Падчас выбуху дрона на аэрадроме ў Курску пацярпела кіраўніцтва авіяпалка — медыя
На аэрадроме Халіна ў расійскім Курску выбухнуў беспілотнік — ёсць забітыя і параненыя сярод кіраўніцтва авіяцыйнага палка, паведамляе «РБК-Украіна» са спасылкай на крыніцы ў ГУР.
Сёння пад атаку дрона трапіў аэрадром Халіна, размешчаны за 7 кіламетраў ад цэнтра Курска. На аэрадроме базуецца 14-ы гвардзейскі знішчальны авіяцыйны полк імя Жданава, піша выданне.
Як распавялі «РБК-Украіна» крыніцы ў вайсковай выведцы, магутны выбух адбыўся на ўзлётна-пасадачнай паласе.
Расіяне, паводле крыніц выдання, сіламі РЭБ перахапілі БПЛА побач з аэрадромам, і далей дрон нібыта быў «бяспечна прыземлены» на ўзлётна-пасадачнай паласе. Пасля гэтага агледзець яго нібыта прыехала кіраўніцтва авіяпалка і афіцэры ФСБ.
«Калі дэлегацыя паспрабавала агледзець БПЛА, адбылася дэтанацыя боепрыпасаў», — распавёў суразмоўца.
Па даных крыніц, пры выбуху забітыя або атрымалі раненні:
камандзір 14-га авіяпалка;
адзін з яго намеснікаў;
група афіцэраў-авіятараў;
прадстаўнік вайсковай контрвыведкі ФСБ;
работнікі аэрадрома.
Гэтай раніцай у расійскім Курску адбылася чарговая атака беспілотнікаў. Як распавялі «РБК-Украіна» крыніцы, дрон трапіў у мясцовы будынак МУС.
Крыніца падкрэсліла, што атакі на Курск працягваюцца.
Учора ўкраінскі беспілотнік атакаваў будынак ФСБ у Курску ў Дзень горада, а таксама нафтаперапрацоўчы завод каля аэрадрома.
