ў 1 рубель 40 капеек. Побач морква сярэдняга памеру: 85 капеек. Спатрэбіцца і бульба, 71 капейка за кіло. Капуста таксама ёсць, праўда, качаны не самыя маленькія, а кілаграм каштуе 0,85 рубля.

Цэны не самыя нізкія, але і не самыя высокія.

Фота: чытач «КП», носіць ілюстрацыйны характар

Часнок, як сігналізуе цэннік, кітайскай вытворчасці: 8 рублёў 23 капейкі, бяром галоўку на 100 грам (82 капейкі). Па суседстве — турэцкія таматы, невялікага памеру. Яны якраз на зніжцы (8%), і кілаграм, які патрэбны, каштуе 5,99 рубля.

Трохі энергіі і настойлівай мэтанакіраванасці — і можна адшукаць пятрушку. Праўда, цана кусаецца: 40-грамовая ўпакоўка абыдзецца ў 1,27 рубля. А хацелася б дзве…

Пятрушка ў асенне-зімовы перыяд каштуе нятанна. Фота: чытач «КП», носіць ілюстрацыйны характар

Праблемы ўзніклі з ялавічынай (мэтанакіравана шукалі лапатачную частку і ніякую іншую). Ялавічыны няма, але гэта крама крокавай даступнасці, вялізнага асартыменту там ніхто і не чакае. Аднак побач ёсць яшчэ адзін магазін — фірмовая гандлёвая кропка аднаго з беларускіх мясакамбінатаў. 20 рублёў 32 капейкі папаўняюць нашы выдаткі, а кілаграм мяса — наш кошык.

Фота: чытач «КП», носіць ілюстрацыйны характар

Увесь базавы набор прадуктаў набыты. Такім чынам, вялікі рондаль духмянага наварыстага баршчу будзе каштаваць 42 рублі 23 капейкі.

Гіпермаркет: кіло ялавічыны за 24 рублі без адной капейкі

У гіпермаркеце ялавічына нятанная, назваць выбар багатым таксама цяжка. Так ці інакш, кіло — 23 рублі 99 капеек.

Фота: чытач «КП», носіць ілюстрацыйны характар

Буракі ёсць двух відаў: «Цыліндрычныя, Беларусь» і «Буракі, Беларусь», першыя каштуюць 97 капеек, другія — 69 капеек. Бяруцца другія, увогуле арыентацыя — на самыя танныя прадукты ў сваёй катэгорыі.

У гіпермаркеце пятрушка таннейшая, чым у краме крокавай даступнасці. Фота: чытач «КП», носіць ілюстрацыйны характар

Самыя недарагія памідоры: ёсць па 6,89 рубля, ёсць па 4,71, апошнія займаюць сваё ганаровае месца ў кошыку. На прылаўку чатыры віды кітайскага часнаку, адрозніваюцца яны, па ўсёй верагоднасці, галоўным чынам фасоўкай, каштуюць 7,99 рубля.

Фота: чытач «КП», носіць ілюстрацыйны характар

100-грамовая галоўка абыходзіцца ў 80 капеек. Кілаграм белакачаннай капусты — 69 капеек (дарэчы, у гіперы, як аказалася, самая танная капуста). Кілаграм цыбулі — 1,21 рубля, а кілаграмы морквы і бульбы па цане аднолькавыя — і тая, і другая каштуюць 71 капейку. Сто грамаў свежай пятрушкі можна ўзяць нават на вагу — выйшла плюс 2 рублі 15 капеек.

Агульны кошт усіх пакупак — 35 рублёў 66 капеек.

Камароўка: класныя беларускія памідоры з Пінска па 5 рублёў

Закупіцца прадуктамі для баршчу на цэнтральным рынку Мінска — Камароўцы — можна без праблем. Ды і настрой там вось-вось стане пераднавагоднім. На Камароўцы ўжо на ўсю моц рыхтуюцца да сустрэчы Новага года.

Фота: чытач «КП», носіць ілюстрацыйны характар

Адзінае: прадаўцы, якія гандлююць гароднінай-садавіной ды зелянінай, перабраліся на тэрыторыю крытага рынку. 

Фота: чытач» КП», носіць ілюстрацыйны характар.

Рынкавы гандаль прапануе цыбулю па 2 рублі за кіло, моркву можна знайсці і па 2 рублі, і па 1 рублю, ёсць нават за 99 капеек, яна і бярэцца.

Багаты выбар бульбы, цэны на яе розняцца: хочаш — два рублі за кіло, хочаш — 1,89, хочаш — паўтара. Бярэцца за 1 рубель 29 капеек, яна небуйная, але ў суп усё адно рэзаць.

