Беларускіх студэнтаў адправяць на будаўніцтва БАМ
Беларускія студэнцкія атрады адправяцца ў красавіку на рэканструкцыю Байкала-Амурскай магістралі, піша Sputnik.
Чыгуначныя войскі на будаўніцтве БАМ-2, ліпень 2022 года. Фота: Вікіпедыя
Як паведаміла на прэс-канферэнцыі загадчыца Цэнтра інфармацыйных і сацыяльных тэхналогій ЦК ГА «БРСМ» Кацярына Лакісава, на Сусветным маладзёжным фестывалі Беларускі рэспубліканскі саюз моладзі заключыў шэраг пагадненняў з прадстаўнікамі розных краін.
Працоўны праект атрымаў назву «БАМ 2.0», чакаецца, што ў ім прымуць удзел тысячы студэнтаў.
Лакісава дадала, што ў сваю чаргу беларускі бок запрасіў расійскія студэнцкія атрады ў рэспубліку — на будаўніцтва абʼектаў на тэрыторыі Брэсцкай крэпасці — цэнтра патрыятычнага выхавання моладзі.
У гэтым годзе спаўняецца 50 гадоў з пачатку будаўніцтва Байкала-Амурскай магістралі.
У 1970-80-я беларуская моладзь актыўна працавала на самай маштабнай усесаюзнай будоўлі, узводзячы станцыі, жылыя пасёлкі і ўкладваючы чыгуначныя пуці.
Байкала-Амурская магістраль — чыгунка, якая праходзіць праз Усходнюю Сібір і Далёкі Усход Расіі, працягласцю 4324 км. Адна з найбуйнейшых чыгуначных магістраляў у свеце. Большая частка магістралі пракладзена ў зоне вечнай мерзлаты.
Чытайце таксама:
Як збіраюцца піярыць «саюзную дзяржаву» сярод моладзі — пачыталі прапановы Міністэрства адукацыі
З'явіўся беларуска-расійскі падручнік для ВНУ па «гісторыі Саюзнай дзяржавы»
