Знайсці
02.12.2021 / 20:20РусŁacБел

Што цікавага адбылося ў беларускай музыцы за восень? 

Нягледзячы на цёмны час для беларускай культуры, яна не стаіць на месцы. Падрыхтавалі для вас падборку музычных навін, а таксама новых альбомаў, кліпаў і песень, якія выйшлі ўвосень.

Якія навіны ў індустрыі?

▪️ 2 верасня быў затрыманы дыджэй Аляксандр Багданаў, больш вядомы як Papa Bo.

Яго затрымалі ў культурным цэнтры «Корпус», разам са сцэнографам Максімам Круком і арганізатаркай імпрэз Лізаветай Неўмяржыцкай.

Спачатку ўсім траім прысудзілі суткі, але па іх сканчэнні Багданаў і Крук на волю не выйшлі. Праваабаронцы прызналі іх палітвязнямі.

▪️ У кастрычніку па БТ пачаўся паказ беларускага «X-фактара».

У нашым артыкуле, які мы зрабілі разам з экспертам Сяргеем Будкіным, сфармулявалі галоўныя пытанні да рэалізацыі Белтэлерадыёкампаніі.

▪️ Беларусь зноў прапусціць «Еўрабачанне».

У спісе краін-удзельніц папулярнага конкурсу Беларусі няма. Нагадаем, сёлета БТ хацела накіраваць на конкурс гурт «Галасы ЗМеста», але Еўрапейскі вяшчальны саюз забаніў абедзве версіі конкурснай песні. А пасля і БТ выключылі з Еўрапейскага вяшчальнага саюза.

▪️ 29 кастрычніка 3 гады хіміі атрымаў дудар Зміцер Шыманскі, удзельнік гурта «Яварына».

Яго разам з удзельнікамі гурта Irdorath затрымалі 3 жніўня. Пасля суда Шыманскі з'ехаў з Беларусі.

«Я тэлепартаваўся з Беларусі». Асуджаны на «хімію» музыка і палітвязень пра Валадарку, прысуд і пабег з краіны

▪️ 17 лістапада памёр Сяргей Філімонаў, аўтар і вядучы вядомай перадачы «Відзьмо-невідзьмо». 

Праграма з'явілася на БТ у 1992 годзе. У ёй расказвалася пра сусветны шоу-бізнэс, навінкі кіно і музыкі. Філімонаву было 62 гады.

10 альбомаў і сінглаў восені

Хочам адзначыць 10 рэлізаў, якія пабачылі свет у папярэднія тры месяцы. Сярод іх як доўгачаканыя навінкі топаў, так і цікавыя дэбютнікі.

Pomidor/OFF — Разьвітаньне з радзімай

Да гадавіны Ночы расстраляных паэтаў Аляксандр Памідораў выдаў сінгл з дзвюх песень. Выданне стала магчымым пры падтрымцы Беларускай рады культуры.

Bez.not — Не рви нервы

Як характарызуюць альбом музыкі, «Не рви нервы» — гэта вінегрэт эмоцый, якія спелі дзесьці на завуголлі падсвядомасці вельмі доўга і, нарэшце, дачакаліся свайго нараджэння.

NAVIBAND — Однажды

У пачатку восені адзін з найбольш вядомых беларускіх поп-гуртоў парадаваў сваіх прыхільнікаў новым пазітыўным сінглам.

Петля Пристрастия — Не тот человек

«Галоўнай тэмай альбома з’яўляецца тэма развітання і вечнай разлукі з сабой ранейшым, са старым светам, са здароўем, у некаторым сэнсе, а таксама з усімі, для каго падарожжа скончылася. Мы запісалі гэта ў дастаткова складаных умовах і фізічнага, і псіхалагічнага характару, цяпер рады падзяліцца сваёй маленькай перамогай. Пачастуйцеся пладамі беларускай восені, якія забрадзілі», — піша група пра навінку.

Polyn — Ледокол

Polyn — гэта прыклад айчыннага супергурта, у які ўвайшлі вядомыя музыкі: Аляксей Ванчук ды Сяргей Краўчанка з Port Mone, а таксама Ілля Чарапко-Самахвалаў з ужо згаданай вышэй «Петли Пристрастия».

«Ледокол» — гэта халодная гісторыя аб алкагольнай залежнасці і ўнутранай самаізаляцыі, якая дакладна трапляе ў адчуванне сённяшняга дня.

Бяз Назвы — Маякі

Гурт Алеся Лютыча апублікаваў сінгл «Маякі» пра надзеі і святло, пра сапраўдную блізкасць. Музыканты ўпэўненыя, што з падтрымкай сяброў атрымаецца ўсё — нават немагчымае.

Ань Хітрык band — Тень

Апошні раз былая актрыса Купалаўскага і салістка гуртоў «Детидетей» ды «S°unduk» Ганна Хітрык давала канцэрт больш за чатыры гады таму, яшчэ да эміграцыі ў Ізраіль. Восенню 2021 года прыхільнікі яе творчасці нарэшце дачакаліся новых песень: новы альбом не такі пазітыўны, як ранейшыя, але поўны цеплыні, надзеі і веры ў чалавека.

Dlina Volny — Dazed

Беларускі англамоўны гурт сабраў у сваім альбоме пачуцці і ўспаміны за апошнія гады, а таксама ўвасобіў у ім цёмныя фантазіі. 

Бакей — BELMO

Пасля эксперыментаў з поп-музыкай Бакей вяртаецца ў рэп і выпусціў міні-альбом.

CHORNABROVA — Слова

Акцёрка і спявачка Паліна Дабравольская запісала дэбютны альбом, хаця прызналася ў сацыяльных сетках, што «заўсёды сабе казала, што не здольная пісаць музыку і што я ніколі не змагу напісаць нават адну песню». Chornabrova кажа, што робіць музыку ад сэрца і заўсёды для гледача/слухача.

А якія кліпы выйшлі?

Восень была досыць ураджайнай на музычныя відэа. У наш топ мы выбралі пяць.

Zakharik — Тайна

Спявачка Саша Захарык і прадзюсар Яраслаў Таміла заснавалі праект ZAKHARIK, у якога выйшаў першы сінгл «Тайна». Песню ўхвалілі Іван Дорн і Аляксандр Гудкоў. 

Yann Zhanchak — Живой

Ян Жанчак напісаў песню пасля таго, як ягоныя любімыя музыкі памерлі, не справіўшыся са шкоднымі звычкамі. У выніку атрымаўся трэк пра вечную гульню з самім сабой.

РСП — Серый квадрат

У апошні дзень лета РСП выдалі альбом «Ашчушчэнія», а восенню знялі відэа на адну з песень. 

TryNici — Царкоўка

Прэм’ера кліпа на купальскую песню ад праекта TryNici (у ім удзельнічаюць Маргарыта Ляўчук, Сяржук Доўгушаў і Іван Кірчук) мусіла адбыцца яшчэ ўлетку 2020 года, але сумныя падзеі ў Беларусі перашкодзілі рэлізу. 

БАК — Зямля

«Зямля» — вынік калабу мастака Doctor Oy, Міхаіла Дайлідава і Мікіты Арлова, якіх шырокая публіка ведае па праектах Michael Dailida і «СОЮЗ». Гэта твор пра перажыванне, зняволенне, адзіноту і, безумоўна, надзею на лепшае.

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера