Знайсці
28.11.2023 / 09:455РусŁacБел

Польшча турыстычныя візы рэдка адкрывае, у Італіі запіс праз месяц. Як цяпер беларусам адкрыць візу ў Еўропу

Калі ў верасні Польшча аднавіла прыём дакументаў на турыстычныя візы, гэта падавала вялікія надзеі, але ўсё аказалася не так проста. Пацікавіліся, якая цяпер сітуацыя з атрыманнем віз розных краін ЕС — ці доўга чакаць, колькі бяруць пасярэднікі і на які тэрмін адкрываюць візы. 

Ілюстрацыйны здымак. Фота: «Наша Ніва»

Польшча

Атрымаць польскую турыстычную візу можна, але, як паказвае практыка, выдаюць іх вельмі дрэнна. З улікам таго, што самастойна запісацца амаль не рэальна, а пасярэднікі бяруць па 600-700 рублёў за свае паслугі, гэта не самы лепшы варыянт.

«Па турызме цяпер у большасці выпадкаў Польшча адкрывае аднаразовыя візы, часам бываюць адмовы», — кажа візавы агент.

У выпадку з Польшчай лепей за ўсё спрабаваць адкрыць гасцявую візу. У такім выпадку ёсць вялікі шанец атрымаць доўгатэрміновую нацыянальную візу.

«Для гэтага спатрэбіцца запрашэнне ад любога грамадзяніна Польшчы або чалавека з ПМЖ. Калі з запрашаючага боку ўсё будзе аформлена належным чынам, то вы атрымаеце гадавую візу», — тлумачыць спецыяліст.

Калі сваякоў ці знаёмых, гатовых зрабіць вам запрашэнне, няма, то давядзецца плаціць пасярэднікам.

Толькі кошт самога запрашэння складае 350-400 даляраў. Калі запісацца самастойна не атрымаецца, то трэба дадаць 250-300 рублёў за запіс на падачу.

Апроч гэтага, аплачваюцца выдаткі на страхоўку — каля 170 рублёў — і іншыя візавыя зборы, якія пацягнуць яшчэ рублёў на 200. У выніку віза абыдзецца больш як у 500 даляраў.

Ілюстрацыйны здымак. Фота: «Наша Ніва»

На адкрыццё польскай нацыянальнай візы сыходзіць каля двух месяцаў: толькі запрашэнне будзе гатова праз два тыдні, плюс некалькі тыдняў на запіс.

Сярод іншых папулярных варыянтаў — польская працоўная віза.

За 800-950 рублёў пасярэднікі гатовыя падрыхтаваць неабходны камплект дакументаў «пад ключ». Ад заяўніка апроч грошай і пашпарта патрэбна толькі страхоўка (каля 100 даляраў). Пасярэднікі гарантуюць, што віза будзе гадавая.

Адкрыць працоўную візу даволі проста і адносна танна, але трэба разумець, што робіцца яна з выкарыстаннем ліпавага запрашэння на працу і такой самай працоўнай дамовы.

Ілюстрацыйны здымак. Фота: «Наша Ніва»

Некаторыя пасярэднікі адразу папярэджваюць, што гэта самы танны і хуткі варыянт атрымаць доўгатэрміновую візу, але не самы бяспечны. Асабліва для тых, хто плануе часта перасякаць мяжу. Некаторыя нават раяць ехаць праз Польшчу не больш за адзін раз, а пазней старацца ўязджаць у ЕС толькі праз Літву і Латвію, пазбягаючы кантактаў з польскімі пагранічнікамі.

Асобна ліпавае запрашэнне на працу прадаюць па 150 даляраў. Працоўная дамова, якую могуць запрасіць пры перасячэнні мяжы, у гэтую суму не ўваходзіць. Запіс на візу з вашым запрашэннем каштуе 450-550 рублёў.

Італія 

Ёсць яшчэ варыянт з Італіяй, за дапамогу ў адкрыцці візы пасярэднікі бяруць 1200 рублёў. У кошт паслугі ўваходзіць у тым ліку запіс на падачу, аплачаны авіяпералёт.

Кажуць, што Італія выдае візу мінімум на паўгода, але бываюць і больш працяглыя тэрміны на 1-4 гады. Калі пачынаць рыхтаваць дакументы ў апошнія дні лістапада, то падача хутчэй за ўсё адбудзецца ў студзені наступнага года.

Іспанія

Турыстычныя візы ў гэтую краіну ў асноўным выдаюць тэрмінам на 3-6 месяцаў. На гадавую візу могуць разлічваць тыя турысты, хто меў іспанскія турыстычныя візы раней. Пасярэднікі за падрыхтоўку дакументаў і запіс на падачу бяруць каля 450 рублёў.

Ілюстрацыйны здымак. Фота: «Наша Ніва»

Венгрыя 

Таксама турыстычныя візы беларусам адкрывае Венгрыя, але шанец атрымаць доўгатэрміновую візу 50/50. Частцы адкрываюць кароткатэрміновыя візы на адзін візіт, а іншыя атрымліваюць шматразовыя візы на 1-3 гады. Пасярэднікі за дапамогу ў афармленні дакументаў і рэгістрацыю на падачу бяруць 600-700 рублёў.

Грэцыя

Тым, каму віза трэба тэрмінова ці хто проста пачынае візавую гісторыю, можа падысці Грэцыя. За пасярэдніцкія паслугі агенцтвы бяруць толькі 350 рублёў. Абяцаюць хуткі запіс, але віза будзе тэрмінам на 2 тыдні. 

Германія

Сярод краін, якія добра адкрываюць доўгатэрміновыя візы беларусам, можна назваць Германію. У залежнасці ад візавай гісторыі, можна разлічваць на візу тэрмінам на 1-5 гадоў. Галоўны мінус — дата падачы. Па стане на канец лістапада, запісацца на падачу можна не раней, чым на чэрвень 2024 года.

Чытайце таксама: 

«Закрываючыся ад беларусаў, Захад міжволі штурхае іх да Расіі»

«Я меў адносна яго ілюзіі». Былы міністр замежных спраў Літвы згадвае пра Уладзіміра Макея і перапіску з ім у 2020-м

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
5
Пеця/адказаць/
28.11.2023
Беларус, а пазняк этат яшчэ трынцiць якiя нам польша сябры i браты
5
Вася/адказаць/
28.11.2023
На дне, а як звязаныя між сабой звальненьнне з працы і атрыманне турыстычнай візы? Калі вам трэба з'ехаць з канцлагера, то гэта не праз турыстычную візу робіцца.
3
Тутэйшы/адказаць/
28.11.2023
Вася, Шмат беларусаў прынцыпова нiкуды не збiраюцца ўцякаць! "Хто вытрымае, той зразумее, што ён - чалавек". Так што свае рэкамендацыi пакiнь сабе.
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера
ПНАЎСРЧЦПТСБНД
123
45678910
11121314151617
18192021222324
25262728293031