Прадаўцы перабраліся пад дах. Фота: чытач «КП», носіць ілюстрацыйны характар

Радуюць вока памідоры. Цэны на іх — розныя: ёсць за 10,95, ёсць за 9,45. Выбар спыняецца на тых, якія каштуюць танней за іншыя — 3,5 рубля.

Памідоры з Пінска яшчэ можна купіць. Фота: чытач «КП», носіць ілюстрацыйны характар

Мяркуючы па цэнніку — яны беларускія, але не самыя яркія і буйныя.

Некаторая гародніна на рынку каштуе даражэй, чым у крамах, а вось мяса — танней. Фота: чытач «КП», носіць ілюстрацыйны характар

Што тычыцца часнаку, то і тут разбежка цэн даволі вялікая: кілаграм можа каштаваць нават 15 рублёў, сярэдняя ж цана — 12 рублёў за кіло. Калі пахадзіць-пацягацца па радах, то сустракаюцца прапановы яшчэ больш выгадныя: 9,99 рубля. Увогуле 100-грамовая галоўка часнаку пацягне 99 капеек.

Кілаграм буракоў абыдзецца ў тыя ж 99 капеек, а вось капусту танней за 1 рубель 9 капеек, здаецца, не знайсці.

Гандаль ідзе жвава і з агеньчыкам. Фота: чытач «КП», носіць ілюстрацыйны характар

У адрозненне ад гіпермаркета і «каляхатняй» крамы, на Камароўцы выдатны выбар мяса, лапатачная частка ялавічыны абыдзецца ў 20 рублёў, але рубель без праблем і асаблівага торгу прадаўцы скідаюць. 

100 грам пятрушкі абыдзецца ў 1 рубель 20 капеек. Зеляніну адназначна больш выгадна купляць на рынку.

Фота: чытач» КП», носіць ілюстрацыйны характар.

Разам рондаль «камароўскага баршчу» абыдзецца ў 31 рубель і 5 капеек.

Увогуле і ў цэлым, 42 рублі 23 капейкі каштуе «баршчовы» набор, калі купляць усе прадукты для яго ў крамах «каля дома»; той жа спіс, але набыты ў сеткавым гіпермаркеце, абыдзецца ў 35 рублёў 66 капеек. Калі адправіцца на Камароўку і закупіцца там, то кашалёк страціць 31 рубель 5 капеек, затое сумка прадуктаў істотна папоўніцца.

А што, калі паставіць мэтай зэканоміць па максімуме? Не пашкадаваць часу і пашукаць самыя недарагія прадукты. Тады ў гіперы мае сэнс купіць цыбулю (1,21 рубля), моркву (0,71), там жа і часнок (80 капеек), капусту (0,69). Там жа трэба ўзяць і буракі — танней, чым 69 капеек за кілаграм, — не знайсці больш нідзе.

Фота: чытач «КП», носіць ілюстрацыйны характар

У крамах крокавай даступнасці купляем бульбу, але яе, дарэчы, можна набыць і ў гіпермаркеце: цана аднолькавая, 71 капейка за кіло.

На Камароўцы варта купляць ялавічыну (19 рублёў), пятрушку (на рынку яна значна таннейшая, чым у любой краме, — 1,2 рубля за 100 грамаў), памідоры — 3,5 рубля. Сума — 28 рублёў 51 капейка.

Параўнанне

І яшчэ адзін момант: цяпер самы час параўнаць «індэкс баршчу» — якім ён быў у сярэдзіне вясны і ў самым канцы лета, а які на фінішы лістапада.

У канцы сакавіка 2022 года набор прадуктаў, набыты на Камароўцы, каштаваў 32,09 рубля, у канцы жніўня — 29,35 рубля. Па стане на канец лістапада — 31,05 рубля.

Прадукты для баршчу, набытыя ў гіперы вясной, абышліся ў 46,96 рубля, у канцы лета — 30,53 рубля. Лістападаўскі вынік — 35,66.

Крамы крокавай даступнасці вясной прапаноўвалі пералік адпаведных прадуктаў за 38 рублёў 82 капейкі, у жніўні — 30,6 рубля, сума лістападаўскіх цэнаў — 42,26 рубля.

Калі паглядзець, як змяніўся сярэдні цэннік, то статыстыка «сакавік — жнівень — лістапад» будзе такой: 29,98 BYN, 26,04 і 28,51 рубля адпаведна. Відавочна, што фактар сезоннасці з'яўляецца тут адным з вызначальных. 

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
0
даведка/адказаць/
26.11.2022
Самые низкие цены в мелких региональных сетях. Незадолго до запрета на рост цен попалась на глаза акционная листовка гомельской сети "Два гуся" с просто какими-то нереально низкими ценами на известные продуктовые товары, включая кофе и прочий критический импорт, которые раза в полтора были ниже среднебелорусских в крупных сетях на акциях.
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера