Знайсці
19.11.2023 / 15:48РусŁacБел

Пасля звальнення гендырэктара OpenAI пагражае распад. Сэма Альтмана просяць вярнуцца назад

На днях з'явілася навіна, што гендырэктар кампаніі OpenAI Сэм Альтман, адзін са стваральнікаў сусветна вядомай нейрасеткі ChatGPT, быў «нечакана» звольнены з пасады. Як высветліла выданне The Verge, гэтае рашэнне адразу ж выклікала сур'ёзны крызіс у OpenAI, які можа цалкам знішчыць кампанію.

Сэм Альтман, адзін са стваральнікаў сусветна вядомай нейрасеткі ChatGPT і да нядаўняга моманту генеральны дырэктар кампаніі OpenAI. Фота: Patrick Semansky / AP

Рада дырэктараў OpenAI, якая ў пятніцу без канкрэтнага тлумачэння прычын звольніла кіраўніка кампаніі Сэма Альтмана, зараз просіць бізнэсмэна вярнуцца назад на пасаду гендырэктара. Аб гэтым даведалася выданне The Verge, спаслаўшыся на крыніцы, блізка знаёмыя з сітуацыяй.

Паводле выдання, рада дырэктараў пачала прасіць Альтмана вярнуцца назад ужо на наступны дзень пасля ягонага звальнення. Справа ў тым, што сыход бізнэсмэна выклікаў «вельмі неадназначную» рэакцыю сярод фундатараў і звычайных супрацоўнікаў кампаніі.

Па інфармацыі крыніц, ні тым ні іншым не спадабалася гэтае рашэнне і яго раптоўнасць настолькі моцна ўражвае, што яны прыгразілі спыніць сваё фінансаванне і працу ў рамках OpenAI і сысці ўслед за Альтманам, стварыўшы з ім новую кампанію па распрацоўцы штучнага інтэлекту.

«Пакуль што Альтман не спяшаецца вяртацца назад, бо хацеў бы значных змен у структуры і спосабах кіравання кампаніяй. Рада дырэктараў выказала гатоўнасць сысці ў адстаўку, толькі каб вярнуць Альтмана і стабілізаваць сітуацыю з крызісам.

Разам з гэтым многія супрацоўнікі OpenAI заявілі, што сыдуць з працы ўслед за Альтманам і з радасцю пяройдуць у яго новую кампанію, калі той вырашыць яе стварыць», — паведамляе The Verge са спасылкай на крыніцы.

Выданне таксама высветліла, што за рашэннем звольніць Сэма Альтмана можа стаяць ураджэнец Расіі і адзін з чальцоў рады дырэктараў OpenAI Ілля Суцкевер, які адным з першых паведаміў аб звальненні бізнэсмэна. Крыніцы The Verge адзначаюць, што гэта магло стаць праявай барацьбы за ўладу над кампаніяй.

У той жа час агенцтва Bloomberg напісала, што кіраўніцтва карпарацыі Microsoft, якая з'яўляецца асноўным фундатарам і партнёрам OpenAI, рэзка раскрытыкавала рашэнне рады дырэктараў кампаніі аб звальненні Альтмана і зараз аказвае ціск на дырэктараў OpenAI, каб тыя аднавілі Альтмана на яго пасадзе.

Кампанія OpenAI была заснаваная ў 2015 годзе. У ліку заснавальнікаў, акрамя Сэма Альтмана, быў таксама і мільярдэр Ілан Маск, аднак у 2018-м ён пакінуў кампанію, каб надаць больш увагі развіццю брэнда электрамабіляў Tesla (пазней, летам 2023 года Маск зноў вярнуўся ў галіну штучнага інтэлекту, стварыўшы новую кампанію xAI).

Чытайце таксама:

Найбольшыя краіны свету падпісалі дэкларацыю аб катастрафічнай небяспецы штучнага інтэлекту

Штучны інтэлект упершыню заключыў бізнэс-кантракт паміж дзвюма фірмамі без удзелу чалавека

«150 фільмаў за секунду». У Кітаі запусцілі найхутчэйшы інтэрнэт у свеце 

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера