Знайсці
09.12.2023 / 16:32РусŁacБел

Які пральны сродак лепшы: у выглядзе парашку, у капсулах ці вадкі?

Залежыць ад тэмпературы прання, тыпу машыны і вашых мэтаў.

Фота: vecteezy

Кароткая гісторыя пральных капсул

Капсулы для прання былі ўпершыню прадстаўлены ў 1960-х гадах, калі Procter & Gamble выпусціла іх пад маркай Salvo ў якасці альтэрнатывы вадкім і парашковым мыйным сродкам. Таблеткі дрэнна раствараліся і былі зняты з прылаўкаў у 1970 годзе. Праз дзесяць гадоў P&G зноў паспрабавала з пакуначкамі Cheer Power, але і яны таксама не ўразілі спажыўцоў.

Толькі ў 2012 годзе капсулы знайшлі сваё месца ў свеце прання, калі P&G нарэшце дасягнула поспеху з Tide PODS, і з таго часу многія іншыя вытворцы пайшлі па іх слядах. Цяпер на рынку шмат пральных капсул усіх марак.

Як працуюць капсулы для прання

Як і капсулы для пасудамыйнай машыны, пральныя капсулы ўтрымліваюць вадкія або парашковыя ачышчальныя інгрэдыенты ўнутры растваральнай плёнкі. Іх можна дадаваць непасрэдна ў барабан пральнай машыны. Калі капсула трапляе ў ваду, плёнка растае, вызваляючы ачышчальныя інгрэдыенты ў дзікі свет забруджанага адзення.

Плюсы пральных капсул

Акрамя відавочнага фактару зручнасці, многія людзі лічаць капсулы лепшымі за тыя ж вадкія мыйныя сродкі, таму што капсулы змяшчаюць выразна адмераную колькасць мыйнага сродку. У Tide таксама сцвярджаюць, капсулы працуюць лепш не толькі з гэтай прычыны, але і таму што яны маюць больш канцэнтраваныя ачышчальныя інгрэдыенты.

Некаторыя сродкі, напрыклад Tide 3-in-1, тэарэтычна могуць выконваць задачу трох розных прадуктаў, бо адна капсула змяшчае адразу пральны сродак, кандыцыянер (ён жа змякчальнік тканіны) і выдаляльнік паху. А калі вы жывяце ў малюсенькай кватэры і не маеце шмат месца для захоўвання, гэта можа зэканоміць неабходнае месца ў ванным пакоі.

Мінусы пральных капсул

Вядома, капсулы для бялізны не ва ўсіх адносінах пераўзыходзяць звычайныя мыйныя сродкі. Па-першае, яны звычайна даражэйшыя за іншыя віды мыйных сродкаў. Некаторыя з іх могуць каштаваць на 50 адсоткаў даражэй за танныя парашковыя варыянты, якія з’яўляюцца самымі бюджэтнымі.

Па-другое, нягледзячы на зручную выразна адмераную колькасць мыйнага сродку ў капсулах, гэтая ж зручнасць таксама і абмяжоўвае вас. З вадкімі і парашковымі сродкамі ў вас значна больш кантролю. Напрыклад, калі вы хочаце папраць невялікую колькасць адзення, то можаце адпаведна выбраць меншую колькасць парашку ці вадкасці.

Першыя капсулы для мыцця Salvo з'явіліся ў 1960-х гадах, але не сталі папулярнымі з-за дрэннага растварэння ў вадзе / Выява: Wikimedia /(CC BY-SA 2.0)

Гэтак жа ў выпадку, калі вам трэба папраць нейкую невялікую колькасць далікатных вырабаў: адной капсулы можа быць зашмат. І часам гэта можа прывесці да назапашвання хімічных рэчываў на вашай вопратцы, што, мякка кажучы, не вельмі добра для скуры. З капсуламі вы таксама не зможаце папярэдне апрацаваць стойкія плямы, як гэта можна зрабіць вадкімі мыйнымі сродкамі. А калі вы звычайна мыеце далікатныя рэчы ўручную, то вам таксама спатрэбіцца нешта для гэтага.

І апошняя рэч, якая выклікае занепакоенасць: у 2012 годзе Цэнтры па кантролі і прафілактыцы захворванняў ЗША выпусцілі папярэджанне пасля таго, як каля 500 дзяцей атруціліся ў выніку ўжывання пральных капсул. Таму не забывайце захоўваць падобныя рэчы ў месцах, недаступных дзецям.

Плюсы і мінусы парашку

Відавочнай перавагай парашковых сродкаў з'яўляецца кошт. Апроч гэтага, парашок у тэорыі можа быць больш экалагічным за іншыя варыянты, бо для яго вытворчасці патрабуецца менш упакоўкі і вады. (Калі вы хочаце быць па-сапраўднаму экалагічна чыстым чалавекам, вы можаце зрабіць свой уласны парашок: сёння ў ютубе хапае рэцэптаў на розны густ.)

Самая вялікая праблема парашку ў тым, што ён не заўсёды цалкам раствараецца ў пральных машынах, асабліва калі вы мыеце вопратку ў халоднай вадзе. Таму калі вы хочаце выкарыстаць парашок для папярэдняй апрацоўкі плям, зрабіце пасту, дадаўшы гарачай вады, і нанясіце яе на плямы крыві, гліны або іншага бруду, раіць Howstuffworks.

Плюсы і мінусы вадкага мыйнага сродку

Вадкія пральныя сродкі каштуюць даражэй, чым парашковыя, але танней, чым капсулы. І галоўны іх плюс, бадай: яны не пакінуць слядоў на вопратцы незалежна ад тэмпературы вады.

Вадкі сродак для мыцця таксама з'яўляецца зручным варыянтам для ручнога прання, бо вам не трэба чакаць, пакуль мыйны сродак растворыцца ў вадзе, як гэта было б з парашком або капсулай.

Вадкі сродак для мыцця таксама зручны для выдалення плям, а асабліва эфектыўны пры выдаленні тлушчавых і алейных плям: перад асноўным мыццём вам трэба проста папярэдне апрацаваць пляму невялікай колькасцю вадкага сродку.

Як выбраць правільны сродак

Перш чым разглядаць плюсы і мінусы розных сродкаў, трэба вызначыць свае патрэбы ў пранні. Некаторыя пытанні могуць дапамагчы вам з выбарам:

  • наколькі адчувальная ў вас скура?
  • якая ў вас пральная машына і з якімі сродкамі яна можа быць сумяшчальная?
  • куды ідзе ваш мыйны сродак — непасрэдна ў барабан ці ў скрыню для мыйных сродкаў?
  • ці патрэбны вам спецыяльныя мыйныя сродкі для розных сітуацый (напрыклад, далікатнае і працоўнае адзенне) або хопіць адной формулы, якая зробіць усё?
  • пры якой тэмпературы вы звычайна пераце бялізну?

Дарэчы, у Старажытным Рыме людзі выкарыстоўвалі чалавечую мачу для ачысткі сваёй бруднай бялізны — і, кажуць, гэта сапраўды працавала. Спадзяемся, нам не давядзецца правяраць.

Чытайце таксама:

Як пачысціць белыя чаравікі: цалкам правераныя метады

Як ачысціць і прадэзінфікаваць матрац

Як часта трэба мяняць ручнік?

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера