У Новай Баравой прэзентавалі новы квартал са свяцільнямі і дываном у двары. Што з цэнамі?
«А-100 Дэвелапмент» працягвае будаўніцтва свайго флагманскага жылога комплексу — Новай Баравой. Учора забудоўшчык прадставіў патэнцыйным навасельцам яшчэ адзін квартал пад назвай Рабінавы. Асаблівасць новай часткі дамоў — арыгінальнае добраўпарадкаванне ў стылі вулічнай гасцінай, расказвае realt.by.
Новы квартал — невялікі. Ён будзе ўяўляць сабой групу з двух дамоў. Рабінавы квартал вырасце максімальна блізка да будучага цэнтральнага парку, школы і дзіцячага сада.
Прастора самога двара прадстаўлена ў канцэпцыі вулічнай гасцінай: дрэвы, шмат зон для ціхага адпачынку, свяцільні і таршэры, сталы, а таксама аздабленне ў выглядзе дывана з пліткі. Увогуле — усё як ва ўтульнай хаце.
Шумныя зоны будуць вынесены ў тарцы дамоў, каб не перашкаджаць жыхарам і не дастаўляць дыскамфорту. Тут прадугледжаны велабоксы, невялікая веламайстэрня, настольны тэніс, стол для кікера.
У двары будуць высаджаны рабіны як сімвал квартала.
Як і ва ўсіх кварталах Новай Баравой, у Рабінавым двор будзе свабодны ад аўтамабіляў. У ім таксама зʼявяцца ўпадабаныя жыхарамі агароды, зоны для адпачынку і актыўнага часу. Прадугледжаны павільён для сустрэч і адпачынку недалёка ад дзіцячай пляцоўкі, дзе можна будзе пагуляць у настольныя гульні.
У афармленні дамоў будзе выкарыстоўвацца акцэнтны тэракотавы колер, у якасці элементаў — дэкаратыўныя аканіцы, ламелі з люстраным эфектам для стварэння прыгожага адлюстравання і блікаў. Верхняя частка фасада аздоблена хвалістым металічным лістом.
У Рабінавым квартале будуць кватэры з тэрасамі, якія выходзяць як і ў двор, так і на цэнтральны парк. Таксама будзе падʼезд з эксплуатаваным дахам.
Плошча кватэр — ад 26 да 98 «квадратаў», будуць кватэры як з гатовым аздабленнем, так і без яго.
Падʼезды ў квартале скразныя, з выхадам у двор, для жыхароў з гадаванцамі прадугледжаны памяшканні для мыцця лап, калясачныя — у кожным падʼездзе.
Тэрмін здачы першага дома, які паступіць у продаж, — чацвёрты квартал 2024. Кошт квадратнага метра пачынаецца ад 1177 даляраў.
Чытайце таксама:
я сёння ўсіх пракляла