Пяць крамаў, дзе можна купіць беларускія кніжкі (у тым ліку з дастаўкай за мяжу)
Кнігі на роднай мове — балючае пытанне для тых беларусаў, што апынуліся за мяжой. Унутры краіны з гэтым прасцей, але добрыя рэсурсы, дзе можна набыць беларускія выданні, ніколі не будуць лішнімі. Расказваем, дзе іх шукаць.
BELKNIGA.BY
Гэтая дзяржаўная сетка кнігарань мае вялікі выбар літаратуры. Ёсць несмяротная класіка накшталт Быкава, Мележа, ёсць і менш звыклыя рэчы: напрыклад, мастацкі твор «Бог кахання Марс» ад гомельскага пісьменніка Сяргея Балахонава ці грунтоўная «Галоўная вуліца Мінска» — даследаванне гісторыі праспекта Незалежнасці ад пісьменніка і энцыклапедыста Леаніда Маракова.
Не абышлося тут і без цікавых перакладаў: звярніце ўвагу, напрыклад, на кнігу твораў вялікага кыргызскага пісьменніка Чынгіза Айтматава па-беларуску або на зборнік кітайскай паэзіі.
БІБЛІЯТЭКА KAMUNIKAT
Сайт Kamunikat.org раім запомніць нават тым, хто не збіраецца набываць сабе ніякія кнігі па-беларуску, бо гэта багатая анлайн-бібліятэка. Тут ёсць безліч беларускамоўных твораў, даступных у пдф-фармаце, уражвае нават багацце тэматыкі — ад мастацкай літаратуры да экалогіі і геаграфіі. Ёсць на «Камунікаце» і аўдыякнігі, запісы радыёперадач, перыёдыка, музыка і відэа — і ўсё па-беларуску.
«Камунікат» стварыў беларус з Падляшша Яраслаў Іванюк. Дакладнай інфармацыі па дастаўцы вы на сайце крамы не пабачыце, для гэтага вам спатрэбіцца напісаць на пошту яе супрацоўнікам. Але ж ёсць там кнігі, сапраўды вартыя гэтага кроку. Пералічым толькі некалькі аўтараў: Таццяна Сапач, Уладзімір Някляеў, Уладзімір Арлоў. Сярод цікавостак — выданне «Культура сэксуальных стасункаў у Вялікім Княстве Літоўскім у XVI—XVII стагоддзях».
KNIHI.BY
Адметнасць гэтай крамы ў тым, што, акрамя выданняў для дарослых, тут прапануюць яшчэ і невялічкі дзіцячы кнігазбор. Напрыклад, тут вы набудзеце сабе кнігі вядомай дзіцячай пісьменніцы Надзеі Ясмінскай, а таксама пераклады класічных дзіцячых твораў ад твораў Астрыд Ліндгрэн да гісторыі пра Пітэра Пэна. На Knihi.by добры выбар твораў, перакладзеных з іншых моваў на беларускую: тут вам і знакамітыя Рамэн Гары і Чак Паланік, і менш вядомыя шырокаму чытачу Гінтарас Бераснявічус і Яраслаў Гжэндовіч.
Цікавая знаходка: на сайце можна набыць набор віншавальных паштовак да прафесійных свят. Толькі паглядзіце на іх — хіба гэта не прыгажосць?
Фота: knihi.by
KNIGANOSHA.BY
Калі верыць сайту гэтай крамы, яе адметнасць — тое, што тут можна набыць старыя выданні. І праўда, у гэтай краме вы знойдзеце рарытэты па нашым часе: напрыклад, як наконт «Уладара» ад Макіявелі 2008 года выдання? Часам тут з’яўляюцца ў адзінкавай колькасці яшчэ большыя рарытэты накшталт «Плача перапёлкі» Івана Чыгрынава 1978 года выдання або кнігі вершаў Адама Русака, выдадзенай тады ж.
З больш новых, але таксама незвычайных выданняў раім звярнуць увагу, напрыклад, на прыгожую кнігу «Традыцыйныя строі Беларусі: беларускае адзенне канца ХІХ — пачатку ХХ стагоддзяў па рэгіёнах», выявы з якой разышліся пару месяцаў таму па беларускіх тэлеграм-каналах — надта ўжо яны прыгожыя.
RAGNA.BY
«Рагна» — гэта цэлая этнакрама з рэчамі, створанымі ў беларускім стылі. Маленькія цацкі-зайчыкі ў нацыянальных касцюмах, рукавіцы з арнаментам, яркія паштоўкі-выцінанкі — трымайцеся, каб не скупіць гэта ўсё і не забыцца, што вы тут па кнігі.
Кніг у «Рагне» не так і шмат, але гэта па-свойму незвычайныя выданні. Напрыклад, «Смак беларускай кухні» — яскравы зборнік рэцэптаў на беларускай, рускай і англійскай мовах, альбо кнігі пра астраномію ў Вялікім Княстве Літоўскім ці зборнік фотаздымкаў Беларусі, зробленых нямецкім салдатам падчас Першай сусветнай.
«Наша Нiва» — бастыён беларушчыны
ПАДТРЫМАЦЬ«Я чую гэтую кнігу іх галасамі». Размова з Сяргеем Лескецем пра кнігу «Шэпт»
Уладзімір Сцяпан: У іх свая мерка літаратуры — колькасць базавых
