Знайсці
04.12.2023 / 10:002РусŁacБел

Лукашэнка актыўна прасоўвае Беларусь на афрыканскім кантыненце. Але ці зацікаўлена Афрыка ў Беларусі? Тлумачыць эканаміст

На Сусветным саміце па барацьбе са змяненнем клімату, што праходзіў у Дубаі, Аляксандр Лукашэнка асаблівую ўвагу надаваў не кліматычным пытанням, а размовам з кіраўнікамі афрыканскіх краін. Але лічбы экспарту паказваюць цікавую карціну.

Фота: скрыншот з відэа

Замест росту назіраецца зніжэнне

Эксперт BEROC Анастасія Лузгіна адзначае, што агулам афрыканскі кантынент лічыцца перспектыўным напрамкам.

«Афрыка — гэта вялікі рэгіён, які актыўна расце. Там пражывае каля 1,4 мільярда чалавек. Гэта рынак, які здольны шмат чаго спажыць. Таму ў Беларусі не прыхоўваюць, што разглядаюць афрыканскі кантынент як адзін з перспектыўных напрамкаў для прасоўвання сваіх тавараў», — кажа Лузгіна.

Пры гэтым эканаміст звяртае ўвагу на той факт, што ніякіх поспехаў у гэтым кірунку пакуль не дасягнута, а замест росту наадварот назіраецца зніжэнне.

Пік экспарту ў краіны Афрыкі быў дасягнуты ў дакавідным 2019 годзе, калі беларускі экспарт перавысіў 400 мільёнаў даляраў.

«Па выніках мінулага года гэты паказчык быў у раёне 200 мільёнаў даляраў, што зусім мала для Беларусі», — адзначае эксперт.

Значнае падзенне экспарту ў краіны Афрыкі шмат у чым абумоўлена тым, што адным з ключавых тавараў у гэты рэгіён былі калійныя ўгнаенні. Некаторыя краіны кантынента забяспечваліся пераважна беларускай прадукцыяй.

Ілюстрацыйны здымак. Фота: «Наша Ніва»

«Пастаўкі калійных угнаенняў ажыццяўляліся праз Літву, а літоўскі порт цяпер закрыты для беларускага калію. Акрамя таго, да лагістычных цяжкасцяў дадаюцца праблемы з разлікамі.

Апроч калію гаворыцца пра пастаўкі харчавання, абсталявання і машын. Але кожная з гэтых галін сутыкаецца з праблемамі. У першую чаргу з лагістычнымі.

Па-першае, мы знаходзімся вельмі далёка, а што тычыцца абсталявання і машын, то акрамя пытанняў з пастаўкамі, узнікаюць пытанні, звязаныя з недахопам спецыялістаў, якія будуць умець карыстацца гэтым абсталяваннем, таксама трэба развіваць сэрвіснае абслугоўванне», — кажа Лузгіна.

Ці зацікаўлены краіны Афрыкі ў Беларусі?

Эканаміст мяркуе, што сціплыя паказчыкі ў працы з кантынентам могуць быць абумоўленыя ў тым ліку тым, што самі краіны Афрыкі не моцна зацікаўленыя ў супрацоўніцтве з Беларуссю.

Лузгіна адзначае, што адмова прэзідэнта Зімбабвэ наведаць Беларусь гэтай зімой можа быць адным з сігналаў, якія паказваюць на гэта.

Эмерсан Мнангагва і Аляксандр Лукашэнка. Фота: скрыншот з відэа

«Беларусь не з'яўляецца для іх прыярытэтам. У развіцці адносін з афрыканскімі дзяржавамі зацікаўлены Кітай, Расія. Афрыцы больш выгадна наладжваць супрацоўніцтва з імі, а не з Беларуссю, якая не толькі знаходзіцца вельмі далёка, але і не мае выхаду да мора і можа мала чаго прапанаваць».

На думку эксперта, сам факт, што Лукашэнка асабіста сышоў у «прамыя продажы», сведчыць пра тое, што справы ідуць не вельмі.

«Для нашага ўрада склалася вельмі складаная сітуацыя для прасоўвання нашых тавараў. Таму Лукашэнка скарыстаўся магчымасцю сустрэцца з кіраўнікамі краін Афрыкі, і ўжо на сваім узроўні асабіста падключыўся да пытанняў прасоўвання Беларусі на афрыканскім кантыненце», — лічыць Лузгіна.

Калі Беларусі ўдасца дасягнуць запланаваных вынікаў па нарошчванні экспарту ў краіны Афрыкі ў 2,5 раза, то гэта ўсё роўна мала, лічыць яна.

«Нават калі атрымаецца нарасціць аб'ём экспарту да мільярда даляраў у год, то гэта ўсё роўна нельга назваць вялікім поспехам, бо гаворка ідзе пра ўвесь афрыканскі кантынент з яго велізарным рынкам», — адзначае Лузгіна.

Для параўнання, беларускі экспарт у Латвію з яе насельніцтвам блізу 1,9 мільёна чалавек летась склаў каля 300 мільёнаў даляраў, што прыблізна ў паўтара раза больш, чым экспарт ва ўсе краіны Афрыкі разам узятыя.

Чытайце таксама:

«Прапануем 2000-2500 рублёў на рукі — закрыць вакансіі няма кім». Бізнэс не можа знайсці работнікаў

Сусветныя цэны на калійныя ўгнаенні вярнуліся на перадваенны ўзровень. Што гэта азначае для Беларусі

Даніла Луцкевіч

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
2
Агаворачка/адказаць/
04.12.2023
Лузгіна, для вашага ўрада? Вы на іх працуеце? І колькі плацяць?
0
Янка/адказаць/
04.12.2023
Калі патрэбна нешта таннае - ёсьць Кітай, да і якасцью там магчыма істотна пагуляцца за адносна невялікае павышэнне кошту. Калі інвестыцыйных магчымасцяў больш - купляецца высокатэхналагічная заходняя прадукцыя. Беларуская прадукцыя па кошту і якасці - прынамсі ня лепей за Кітай, а без заходняй камплектацыі - не дацягвае нават да кітайскай па тэхналагічнаму ўзроўню. Застаецца толькі жорсткі дэмпінг у спалучэнні з мафіёзна-карупцыйнымі схемамі, бо жывых грошаў у большасці афрыканскіх дыктатараў інакш чым на сваю раскошу і заробкі штыкам няма.
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера