У Грэцыі на гары Афон беларускага манаха збіў румынскі праз багаслоўскую спрэчку
У адным з манастыроў на святой гары Афон пасварыліся двое манахаў — румын і беларус, пасля чаго першы збіў другога. Аб гэтым піша выданне «Беларусь и мир» са спасылкай на грэчаскія СМІ.
Інцыдэнт адбыўся ў нядзелю 17 верасня каля 18:30 у двары сербскага манастыра Хіландар.
Па папярэдніх даных, манахі выпілі дзве бутэлькі віна, пасля чаго паміж імі ўзнік канфлікт — меркавана, з-за спрэчкі ў пытаннях багаслоўя.
Удакладняецца, што 35-гадовы румын біў 52-гадовага беларуса рукамі і нагамі, а таксама пластыкавай бутэлькай.
Пацярпелага даставілі ў медцэнтр, дзе аказалі першую дапамогу, а затым — у бальніцу.
Наш суайчыннік заявіў, што не хоча прыцягваць да адказнасці свайго апанента, і не выказаў жадання, каб пабоі зафіксаваў судмедэксперт.
Тым не менш, румынскага манаха затрымалі, ён падазраецца ў нанясенні цялесных пашкоджанняў. Справу разгледзіць суд па справах аб няцяжкіх правапарушэннях у Салоніках.
