Знайсці
12.03.2023 / 15:5012РусŁacБел

Вольга Чамаданава аб пратэстах 2020 года: Выдатна разумела, за што і дзеля каго змагалася

Сённяшняя кіраўніца Галоўнага ўпраўлення ідэалагічнай работы і па справах моладзі Мінгарвыканкама Вольга Чамаданава на момант жнівеньскіх пратэстаў 2020 года была прэс-сакратаркай МУС Беларусі і часта з'яўлялася ў СМІ. У гутарцы з «Мінск-Навінамі» яна распавяла, як успрымала тыя падзеі. 

Вольга Чамаданава. Фота: «Мінск-Навіны»

Аўтар «Мінск-Навінаў» спытаў у Вольгі Чамаданавай, ці адчувала яна гонар, калі ў часы пратэстаў стала вельмі пазнавальнай.

«У той час я ні пра што такое не разважала. Было, мабыць, пачуццё здзіўлення, калі дзесьці праз год пасля заканчэння таго электаральнага перыяду я шмат ездзіла па рэгіёнах. А там падыходзілі зусім незнаёмыя людзі і вельмі эмацыйна дзякавалі. Адна жанчына, памятаю, сказала: «Ведаеце, мы ж тады кожны дзень уключалі тэлевізар і чакалі, што вы скажаце».

І цяпер паўтару: у мяне не ўзнікала ніякіх сумневаў у правільнасці таго, што я раблю і што кажу. Выдатна разумела, за што і дзеля каго змагалася».

Таксама ў гутарцы Вольга Чамаданава растлумачыла, чаму не стала настаўніцай беларускай мовы і літаратуры, на якую вучылася.

«Я выдатна памятаю свой першы ўрок у Ліцэі БДУ падчас праходжання педагагічнай практыкі. Гэта былі ўжо дарослыя хлопцы і дзяўчаты, матываваная аўдыторыя, вельмі цікавая, дарэчы. І быццам усё было добра. Але пасля заканчэння ўрока я зразумела, што чакала чагосьці большага. Разумееце, любая справа, за якую бярэшся, павінна выклікаць эмоцыі. Для жанчыны гэта вельмі важна, ды і не толькі для яе. Напрыклад, знакаміты савецкі тэатральны рэжысёр Анатоль Эфрас рэпеціраваў свае спектаклі, пакуль яны не ўзляталі. З'яўляюся максімалісткай, чагосьці падобнага чакала і я ад таго ўрока. Так, магчыма, не адразу, але яшчэ на філфаку я зразумела, што буду займацца чымсьці іншым», — растлумачыла Чамаданава.

Вольга Чамаданава ў часе паслявыбарчых рэпрэсій стала рупарам прапаганды сілавікоў.

Менавіта пры Чамаданавай у тэлеграм-каналах сілавых структур (а іх было створана досыць шмат) сталі з'яўляцца відэа «прызнанняў» і «раскайванняў». Таксама пры ёй дзяржаўныя журналісты праводзілі ледзь не допыты затрыманых на акцыях пратэсту. 

Можна гадаць, што такой інфармацыйнай рабоце Чамаданава навучылася ад расійскіх спецыялістаў, якія арганізоўвалі трэнінгі для прэс-сакратароў сілавых ведамстваў Беларусі.

Запомнілася Чамаданава і яшчэ некалькімі рэчамі. У дзень смерці Аляксандра Тарайкоўскага тэлеграм-канал МУС апублікаваў інфармацыю, што ён нібыта загінуў, бо спрабаваў кінуць у спецназаўцаў выбухоўку, якая разарвалася ў яго руках. 

Але хутка з'явілася відэа моманту смерці Тарайкоўскага, на якім было бачна, што ў ягонай руцэ не было ніякай выбухоўкі. Родзічы пасля таксама абверглі гэту інфармацыю ад МУС.

Калі праўда выплыла, новая інфармацыя не тое што не была агучана — не была выпраўлена ці выдалена і старая. Ніякіх прабачэнняў міністэрства ўнутраных спраў не прынесла. 

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
0
Калматы Вожык/адказаць/
12.03.2023
... Вольга Чамаданава растлумачыла, чаму не стала настаўніцай беларускай мовы і літаратуры, на якую вучылася.
У мяне шмат сяброў --  калег, саратнікаў, аднадумцаў -- але ніводнага з іх няма выкладчыка беларускай мовы.  Ёсць выкладчыкі рускай мовы, выкладчыкі матэматыкі, выкладчыкі фізікі, проста інжынеры, проста рабацягі ... І ўсе не саромеюцца размаўляць па-беларуску. Калі сустрэнеш нібы выкладчыка (цу) беларускай мовы ... -- Здравствуйце! ...  Так, я задаваў пытанне і не адной асобе: А чаму не па-беларуску??? -- Для меня -- это, просто, профессия!-- адказваў(ла).
Неяк, сустрэў на вуліцы аднаго знаёмага, "байца нявідзімага фронту", які мною заўсёды дужа цікавіўся ... Слова, за слова... -- А я, ведь -- окончил институт, как преподаватель белорусского языка,-- кажа ён мне....
У мяне вялікае падазрэнне -- у гэтай, ціпа беларускай хабзе, гатуюць толькі здраднікаў?

13.03.2023
Pačvara
0
Ліцэіст-гіст/адказаць/
13.03.2023
І зноў мой Ліцэй БДУ замяшаны нейкім чынам. Заўжды ў мяне былі пытаннечкі да гэтай маёй навучальнай установы. Шніп і Казлоўская можа адзінкі, якія сябе паказвалі, як шчырыя беларусы і падтрымліваючыя беларускасць. Астатнія былі на ўзроўні нацягнутых усмешак або спрадвечных журналаў.
Паказаць усе каментары
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера