Знайсці
02.01.2024 / 21:48РусŁacБел

Наступны за Віні-Пухам. Мікі Маус таксама становіцца фільмам жахаў

Гэта Мікі, але не такі, якім вы яго бачылі раней. Трэйлер фільма жахаў з удзелам забойцы ў масцы Мікі Мауса выйшаў 1 студзеня — у дзень, калі ў ЗША скончыўся тэрмін дзеяння аўтарскіх правоў Дыснея на раннія версіі гэтага мультыплікацыйнага персанажа.

Фота: Mickey Mouse Trap

1 студзеня 2024 года мульт-герой Уолта Дыснея Мікі Маус стаў грамадскім здабыткам. Згодна з заканадаўствам ЗША аб аўтарскім праве, манаполія на персанажаў можа захоўвацца на працягу 95 гадоў.

Рэжысёр Джэймі Бейлі і яго каманда скарысталіся новымі правіламі і ўжо 1 студзеня 2024 года выпусцілі трэйлер да свайго новага малабюджэтнага фільма жахаў «Пастка Мікі» (змяшчае сцэны гвалту), піша Бі-бі-сі.

У стужцы дзяўчаты ладзяць вечарынку на дзень нараджэння, але сітуацыя хутка змяняецца, калі на іх нападае забойца з нажом у касцюме Мікі.

Распавядаючы пра свой малабюджэтны фільм, рэжысёр Бейлі патлумачыў: «Мы проста хацелі павесяліцца. Бо гэта Мікі Маус з «Параходзіка Вілі» забівае людзей. Гэта смешна. Мы працавалі над гэтым і атрымлівалі задавальненне, і я думаю, гэта відаць».

Чакаецца, што фільм выйдзе ў сакавіку гэтага года.

Акрамя таго, 1 студзеня выйшаў трэйлер новай відэагульні — таксама з удзелам версіі Мікі 1928 года.

Студыя Nightmare Forge анансавала хорар-гульню пад назвай Infestation 88. У ёй геймеры павінны ўзяць на сябе ролю дэзінфектараў і змагацца з загадкавым «заражэннем» — знаходзіць і знішчаць гнёзды дэманічных грызуноў.

У пачатку трэйлера чуваць, як мужчынскі голас нервова кажа: «Я думаў, што гэта проста грызуны, але тут ёсць яшчэ сёе-тое».

Затым на экране з'яўляецца велізарны запырсканы крывёю Мікі, а вакол яго ходзяць мышы.

Пра тое, які лёс можа чакаць «безабароннае» з пункту гледжання аўтарскіх правоў мышаня, можна меркаваць па Віні-Пуху.

Неўзабаве пасля таго, як у мінулым годзе скончыўся капірайт на кнігу Мілна, Віні і яго сябар Пятачок з'явіліся ў фільме-страшылцы «Віні-Пух: кроў і мёд», дзе медзведзяня з парасём ператварыліся ў крыважэрных забойцаў і тэрарызуюць Крыстафера Робіна і яго прыяцеляў, што заблукалі ў зачараваным лесе.

«Віні-Пух: кроў і мёд» трапіў у спіс найгоршых кінапраектаў усіх часоў па версіі партала Rotten Tomatoes.

Аднак Мікі абаронены лепш. Ён застаецца таварным і карпаратыўным знакам кампаніі Disney і ідэнтыфікатарам яе брэнда, а закон забараняе любое выкарыстанне такога персанажа, якое можа ўвесці ў зман спажыўцоў.

Кампанія Disney сцвярджае, што і ў далейшым будзе ўважліва сачыць за тым, як выкарыстоўваюць яе самага знакамітага персанажа. «Мікі працягне граць ролю глабальнага пасланца кампаніі Уолта Дыснея ў нашых гісторыях, парках забаў і таварах, а мы, вядома, і далей будзем абараняць аўтарскія правы на пазнейшыя версіі Мікі Маўса і іншыя матэрыялы, абароненыя капірайтам», — гаворыцца ў заяве кампаніі Disney.

Зрэшты, як лічыць прафесар права з Універсітэта Паўднёвага Ілінойса Цві Розен, вырашаць, што можна і што нельга рабіць са знакамітымі персанажамі, урэшце, будзе суд.

Чытайце таксама:

Першая версія вобразу Мікі Мауса перастала ахоўвацца аўтарскім правам

Дональд Трамп заявіў, што менавіта яго эпізод у «Адзін дома 2» зрабіў фільм паспяховым

50 дзеячаў культуры Францыі і прэзідэнт Макрон заступіліся за Дэпард'ё, які абвінавачваецца ў сэксуальным гвалце

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
1
Панылы сорам
0
Ха-ха
2
Ого
3
Сумна
1
Абуральна
4
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера
ПНАЎСРЧЦПТСБНД
12345
6789101112
13141516171819
20212223242526
2728293031